加载中…2014年黃子華《唔黐線唔正常》多倫多場互動（轉發）
(2014-11-29 22:24:25)
标签：
黄子华栋笃笑 |
分类： 子華與華迷 |
事先講明，絕對劇透，所以如果任何朋友尚未睇過個show而又唔想知道內容的話，請勿往下看。
Let’s start！
首先講一個即使係現場睇過紐約場嘅朋友都未必知道小秘密。其實短片播完，音樂響起，子華準備出場嘅時候，舞台首先放出一縷輕煙，然後再放出一縷比剛才大d嘅煙霧，之後先連續放出兩次大煙俾子華出場。其實哩個并唔係現場故意製造嘅效果，而係負責噴煙嘅朋友一時失手，所以先會需要接二連三地咁噴煙。（基於該名員工完全係義務幫忙，無收酬金，所以就唔好爆人地個名出嚟啦，哈哈）
而去到多倫多，唔知係米因為位置問題，喺我個角度睇過去，好似係子華行左出嚟d煙先放。但之後睇返網友分享嘅片段，又好似唔無遲噴，所以哩個係一個解釋唔到嘅不解之謎.
跟住就係心軟部分，因為我喺第二個post分享過，所以就唔再重複啦。不過喺解釋個心理測驗嘅時候，子華突然話“係啦，上次有個人哎除褲哎到除左自己條褲就係喺多倫多咖啦。果位朋友哎得幾激動啊，‘除褲，除褲’（子華扮果個朋友哎，手仲有除褲嘅動作）啊，之後就激動到除左自己條褲啦。”。。。。。。
之後子華話，而家去香港旅遊唔好隨便帶遮出街，因為係好有立場嘅。而且仲要留意一d帶住口罩嘅人向你行埋嚟，因為佢可能係想過嚟打鍋你，又或者想打個“噴嚏”（唔識打果兩個字lol）{喺紐約嘅時候，子華係先講打噴嚏再講打人嘅，順序有所唔通}。
此時于前排舞臺下有一把黃色嘅遮打開左，全場一片掌聲+歡呼聲。
個show繼續，咁而家就講到契弟。當子華再一次問契弟點解釋時，現場一把好細嘅女聲就哎“黃子華！”（觀眾大笑）
子華跟住就話個女仔“女仔人家唔好順便話人契弟啊，你究竟明唔明契弟咩意思咖？契弟唔可以亂講咖！”之後幾乎同一時間，黃遮于該女仔位置附近再次打開（因為位置問題，唔確定係米就係果個女仔打開嘅）。。。
之後當子華喺完成一個話題后，突然向觀眾鞠躬，然後話要多謝一d單位，現場就大哎encore.之後子華就話“叫咩encore姐，又未完場，而家只係上半場完姐。不過因為我等陣一放低支咪就唔會再攞返起，所以就趁而家講左先。”
下半場講到生仔放假嘅時候，子華問加拿大生仔可以放幾耐假，之後好多觀眾哎一年，之後子華（同我本人）都O曬嘴，子華再問，“幾耐哇。”全部多倫多人一齊哎，“一年！”“生仔放一年假！？”你地用英文講多次啦，“One
year!!”
子華除左繼續露出難以置信嘅表情外，只可以無奈地講，“難怪咁多人移民加拿大啦，生仔有一年假放！！”。。。""其他粉絲補充:
講到一年產假既時候 子華不禁感嘆：你地加拿大真係⋯真係超越人權啊！ （20秒掌聲）""
喺之後嘅話題裏，子華多次不經意地多次提及“一年假。”例如佢講講下某個point,突然間講“我而家成個腦都仲諗緊生仔有一年假放啊。我都應該要考慮下係米要生仔啦”又話“你地加拿大人無乜煩惱咖啦，生仔有一年假放。”
Or “我真係唔知我之前咁辛苦為咩，生仔就得啦，有一年假放～～”。。。
話題一轉，當佢再問“死老豆”有幾多日假放。現場有人話3日，有人話5日，亦有人話7日。
咁佢就講“係囉，好似我地平時答人咁囉，(扮問人)
‘你放假放幾多日啊’（扮答）‘3，5，7日囉！’“係啊，死老豆米放3，5，7日假囉。如果個老豆對我好d，米放多d囉。對我唔好米放少
d囉。”。。。。。。
去到講離婚率，子華話加拿大好難得，因為佢地嘅離婚率係下降咖。而有調查報告所講，天氣寒冷嘅地方比天氣暖嘅地方嘅離婚率係低嘅。哩個係因為如果兩個人閙離婚，咁其中一個就要出車訓。哇，咁鬼凍仲要喺車訓！？凍死人咩，咁都係唔離啦～～
到左酒吧篇，當子華講到“果個女仔轉身，跟住同我講”此時全場都喺度好留心咁想知道個女仔講咩。因為我係紐約睇過，無錯，哩個位我抄人嘅姐，但好笑又唔hurt人，無所謂啦。咁我就哎左句“除褲啊。”全場大笑，跟住子華就話“男仔同女仔有分別咖。邊有人會咁直接，一開口就哎除褲嘅姐。有d嘢係要有過程嘅，唔怪之得你搵唔到女朋友啦！”對於單身嘅我，哩刀真係俾佢插得應囉T-T。
之後佢又準備繼續講落去，“果個女仔轉左身，跟住同我講”現場好幾個觀眾一齊哎“回水”，全場再次大笑。子華自己都笑埋，跟住又準備繼續講“個女仔轉左身同我講”“乸型！”又一陣笑聲。笑聲完后，真係諗住繼續講
“個女仔同我講”“契弟！”全場又係一陣笑聲。子華今次就扮嬲話“你地係咁，我唔講啦！”之後去左飲水，全場一陣騷動后。子華突然話，“死啦，我唔記得左佢要同我講咩添。”仲拍左自己前額幾下，之後總算記得返，個show繼續。。。。。。
到左講女明星果part,佢就話唔好問我個女明星叫咩名。“咁姓咩啊？”臺下一觀眾好快咁答左！子華都有d突然，“係喔，我話唔講叫咩名，但你問姓咩，又真係無問題過播!唉，總之就係個女明星啦！”。。。
基本上，多倫多站我記得嘅，相對特別嘅場口s就係哩d.
再次申明，單憑記憶記出嚟，記錯記漏唔好閙我。歡迎追加其他場口！
喜欢
0
赠金笔