小辰光弄堂口一条马路，讲大勿大，勿是主要马路，讲小也勿小，有根有底。名字么也好听，好写，好讲，叫得响，发音亲切，有眼嗲味道。马路旁边侪是居民房子，难板有汽车开过，脚踏车、三轮车、板车倒是来来往往有一眼。
    大热天格太阳大家侪吓咯，早浪厢还算风凉，可以抓紧辰光白相，到了中浪厢，日头火辣辣，晒得柏油马路也烊开来，啥人也勿会戆答答立勒太阳下头，只好椰勒屋里厢，屋里厢有穿堂风，竹榻浪一睏，比外头适意交关。
    大热天里最精彩格辰光是夜里厢，下半日还空荡荡格马路，一到夜头一记头热闹起来，上街沿下街沿坐满人，马路当中走格也是人，大人小人男人女人侪出来了，就像监牢里放风一样，啥人也勿舍得浪费格点好辰光，好像勿出来走一走，一天就呒没过过一样。
    男人么，吃好夜饭，嘴巴一揩，荡发荡发就出了弄堂。文气眼格，瘦一眼，戴副眼镜，穿件薄衫，下头是条半长宽松短裤，手浪厢拿把折扇，一副样子就好像是当官格观察民情，写文章格体验生活。浪当点格男人，或者做惯了重体力生活格，要么打赤膊，要么穿背心，伊拉体格明显结棍一眼，腰也粗，脚浪厢么就是一双木拖板，叭嗒叭嗒，故意走得来得格响。一般来讲，前头一种男人，尽量靠边走，走勒慢，荡荡悠悠，后头一种男人，经常亨三亨四走勒马路当中，脚步也大，像是主人一样。
    女人么，出来总归晚一点，要拿屋里厢事体做好，夜头睏觉准备工作做好，奈么再走出来。伊拉总归是短袖衬衫长睏裤，摇一把大扇子，勿会走远咯，多数情况就立勒弄堂口四面看看，或者拿只小凳子坐勒乘风凉人旁边讲讲闲话。年纪轻点格小姑娘，伊拉是老积极咯，憋了一天，好容易等到了出风头辰光，当然勿会放过，两个三个凑了一道，衣裳也穿得比别人像样，睏裙睏裤，颜色侪是有眼招摇咯，有两个还会穿上连衫裙，头上戴蝴蝶结，头发高头再弄眼小花头，总归是要吸引人家眼光嘛。伊拉还会搨花露水搨香粉，刚汏过浴么，一边走一边笑盈盈，目不斜视叽喳几声，飘过一阵香气。
    伊格辰光汽车少，弄堂口格条马路，一到夜头，脚踏车也勿大有了，人侪走勒马路当中，两旁边么老早已经拨沿马路人家摆了竹榻、铺板、凳子。
    所有荡马路乘风凉格人，侪是呒啥目的性咯，眼睛东看看西看看，走过去了，等歇歇又走回来，纯粹就是消费辰光。假使格个辰光发生眼事故纠纷，一歇歇人就围拢过来交关，有格辰光有人劝，有格辰光有人帮可怜一方讲闲话，有格辰光也有人跟了起哄。小人是马路浪厢最活络咯，又奔又叫，一眼也勿晓得热，人多了，伊拉也人来疯了，刚刚汏好浴又弄得来一身汗。
    有格辰光，勒拉介许多穿着随随便便乘风凉人当中，会得看到一两个穿得一本正经格朋友，格点人里厢，有格属于刚刚下班还呒没回到屋里，有格是去约会谈朋友格。尤其是小姑娘，只要看伊打扮得山青水绿，又是一介头走路，八九勿离十，肯定是去谈朋友咯，讲也勿要讲得咯。
    夏天夜里厢格马路，到处可以听到劈哩啪啦木拖板声音。现在想想木拖板老勿合理咯，一眼也勿牢，橡胶皮带勿是断脱就是从钉子高头滑出来。还有磨损也快，一个夏天下来厚木板已磨成薄木板了，薄了，有格辰光就会从当中一豁两，格是要夹肉咯，老痛咯。反正穿木拖板走了马路浪经常有人出洋相咯。
    伊格辰光路灯昏暗，毕过再暗总归有人勒拉路灯下头着象棋，每天侪有咯，两只路灯两副棋摊。着棋只有两个人，看格人五个十个交交关，大家侪当是乘风凉解厌气寻开心。
    十字路口还有一个最闹猛地方，就是西瓜摊。一部板车拖来西瓜，摆只台子插根竹竿吊一只电灯泡，弄得来最最亮，老远就看到了，连得着棋朋友也拆了外快。伊格辰光上海市面卖格西瓜以椭圆形平湖瓜为主，滚圆格解放瓜比较少。台子高头有切好格西瓜，有半只也有四分之一只，侪是红通通颜色，卖相来得好，卖西瓜格人么，挑瓜当然老鬼了。台子浪厢还有一把老长格西瓜刀，一看就磨得老快咯，蛮吓人咯。
    西瓜摊旁边总归围了蛮多人，小人么一声勿响看了嗨，大人么问价钿问甜伐，有问呒问讲两句。过一歇，走过来个大人搀小人，叫摊主挑只西瓜称一称，又讨价还价几个来回，付了钞票拎回去了。有格辰光也有人拿了一只白瓤瓜来调，摊主就会调拨伊一只，讲好勿甜勿红包调咯么。伊格辰光几年里厢，西瓜价钿便宜格是4分5分1斤，贵格是1角、1角1分1斤，我印象老深咯。
    每天夜里厢，从7点钟快开始，马路浪厢乘风凉人一眼眼多起来，一直到9点钟快开始少下去，天气风凉，人散勒早，天气闷热，12点钟还有人勒拉荡马路。西瓜摊一般坚持到10点钟快，象棋摊就难讲了，碰到钉头对铁头，有辰光到11点钟还勒拉着，旁边看格人老早回去睏觉了，剩下来伊拉两个人，一对老朋友，老冤家，老活宝。
    等人走了差不多了，路面冷却下来，马路安静下来，一天也就宣告要结束了。对所有生活了热浪滚滚大城市里格人来讲，也就算又熬过了一天。冷却下来格路面，明朝还要再经受火辣辣太阳格暴晒。只希望秋天快点来啊！
（2012.7.27.）