笔者勒拉2019年04月17号撰写好《如风往事之——閒话关于剃头发迭桩事体》迭篇文章以后，自家总觉着还缺少了一眼眼么事、总觉着还有得閒话呒去讲完、讲清爽，于是就决定继续去撰写一篇与之相关呃文章，就定名为：《如风往事之——閒话剃头发外一篇》。

笔者出身勒拉20世纪70年代呃末期，畀大家称之为“70后”。勒拉嗰人读中小学呃辰光，通过观察以后发觉迭恁一桩邪气有趣呃事体，吾伲伊嗰年代呃男小囡，发型几乎可以去讲是一模一样呃，齐刷刷清一色板寸头。剃头发要剃到耳根以上，整齐干净就可以了。

噶末，勒拉掰搿辰光为啥要去剃一嗰板寸头啊？！侪是爷娘呃要求呗！只因为勒拉吾伲伊嗰年代，整嗰国家还身处勒拉计划经济时期，一直要到1993年、1994年以后国家侪跨入到市场经济时期。勒拉迭嗰前头，家家户户呃收入距离相差勿是交关多、牢牢大呃，可以讲几乎是脚碰脚，吾伲家庭是属于双职工家庭，爷娘呃经济收入又是邪气有限呃，侪要精打细算呃去过日脚。剃一嗰板寸头，覅仅仅是邪气经济实惠呃，还可以减少去理发店呃趟数唻，就好畀屋里厢省一眼眼铜钿，以便恁够畀省下来呃铜钿，用勒拉其他方面要去用铜钿呃地方。

嗰人经常听老一辈呃人勒拉讲：“有力长发。”迭句閒话呃意思就是勒拉讲：凡是一嗰人力气或气力交关大呃人，伊嗰头发就会得长得邪气邪气快噢！虽然笔者从小到大力气勿是顶顶大呃，但是头发长得是邪气邪气快呃！剃头发，基本哴向是三嗰礼拜到一嗰号头一趟，最最长也勿恁超过一嗰号头，超过了以后就显得交关难看了。勒拉一年12趟左右呃剃头发当中，至少有得一半呃辰光是到理发店里剃头发呃，省下唻另一半呃辰光，勿是由屋里会得剃头发呃三姨妈倪金英剃呃，就是由爷娘呃好友同事以及隔壁邻居陈刚阿哥帮忙剃头呃。

覅晓得啥呃原因，勒拉掰搿辰光，吾伲男小囡侪会得去犯一嗰通（毛）病呃，即大家侪是勿大欢喜去剃头发呃，大家邪气讨厌剃头发哦。只要爷娘开口讲：“侬现在可以到理发店去剃头发了。”吾伲勿是逃之夭夭，就是又哭又闹、耍耍无赖、能躲则躲，有一些男小囡还要去消地光躺勒拉地哴向唻……其实，迭恁样子做根本就是呒啥大用场呃，吾伲熬到最后一刻还是要乖乖呃畀头发去剃忒伊。虽然呒用场归呒用场，但是每趟仔到了剃头发呃辰光，依旧欢喜去闹腾哦。

自家还恁够清楚呃去记得，勒拉笔者读小学三年级左右呃辰光，母亲就请伊中药店里厢呃同事张景勇师傅，【备注：男；名字为音译；伊祖哴向至少是三代人侪是做剃头发行当呃，到了伊迭嗰一代人已经是第四代呃，伊本人剃头发也是邪气唻三呃，因为伊本人勿大愿意传承祖辈呃衣钵，所以就到中药店里去做生活。】利用上班当中空余呃辰光帮笔者剃一嗰头发，因为笔者勿肯去剃头发、十分讨厌去剃头发，就跟母亲以及伊呃同事大吵大闹了一场。真呃是眼眼调碰着了眼眼调，哪恁会得有噶末巧呃事体唻，伊嗰一天伊拉上级领导正好唻检查工作，发现迭桩事体后，扣除了母亲跟伊同事当月呃奖金。

等到自家长大了以后，回过头唻再去看迭桩事体，还是觉着自家小辰光一眼眼事体都勿大懂哦，更勿应该去迭恁瞎弄弄哦，还害得母亲跟伊嗰同事侪被受罚了。经过了迭桩事体以后，可以讲是不吃一堑，难长一智啊！本人只有经历了啥呃是错与对，才恁够使自家尽快呃成长起唻啊。经过迭趟仔教训之后，类似呃错误就再呒去犯过哦。

让笔者印象最最深刻呃板寸头，就是要数笔者勒拉读大学经济管理专科函授班呃辰光哦。勒拉某一天仔，笔者看到了同班学友当中，就有一嗰男小囡就去剃了一嗰板寸头。但畀过，伊虽然也剃呃板寸头，头型跟人家是勿大一样呃，伊所剃呃板寸头头型就好像一只打乒乓球呃乒乓球台子。伊本人讲：“之所以会得去剃迭恁样子呃板寸头，是因为爱好打乒乓球、欢喜去看看各类乒乓比赛呃缘故哦！”……

辰光走到了今朝仔，去剃一嗰板寸头变得越来越流行、越来越时髦了，大家又畀剃一嗰“板寸头”称之为“老板头”哦。只因为吾伲勒拉今朝仔流行欢喜畀各行各业里向呃一把手侪称之为“老板”，而且又据说伊拉是邪气欢喜剃迭恁样子一嗰呃头型，“老板”去剃一嗰“板寸头”，“板寸头”自然而然畀称之为“老板头”喽！……

【备注：文章为作者原创；各种和文章有关的图片均来源于网络上；感谢原创图片。】

杜老倌侠客居（陆伟）写于2009年10月30日星期五晚上