笔者出生于上嗰世纪70年代末期，被大家称之为“70后”，勒拉笔者少年时期、勒拉读小学呃辰光，最喜欢喫呃小菜之一就是要算西红柿炒鸡蛋了，勒拉笔者所在呃城市上海，上海人还欢喜把“西红柿”称之为“番茄”了，而且到了今朝仔，迭种习惯依旧呒去改变。

笔者对于西红柿是有得邪气邪气深呃感情呃，就算到了今朝仔依然能够清楚呃去记得，勒拉笔者呃儿童时期跟少年时期，由于吾伲国家还处勒拉计划经济时期，去购买任何一样么事，都要凭各类票证供应，比方讲：有“糖票”、“香烟票”、“油票”等等……爷娘属于工薪阶层，因此收入是邪气有限呃，覅单单是迭恁样子哦，勒拉掰搿辰光，每家人家呃收入水平，同样是相差无几呃，再加之水果呃价钿是邪气贵呃，恁够喫到水果呃品种跟机会，也一样是邪气少呃，只有极少数家庭条件交关好呃人家才恁喫得起水果哦。相比之下唻讲，西红柿价钿就要比水果价钿来得便宜得交关多哩，真可以去讲是经济实惠，勒拉掰搿辰光、勒拉吾伲屋里厢，西红柿既要去担当蔬菜迭嗰主角，勒拉更加多呃辰光里向，伊还要去附带承担水果迭嗰配角！

还有就是，勒拉掰搿辰光，勿是侬想去喫喫西红柿，就恁去喫到西红柿哦，眼扳数要等到炎炎呃夏日季节到唻了以后，侪有可能去喫到西红柿啊。每当到了炎炎呃夏日季节，姆妈便会得去买西红柿畀吾伲哥俩【注解：哥哥和笔者】当水果喫，基本哴向是一天一只。

另外，勒拉笔者所在呃城市，有关于西红柿呃喫法勿是邪气多呃，无外乎就有得迭嗰四种喫法，除忒笔者上面提到呃西红柿炒鸡蛋之外，还有三种喫法就是——西红柿洋山芋蛋汤、糖拌西红柿跟做西餐沙拉呃辰光放些西红柿。【备注：勒拉上海马铃薯被称之为洋山芋。】

拌了糖呃西红柿，假使恁够去冰镇一下，噶末伊嗰米道就会得更加好、喫起来更加变得美味哦！屋里厢有井水呃人家，可以放到井水里向，有得冰箱呃人家，可以放到冰箱里向冰一下，如果呒井水跟冰箱呃人家，可以去购买一些冰块，用冰块唻冰镇一下也覅错呃。

西红柿呃营养是交关丰富呃，伊含丰富呃维生素A、番茄红素、叶黄素、矿物质、黄酮、膳食纤维跟胡萝卜素等营养成分，迭些营养成分又是人体所需要呃，所以有得交关多家庭都欢喜喫西红柿。

有得一点同样是要去讲清爽呃，勒拉全国各地，几乎每家每户都会得做西红柿炒鸡蛋哦，但畀过，要想去做好迭道小菜也勿是邪气便当呃一桩事体，到底是先去放西红柿，还是先去炒鸡蛋，迭嗰里向还是有一眼学问呃。勒拉小辰光呃笔者，除忒欢喜喫西红柿炒鸡蛋以外，还欢喜拿西红柿用清水去冲洗一下之后，就直接拿过来当水果喫喫。只畀过，到了自家呃年龄稍长了一眼眼呃辰光，听别人家勒拉讲，现在生呃西红柿，勒拉外（表）面有毒哦（有农药），就勿大欢喜去生喫西红柿了，还有得交关长呃一段辰光里向，生西红柿一碰勿碰！

勒拉十年前头，曾经忒忒惠惠跟爷娘一道去了浦东新区孙桥农业开发区参观浏览，农业区里向所有呃西红柿都是采用无土唻培育呃，培育出唻呃各类西红柿品种，都像鹌鹑蛋一样大小，而且是勿去添加任何化肥跟农药呃，西红柿全靠各种营养液慢慢较成长起唻呃。据说迭种方式方法，是从外国引进得唻呃先进农业科学技术，各类新闻媒体，还包括央视新闻媒体在内，做了相关呃报道，还有某些外国国家呃农业科技人员跟农业方面呃科学家，也曾纷纷慕名纷至沓来，到孙桥农业开发区唻参观、学习、交流，并且还一道去搞合作开发。

勒拉老底子，只有到了炎炎呃夏日季节里向，吾伲侪可能去喫到西红柿，可以迭恁来讲，到了啥呃季节喫啥呃小菜，比方讲：冬喫萝卜春喫笋、青菜要等到冬天打过霜侪好喫……今朝仔随着科学技术勿断进步跟发展，吾伲一年四季都能喫到反季节呃蔬菜跟水果了。

今朝仔生活条件变得越来越好了，喫呃各类么事比老底子丰富得交关多了，仔细回过头来想一想，还是有眼缺陷呃，就是总觉着反季节呃蔬菜跟水果，远远勿如当季呃蔬菜跟水果要唻得好喫得多。

科技呃力量是呒穷尽呃，西红柿只畀过是众多科学技术进步中呃一嗰缩影。今朝仔因为科学技术呃进步跟发展，使得吾伲呃生活方式变得越来越美好了，所以吾伲要去感谢科学技术呃进步跟发展！

【备注：文章为作者原创；各类西红柿图片均来源于网络上；感谢原创图片。】

杜老倌侠客居（陆伟）写于2011年07月16日星期六上午