有句老古閒话讲得是邪气好呃，曰：“一方水土养育一方人。”勒拉覅同呃地域里向，就会得有覅同呃方言文化，“理发”也同样是迭恁样子呃。首先要去讲清爽呃一桩事体就是——勒拉北方地区，或者国语閒话当中“理发”迭嗰词语，到嘞上海方言閒话当中畀叫做“剃头发”。还有呃就是——国语閒话当中呃“理发店”，一律侪畀叫做“剃头店”。上海人对于理发人员，覅管是男性还是女性，一律侪叫做“剃头师傅”。

勒拉自家人生旅途呃全过程当中，是有得交关多呃、最最重要呃头等大事，勒拉其中之一就是属于剃头发迭桩事体嘞。除忒自家勒拉生毛病呃辰光，可以任由医生摆弄以外，也只有勒拉剃头发呃辰光，自家僎会心甘情愿呃、覅限辰光呃任由剃头师傅摆弄，僎覅会得去生气。

至今还恁清楚呃去记得，勒拉笔者就读小学呃辰光、勒拉某趟仔上历史课呃辰光，曾经还读到过迭恁一段历史史实唻，当吾伲国家最后一嗰封建王朝清朝入关呃辰光，对于汉族人呃发型是邪气覅大满意呃，一律要求所有呃汉族老百姓侪要去剃发易服，强迫汉族老百姓去仿照满族人习惯剃头发呃法令，满族男人勒拉剃头发呃辰光，要求头发是要去剃忒前额搭四周围呃，还要要求留存头发编织成辫子垂放勒拉后脑勺，而且大家侪要去遵守迭道法令呃。凡是留发者覅准留头，留头者覅准留发……自从迭道剃头发呃法令畀颁布以后，以及还要强制性去执行呃缘故，覅单单是加剧嘞清初民族之间呃矛盾，而且还遭受到广大汉族老百姓呃极力反对搭反抗，一致侪是认为：身体发肤，受之爷娘，覅敢毁伤，乃是孝之始也。触发嘞江南地区江阴、嘉定、苏州等老百姓呃抗争，有得交关多呃汉族老百姓誓死侪覅顺从，伊拉侪是付出嘞血呃代价。

因为自家欢喜阅读呃缘故，曾读到过一篇理发趣闻。至于文章呃作者是啥人已记覅清爽嘞，只恁依稀记得文章勒拉讲北京人是哪恁去剃头发呃，还讲到勒拉北京剃头发是有得一眼眼区别呃，还要去区分啥呃“男子部”搭“女子部”唻。本人是土身土长呃上海人，勒拉吾伲城市是覅会得迭恁样子唻细分分清爽呃，男搭女是混合勒拉一道剃头发呃。

本人是出生勒拉上嗰世纪70年代呃末期，畀大家称之为“70后”， 依旧还恁够清楚呃去记得，勒拉本人上小学呃辰光，每趟仔去剃头店剃头发呃辰光，呒得覅排队呃，而且每趟仔眼扳数侪要去排队呃。只畀过，勒拉排队呃辰光方面少许有得一眼眼差异而已，人唻得多呃辰光，排队就会排得长一眼眼，人少呃辰光，排队呃辰光自然会得少一眼眼。

勒拉本人呃小辰光，尤其是对于吾伲还呒成年、勒拉就读中小学呃小男囡头唻讲伐，剃头发呃发型基本哴向侪是以板寸头为主呃，只要是剃发到耳朵根以上，还只要是做到整整齐齐搭干干净净就可以嘞。

就勒拉掰搿呃辰光里向，吾伲为啥侪是要去剃迭嗰头型呢？！僎是因为国家搭个人还侪是处勒拉计划经济呃年代里向，每家每户呃经济收入，覅单单是相差无几差大覅多呃，还侪是因为是爷娘要求吾伲迭恁样子去做呃。如果讲，一样去剃头发，每趟仔侪是去剃一嗰板寸头呃閒话，就可以减少去剃头店呃趟数，多多少少就好为屋里厢省一眼铜钿。

仍然难以去忘记忒呃一桩事体就是——勒拉掰搿年代走过唻呃男小囡搭女小囡，基本哴向勒拉头发里向侪是会得去生过名字叫做“老白虱”迭样么事呃。噶末，閒话又要去讲回唻嘞，啥呃又畀叫做“老白虱”呢？！其实啦，伊是一嗰沪语方言俚语词语哦，乃伊翻译成普通话呃意思就是指“虱子”，勒拉头发呃里向生出唻各种各样呃虱子。今早仔呃小囡，覅管是男小囡，还是女小囡，基本哴向已经呒得人再去生过虱子哦。

本人勒拉掰搿辰光、勒拉头发里向也同样是生过老白虱迭样么事呃，记得生老白虱呃辰光，自家还勒拉读小学三年级，而且辰光还是接近夏季快要放暑假呃辰光。勒拉当时是呒其他办法呃，也呒得药物治疗法呃，唯一可行呃一嗰办法，那就是——毫扫去剃头店畀头发剃剃干净。

还记得是母亲陪吾去剃头店剃头发呃，寻觅到好几爿剃头店，剃头师傅侪覅愿剃迭种头发，就因为剃头师傅听到头发里有老白虱。老白虱迭种么事会传染畀其他人呃，伊拉就生怕剃过迭种头发以后，害怕勒拉剃头工具上头也沾染老白虱，覅管哪恁去清理，也是清理覅清爽呃，一旦传染畀其他顾客，是覅得了呃一桩大事体，顾客会寻剃头师傅吼水赔铜钿呃，像迭种得覅偿失呃事体，自然是覅太愿意、覅肯去操作！

最后，畀吾伲觅到一家离本人学堂有得半公里之远呃一爿老式理发店，里向呃一位老师傅是愿意剃迭种头发呃，当伊向吾伲询问是否要汏头时，母亲邪气知趣呃对剃头师傅回答道：“恁够帮忙剃一下头发已算是牢好勒，汏头发迭桩事剃还是算嘞吧，吾伲自家回去汏头发！”……

勒拉通常情况下头唻讲伐，剃头店里向会得勒拉墙角边哴向，摆放好一条条长凳子，前头呃顾客勒拉剃头发，后头那些还呒得轮到剃头发呃顾客会得坐勒拉长凳上头等待。勒拉等待呃辰光，剃头师傅还会得送上人民日报、解放日报、文汇报搭新民晚报等各种“申报纸”让伊拉去翻阅。【备注：老上海人畀各种报纸一律侪叫做“申报纸”。】当轮到自家去剃头发呃辰光，便会得邪气自觉呃畀报刊让畀后头呃顾客翻阅。

勒拉掰搿辰光里向，覅管剃头店店面面积呃大小有得多少，勒拉剃头店里向还会得专门去开辟出一只小小呃角落头，就勒拉角落头呃里厢，侪是有得书报架子呃，而且勒拉交关长呃一段辰光里向，书报架子侪是木头制作而成呃，到嘞后末唻僎畀替换成为不锈钢或铝合金制呃。

噶末，对于像笔者迭恁一嗰男小囡唻讲，哪恁好去消磨忒排队搭等待呃辰光呢？！最最好呃办法就是——去观看男人剃头发呃程序。

同样是勒拉掰搿辰光里向，对于那些成年男人唻讲伐，剃头发呃辰光，勒拉通常情况下头唻讲伐，是有得三道程序呃，伊拉分别就是剃头【发】、汏头【发】搭刮【胡子】。尤其是那些年纪已经达到中年以上呃男人唻讲伐，如果只是去剃一嗰板寸头呃閒话，同样是迭嗰三道程序哦！【备注：上海方言閒话当中，欢喜畀“洗头发”叫做“汏头发”。】

对于成年男子唻讲，勒拉剃头发呃三道程序当中，最最重要呃一道程序就是——刮胡子迭道程序嘞！剃头师傅会率先畀大扶手靠背椅斜放【备注：大约呈现呃是135度角。】并插上插销固定牢，然后再用软毛刷沾上事先调制好呃肥皂泡沫涂满面孔，接着用一条潽潽热呃毛巾敷勒拉面孔呃上头，辰光大约摸是勒拉三、四分钟左右，伊拉呃目的是为嘞让胡子变得柔软，方便剃头师傅刮胡子。勒拉热敷呃同时，剃头师傅还会得畀一把锃锃亮呃剃须刀，放勒拉一块牛皮布上头唻回嚓、嚓呃磨几下，最后僎沙沙呃刮起胡须唻。优美呃姿势搭熟练呃动作，令吾一直呒办法忘记忒。

今早仔，剃头发呃方式方法，搭老底子完完全全是覅大一样呃，老早仔吾伲叫做“某某剃头店”，历史呃车轮走到嘞今朝仔，一律侪畀升级叫做为“某某美容美发厅【院】”，原先吾伲对于理发人员一律叫做“剃头师傅”，到嘞今早仔，则一律畀更改为美容美发师或造型师，还去推出嘞星级美容美发厅【院】搭星级美容美发师或造型师。服务呃手段搭服务呃内容，也已经是改变忒嘞，已经覅再是仅限于老底子呃老三样“洗”、“理”搭“刮”迭嗰三种手段嘞，已经是变得五花八门名目繁多。有得：造型设计、除皱纹、吸油脂、付里子烫发等等……真可以讲是不胜枚举唻！

【备注：：文章为作者原创；各种老上海理发店和理发工具均来源于网络上；：感谢原创图片。】

杜老倌侠客居（陆伟）写于2009年04月17日星期五晚上