勒拉嗰人呃人生旅程当中，嗰人认为最重要呃头等大事之一就是去剃头发了。嗰人除忒勒拉生毛病呃辰光，可以任由医院里向呃医生去任意摆弄检查身体以外，也只有嗰人勒拉去剃头发呃辰光，侪会得肯心甘情愿、勿限定辰光，任由理发师摆弄，侪勿会得去生气。

嗰人还能够去清楚呃记得，勒拉笔者读中小学呃辰光，尤其是勒拉上历史课呃辰光，曾经还读到过迭恁一段史实哩，清朝是吾伲国家最后一嗰大统一封建王朝，最后一嗰王朝是由满族人统治呃。勒拉清朝初期、勒拉伊拉入关以后，对于汉族人呃发型勿是邪气满意，要求所有呃汉族人侪要去“剃发易服”，强迫汉族人去仿照满族人习惯剃头发呃法令，满族男人勒拉剃头发呃辰光，要求头发要去剃前额跟四周，还留存头发编成辫子垂放勒拉后脑勺，而且人人侪要去遵守。凡是“留发者勿准留头，留头者勿准留发！”……迭道剃头发呃发令颁布以后、以及强制性执行加剧了清初呃民族矛盾，还遭受到了广大汉族人民呃极力反对，触发了江南地区江阴、嘉定、苏州等地方老百姓呃抗清斗争，有邪气多呃老百姓誓死不从，侪付出了血呃代价。

笔者是出生勒拉上嗰世纪70年代末期，畀大家称之为“70”后，勒拉笔者读中小学呃辰光，每趟到理发店去剃头发呒有勿排队呃辰光，基本哴向侪是要排队呃，有些辰光队排得长一点，有些辰光队排得稍许短一眼。勒拉通常情况下头，理发店侪会得去放上好几条长凳子，前面呃人勒拉剃头发，后面那些还呒轮到剃头发呃客人，就会得坐勒拉长凳上头等待着。勒拉等待呃辰光，理发店里向呃剃头师傅会得送上人民日报、解放日报、文汇报和新民晚报畀客人去翻阅。勒拉掰搿辰光，还专门有一嗰角落头里厢是有得报架子呃，上头放置了各式各样呃申报纸，而且勒拉交关长呃辰光里向，报架子全部都是木制呃，到了后头唻侪置换成不锈钢呃。每当轮到自己去剃头发呃辰光，就会邪气自觉呃把手里向呃各类申报纸让畀后头唻客人去翻阅翻阅。

对于勒拉掰搿辰光呃笔者来讲，到了理发店以后，假使需要去等待呃閒话，去看男子剃头发呃程序，是消磨辰光最好呃办法了。

据笔者所了解到呃情况晓得了，勒拉北方某些城市剃头发，跟南方地区是勿大一样呃。比方讲：就拿北京市来举一嗰例子伐，还要去区分啥呃男子部和女子部，勒拉吾伲城市是勿会迭恁去细分呃。

勒拉笔者读中小学呃辰光，绝大多数中年以上男子跟男小囡，剃头发主要还是以板寸头为主哦，剃头剃到耳根，整齐干净即可。

对于中年以上呃男人来讲，假使只是去剃一嗰板寸头，最最主要呃三道程序，通常情况就是：剃头发、汏汏头、刮刮胡子就可以了，男小囡剃板寸头，就省略忒了刮胡子迭道程序。剃板寸头呃顾客是必要去汏一嗰头呃，勿去汏头绝对是剃勿好呃，目的就是为了清理头哴向呃短头发，等到汏好清理过了以后，侪可以去修理整齐，要是勿然呃閒话，勿去汏一嗰头，头发必定是勿像样子七高八低勿成型。

对于中年以上呃男子唻讲，勒拉迭嗰三道程序当中，最最重要呃一道程序就是去刮一嗰胡子了。理发师傅会得先畀大扶手靠背椅斜放【大约摸约勒拉135度角】、固定好，然后侪去用软毛刷沾上事先调制好呃肥皂泡沫涂满脸颊，再去用一条滚滚烫呃热毛巾敷勒拉面孔上头，辰光大约摸是勒拉三到四分钟左右，其目的是为了让胡子变得软下唻，就恁便于剃头师傅去刮胡子了。勒拉热敷呃同时，剃头师傅还会拿一把锃锃亮呃剃须刀勒拉一块牛皮布上，去唻唻回回呃嚓、嚓、嚓摩擦几十下，等到觉着差勿多了以后，最后侪会得去唦唦呃刮起胡须来，而且动作是邪气慢呃，勿是老老快呃，刮起胡子唻，都是顺时针去刮呃，那优美呃姿势、熟练地动作令笔者今朝仔都难以忘记忒哦！

今早仔剃头发，跟老底子去做一嗰比较，完全就是勿一样勿再相同了。“理发店”通通畀升级为了某某美容美发厅【院】，理发店里厢呃剃头师傅，一律改为了美容美发师，外加还推出了星级美容美发厅【院】、星级美容美发师、专职美容美发师。即便是男人去剃头发，服务再也勿是老底子老三样剃、汏、刮了，内容已经是变得五花八门、名目繁多哦。比方讲：就有得“造型设计”、“消除皱纹”、“吸取油脂”、“付里子烫发”等等……真呃可以去讲是数不胜数啊！

【备注：文章为作者原创；各种和文章有关的图片均来源于网络上；感谢原创图片。】

杜老倌侠客居（陆伟）写于2009年04月17日星期五晚上