鸡囝

有蜀日放昼辰候，雨盪真大

伊自家也无带伞，就总款躃转厝

突然伊听见

着栽紫苏其蜀块地裡势

有鸡囝叫其声音

伊慢慢行过去，看见蜀头

乌乌其仂嫩嫩其鸡囝

蜀身都乞雨沃滥去

伊使手捧起，伊也伓走 奇怪

将伊带转厝

放地兜以后乍发现，这鸡囝是

蜀头蹁骹，难怪鸡母伓挃伊

但是伊无管只满侈，伊每日

放斋以后，都去掘蚯蚓乞伊食

着伊其细心照顾下，只头鸡囝也

发大去，并且也徛直去

因为每日上堂落堂

心中都想礼只头鸡囝

伊日子也过礼真充实

真快，几个月日过去

有蜀日也是放昼

嘻日天气真好，阳光灿烂

伊像每日转厝逢款

因为心礼想复会看见鸡囝

所以欢喜礼骹做跳跳喏

就差唱歌唠

蜀裡门，天井礼无看见嘻头鸡

伊躃底呢去

依妈，鸡囝哩

嘻头鸡今旦乞骹踏车碾去

骹碾对断去，最后断气去

现在着鼎礼，汝去食吧

伊，见觉突然天变矮去

天变扁扁喏，虽然天固是蓝其

伊无讲话，蜀厝侬也无讲话

都着食饭，有蜀盘配

就是嘻头鸡

伊是我其……但是

我现在将伊食腹佬礼去

我什是心肝恰搭

多年之后，伊再想起只头鸡

突然伊想遘普通话中

有蜀句成语号礼：“在劫难逃”

伊会变真迷信去

因为现在伊

做什乇都无敢恰欢喜

因为伊总见觉欢喜背后就会

“乐极生悲”

只头鸡着伊身礼心礼

始终无法 消化