莫醫生嘅書一定好睇。

條友仔食得玩得又鐘意旅行，學識豐富兼注重細節，最近仲重金買咗部神級相機，好鬼重，重到可以練老鼠仔。呢本書有埋靚相，圖文並茂，總之win硬啦。

而最最重要係，佢啲書，死人死得多過歷史書。

你有無識過一個人，生活上接觸嘅死人，仲多過一次恐怖襲擊？

作為一個朋友，我都成日唔記得佢呢個長處。

有次同佢去印度，仲有一個鐘頭就落機，突然有空中小姐撲向佢：“莫醫生，幫幫忙！”

跟住我就離遠望住莫大夫不停上上落落猛搓人心口，人工呼吸，又搓，又呼，再搓，再呼，直到……

佢擰下頭，慢慢走返座位。

當時一直喺旁邊嗰位太太，出奇咁靜。

成個機艙，粒聲都無。

只有死神，無聲無息經過。

我用眼神問佢：真系死咗？

佢答我：“唉，其實我行埋去嗰陣已經死咗一陣喇。盡力啦。頭先我同佢做人工呼吸，佢的胃液倒流湧入我個口。唉，味道好難忘……”

我開始明白，點解佢每次旅行都帶罐頭鮑魚。

我開始明白，點解佢每日都只系瞓幾粒鐘。

我開始明白，點解佢啲頭髮gel得咁硬。

黑洞，係睇唔到嘅。

你只能夠透過周邊嘅時空物質偷偷地留意到佢存在。

同樣道理，想觀察死亡，首先就要觀察嗰啲一日到黑同死亡打交道嘅人，或者睇佢寫嘅書。

我哋都生活喺黑洞邊，所以時時要記得對酒當歌。

喂，老友，以上就叫完工喇。他媽的寫足我全日！

祝勁賣啦！