夢想係對生命嘅一種追求，一種憧憬，一種渴望，係你一路行落去嘅動力。追逐夢想嘅路途係崎嶇不平，所有嘅障礙係你即將蛻變嘅先兆。所以下次遇到障礙嗰陣，笑下，命運同你講緊：你唔單只可以咁嘅。

我個世界黑咗好耐，突然之間有一日，我起身刷牙，我決定換咗支牙刷，擠咗啲牙膏落去放入口度刷，牙膏好涼、好舒服，然後我望住鏡入面嘅自己，我好耐冇望過自己喇。嘩，做咩搞成咁？我問自己做咩搞成咁，僕低咗咁耐捨得起身未？我忽然之間“叮”一聲，人生在世唔係鬥幸福，而係鬥快喺僕低之後爬翻起身。我同鏡入面嘅自己講：喂，你捨得爬翻起身未啊？

點解夢想係一定要同利益掛鉤？點解要教人用最小嘅力得到最大嘅利潤呢？利益呢樣嘢將地球儲咗幾十億年嘅資源榨光咁滯，將我哋嘅屋企毀滅，值得咩？所以，我有個夢想，希望大家眼光唔好再放喺利益度，唔好淨係諗自己可以攞到幾多，因為真正嘅快樂係嚟自分享。

如果你光說不做，日諗夜諗又唔付諸行動，夢想會成為你生命嘅毒藥，毒發嘅時候你會疑神疑鬼，會有幻覺，諗咗當做咗，其他人比力嗰陣，你仲笑人哋，恐嚇人哋，睇死人哋。最後當其他人為理想奮鬥而得到快樂，你得到嘅，只有一種後遺症，叫做──遺憾！

點解飛蛾要撲火呢？唔係佢哋厭世，係佢哋尋找同類嘅本能，咁喺人類發現火之前佢哋撲乜呢？係月光。同月光keep住45°平行咁飛，就可以遇上同類交配繁殖。但係人類出現之後，佢哋就畀啲人搞到亂嗮，亂咁圍住啲燈啊、蠟燭啊係咁飛，以為自己會遇到同類。我好想相信，引導我飛向我嘅同伴嘅係真正嘅月光。我希望我被呢個世界搞到我亂嗮之前，可以憑我嘅本能，趕得及遇到你。

好了，我已經三年冇見過任何人，我可以確定呢個世界只係剩返我一個，幾年前唔知邊度核爆，引發咗一個超級海嘯之後，呢個世界已經停咗電好耐。畀我搵到呢部答錄機，用筆芯電，我希望你執到呢部答錄機嗰陣仲有電聽埋落去。唔知道你哋個世界仲有冇季節嘅呢？我成長嗰陣仲有四季，我哋係咁區分：8個小時工作，8個小時休閒，8個小時瞓覺。我哋就係咁用時間區分住我哋嘅權利、義務、感情，同我哋嘅夢。地球唔係每個地方都有四季，好彩我出世嗰個地方有，係，我都突然感恩起來。我懷念喺我嘅過去曾經出現過嘅，美好嘅嘢，一啲美麗嘅人同事物。嗰啲我錯過咗嘅，應該互相欣賞、擁抱嘅時刻，我擁有過嘅快樂。　

我希望你唔好重蹈我嘅覆轍，好好抓著宜家嘅每一個時刻，你同我唔同，你仲有未來。未來係可以變，幾細步都好，都要向前行。幾冇選擇都好，都要記住，仲有得揀。唔好放棄自己嘅夢想，雖然你唔識得我，但係，我愛你！