鸡囝讲

嘻日中昼雨盪野大

准确其讲应该是雷阵雨

就是着中午或者着

半晡爱盪其嘻种雨

我覭着紫苏其箬箬下底躲雨

伓是我妈伓挃我，我是

乞卖鸡囝其溜只呢其

嘻日侬都围礼买鸡囝

有蜀隻侬将我挑出来

发现我是翩骹，所以

我就乞抾赖去

雨盪真大，我直透啼嘛

我看见有蜀双手伸过来

将我捧礼，围礼

将我带转厝

伊将我放地兜，乍发现我是翩骹

伊也无讲什乇，书包放囇

就掏饭乞我食

以后其日子，我见觉每日都是

阳光灿烂其，伊蜀转厝

就共我讲话

福州话我是听会会意其

然后伊带我去

掘蚯蚓食，我真爱食蚯蚓

真正其美餐

我见觉我真快发大去

我发现我骹也拔直去

我听旁边其鸡囝攀讲

我得其是蜀种软骨病

总款过去差罔多有五个月日

按照鸡其年龄来算

我应该是青年哥唠

但是我发现

我蜀头鸡母囝

我身上也无发漂亮其毛毛

但是相对其伊来讲

我固是幸福其

因为我伓使考虑

我应该颂什乇衣裳

伊真受怪，都是颂旧其衣裳

因为颂衣裳伊稠稠啼嘛

嚽是我会理解其

我对行过我身边

悬悬大大其鸡角尽落羡慕

因为伊衣裳真漂亮

唱歌也真好听

我真希望伊会共我讲几句话

但是伊对我无什乇兴趣

伊喜欢去讨鸡母

估计我固是恰嫩

嘻日，我听见外首真闹热

鸡囝都躃出去看闹热

我也跟出去

就着我躃半墿中辰候

我看见蜀芘大大其轮轮冲过来

我躲都儥赴

我其两条骹乞碾对断去

我侬眩去

俪见觉有手将我掼礼

廮天井角

血都流蜀地，我就死去

正好隔壁厝蜀头鸡母

着礼孵鸡囝

我赶紧去投胎

我目睭擘开辰候

发现伊着大啼

我见觉我真其是“在劫难逃”

本底是翩骹

死其辰候复是骹对断去

我看见伊流礼目滓食鸡肉

嚽也真正常

因为许辰候无乇食

以后伊复养啰各种小动物

有犬囝，白鸽，只只，蚕茧

伊儥爱共侬屈蜀堆

伊喜欢共动物屈蜀堆

我发现伊是蜀隻孤独其

侬