俗话讲，靠山吃山，靠海吃海。阿拉靠海的宁波人，吹的是海风，吃的是海鲜，讲闲话当然也免不了有“海鲜味”啦。

         http://fishery.aweb.com.cn/UploadFiles/2007662925988.jpg

    小辰光，老老听大人是介话：“带鱼吃肚皮，闲话讲道理。”我有眼勿明白：这吃带鱼同讲道理有啥关系啊？难道勿吃带鱼就可以勿讲道理吗？再说，这带鱼的肚皮总归带眼肚肠的苦味，还勿如带鱼背脊好吃，为啥大人们要介讲呢？后来长大了，读了点书，我才明白，这是宁波人讲闲话的一种修辞艺术，类似于中国古诗中常用的“比兴”手法，也就是所谓“解物表意、借景寄情”。因为阿拉宁波带鱼多，宁波人吃惯了带鱼，所以，老宁波为了表达“闲话讲道理”这个意思，借一句“带鱼吃肚皮”来做“引子”，是再自然勿过了。

                       http://www.tw128.com/UpLoadPic/2006101792133718.jpg 

    宁波勿但带鱼多，闲早子黄鱼也“行（音“杭”）阵行市”。老宁波统晓得，“春水勿离山头，黄鱼勿离滩头。”一讲到宁波菜，第一就是“大汤黄鱼”，也就是咸齑大黄鱼。宁波传统的十大名菜中，用黄鱼做的就占了四只，除了大汤黄鱼外，还有海参黄鱼、苔菜拖黄鱼和腐皮包黄鱼，说明阿拉宁波人顶欢喜吃黄鱼了。来勿及吃，还要腌腌其做咸黄鱼，晒晒其做黄鱼鲞。黄鱼同阿拉宁波人生活的关系介密切，所以宁波老话中同黄鱼搭界的蛮多咯。

    脑袋生勒大，就叫其“大头黄鱼”；三日两头生病，就叫其“生病黄鱼”。

    窝工呒告生活好做，或者偷懒睏觉，就讲该人来的“晒鲞”；事体多勒要命，恨勿得分身去做，就讲该人要“掰（音如“拍”）鲞”咧。

    大家一起出力，有人独占好处，叫做“小黄鱼独吞”；汽车半路搭客，司机私落票款：叫做“抲黄鱼”。

    那种到处都有的脚踏三轮车，别地方的人勿是叫其三轮车，就是叫其运货车，只有阿拉宁波人叫其“黄鱼车”，侬讲海鲜味浓伐？勿用讲，这种车子闲早子在宁波一定是运黄鱼派用场咯，只有黄鱼多了“造反”的地方，才会有这种介名字。虽然现在正宗的黄鱼越来越少，黄鱼车也老早百年改了行，不过，勿管其是运西瓜，还是车冰箱，或者乘人，宁波人还是叫其“黄鱼车”。

    还有，老底子宁波人欢喜把金条比喻为黄鱼，10两重一条的是“大黄鱼”，1两重一条的是“小黄鱼”。我来的忖啦，闲早子黄鱼多，和总透骨新鲜、像金子介铮骨斯亮咯，所以会有这种比喻；如话像现在有种介涂黄粉“美容”过的“黄鱼”，是绝对勿像金条咯。

    侬看，单单是一样黄鱼，就有介许多花头。阿拉再来讲眼别样的东西。

    譬如，北方人说，“这小子吃里扒外”；宁波人讲，“鳓鱼骨头里戳出”。如话从来呒吃过鳓鱼，咋会忖勒出介贴肉的比喻？

    又譬如，北方人说，“天塌下来有高个子顶着”；宁波人讲，“桥倒压勿煞差鱼”。意思差勿多，不过，阿拉宁波老话更加幽默。

形容词吊儿郎当、死样怪气，就讲该人“翻白”咧——“白”指鱼的肚皮，“翻白”就是鱼肚皮朝上，勿会动咧。多少形象！多少生动！

    形容办事糊涂、脑髓粉燥，就讲该人是“买来海蜒去放生”——海蜒本来就是晒干咯，再去放生，勿是呆大吗？

    警戒做事体勿顾后果——“拼死吃河豚”；谴责做人手段毒辣——“挖人家鱼鳃”；嘲笑呒没头脑——“头呒埭，蜘蛛会当蟹”；讽刺只讲勿做——“讲讲神仙阿伯，做做死蟹一只”……

    此外，“虎鱼方方，毒箭难防”；“臭鱼烂虾，送命冤家”；“蟹有蟹路，虾有虾路”；“大蟹勿如小蟹乖，小蟹打洞会转弯”……诸如此类的谚语、俗话交关多咧。

    如话讲，上面介许多闲话基本上是来的打比方、讲事理；格末，下面一眼闲话就是直接描写阿拉宁波海产的丰富了：

             清明三月节，乌贼呒处叠。

             四月月半潮，黄鱼满船摇。

             菜花子结龙头，小黄鱼结蓬头。

             五月十三鳓鱼会，日里勿会夜里会。

             八月蛏，一根筋；八月鳎，壮如鸭。

             西风起，蟹脚痒，浪打芦根虾打墙。

             小黄鱼抲来，大黄鱼叫来，乌贼摇来，带鱼冻来……

    真道话是生猛海鲜，味道交关赞！（作者：甬上报人 桂晓燕）