勒辣上海呃各类方言土语当中，有的两组词汇意思是一样呃，伊拉分别是“劈硬柴”和“AA制”，“劈硬柴”迭三个字呃沪语读音应该是：“pi eng za”。勒辣讲迭呃两组词汇之前，必须要来讲一讲各位学者、外省市人是哪能来看待上海迭座城市、对上海人有啥看法！

余秋雨教授曾经撰写过《上海人》一文，对于上海人伊是迭能样子来讲呃，做了精辟的分析，笔者择取了狭气有特色的那一部分。

伊是迭能样子来写呃，伊讲：“外省市人始终对上海没啥呃好印象，认为上海人太精明、骄傲、会盘算、能说会道、自由散漫、不厚道、排外、狭气看覅起领导、缺少政治热情、没的集体观念、对人冷淡、吝啬、自私、赶时髦、浮滑、好标新立异、琐碎，世俗气。”

伊还讲到：“假使要交朋友呃闲话，千万覅要跟上海人去交朋友。上海人出手一眼呃不够大方，一旦碰到了酒席宴会时，台面上是吃不了几杯老酒呃，跟伊拉谈一点山海经还要多动几分脑筋，到伊拉屋里去住更是要命，既拥挤不堪又处处讲究。这样的朋友哪能交得？”

台湾女作家龙应台曾经以调侃方式撰写过《啊，上海男人》一文，被刊登勒辣1997年1月7日的《文汇报·笔会》中，伊大致意思是讲，上海男人是全世界最最稀有品种，对老婆过分迁就，做任何一桩事体，都是以老婆高不高兴、满不满意为主，处处替老婆及老婆呃屋里人着想，只要是老婆讲了一，伊就不敢讲二，即便是老婆放了一只屁，伊也会讲是香的与好的，屋里向任何一桩家务事体，呃包括“买汏烧”在内，全部都由男人承包去做就好了，女人只要动一动口舌就可以了……自从迭篇文章刊登出来以后，还引发了轩然大波，声讨呃浪潮也是一浪高过一浪，既有打电话到报社声讨作者的，也有作家声讨作者的，有很多大陆地区既会写作，又熟知上海历史文化及各类人事物情呃作家，纷纷群起而攻之，认为龙应台既勒辣“侮蔑”上海男人，同时又勒辣丑化上海男人，讲上海男人才是真正“大丈夫”云云。

勒辣覅少东北大老爷们呃眼睛里向，对于上海人可以讲是“气就不打一处来”，认为上海（男）人就是属于“狗皮到灶”“小家败气”一类人，狭气欢喜斤斤计较特别小气，就覅像一个纯（老）爷们。

东北人还讲了一则故事，说曾经看到有四位教授模样呃上海男人，勒辣一家全国闻名呃小吃店，点了一份狭气有当地特色呃小笼，而且还是四个人合点一份小笼来尝尝米道，等到小笼吃好以后，要付钞票呃辰光，每一个人就付自家吃掉的一份铜钿，绝对覅会多出一分。

东北人继续讲下去，曰道：“侬看阿拉东北人就是跟上海男人覅大一样，就显得豪爽好客落落大方，只要侬到东北来、只要是东北人请客吃饭，绝对覅会让客人来买单，不论是勒辣屋里向请客吃饭，还是去馆子里向请客吃饭，基本哴向整桌人只要盯牢其中一只菜吃就好了，而且不管吃多少辰光，‘永远’覅会得让迭只小菜‘见底’。假使有两个男人扭打勒辣一道，极有可能是互相抢着要去买单，勒辣东北啥人今朝是最终买单呃人，是狭气有面子扎台型呃人！”……

东北人光光请客吃小菜还是覅算啥、还只好算勒辣其次，最最主要呃就是--吃老酒狭气结棍，而且是男女吃老酒一样是狭气结棍。东北人要么覅吃老酒，一旦吃起了老酒，基本哴向只吃度数狭气高呃高粱酒，不但是自家要吃交交关关，会得一杯一杯复一杯，还要不停地劝酒、灌酒，要求客人也要像伊拉吃的一样多，东北人最好客人吃醉特，客人醉特了以后心里才觉得心满意足，要不然伊拉就会觉得，不是客人看覅起伊拉，就是迭顿饭没请客好，是没面子呃一桩事体。

正所谓一方水土养育一方人，实际哴向东北地区呃人，对上海迭座城市文化及城市里向呃人，覅是狭气了解熟悉，因此产生了一定的误解。殊不知，勒辣上海人呃眼睛里向，样样事体做得都像小葱拌豆腐一样一清二楚清清爽爽，才是真正呃覅计较。上海人还信奉迭能一条原则，阿拉坚决覅会来揩侬一分油，侬呃覅要来沾我半分便宜！

还有，上海人行为方式，跟其他地方人绝对是覅大一样呃，有着天壤之别，啥人也覅会觉得“请客”吃饭，是“老有面子”呃一桩事体，只有那些懂得吃啥呃好么事、真正会得吃呃人、吃得既有礼又得体呃人，才好算得上是真正“有面子”呃人。假使万不得已要请客吃饭了，点了一桌子小菜吃覅光呃闲话，浪费了交交关关，就会被别人家“看覅起”，还要笑伊是一个覅懂生活呃人、吃得“不懂经”！

除特“婚宴”、“寿宴”以及“公款吃喝”以外，上海人做每一桩事体，狭气欢喜讲究“清清爽爽”，一分一厘也要算的清爽没老坑，聚会吃饭吃老酒呃辰光也是如此，算清爽了以后，大家出自家应该出的那一份子就好了，啥人呃覅会得少，啥人呃覅会得多。因为上海人觉得，迭能样子去做，有的三种好处，其一是，亲朋好友之间才覅会得伤及到感情；其二是，覅大会得因经济条件好与差，发生（产生）侬看覅起吾，吾看覅起侬呃情况；其三是，上海人快节奏效率狭气高，亲朋好友之间聚会碰一趟头覅大容易，每一趟聚会呃辰光，上一趟参加呃人，下一趟就覅一定表示伊还能够参加，假使讲伊覅能参加聚会，又要叫伊出份子，覅是让伊“奥门痛”了吗，最最好一个办法就是，凡是今朝来参加聚会呃人，大家互相“劈硬柴”，执行“AA制”政策，相互之间就覅会有心理上呃负担，避免产生“欠人一顿”呃感觉！

“劈硬柴”和“AA制”迭呃两组词汇意思是一样呃，都是讲一是一两是两，清清爽爽覅拖泥带水，有得任何一桩事体，需要出铜钿凑份子，所有人平均分摊。只不过，“劈硬柴”是一种较老式讲法，老一派上海人讲的交关多，至少是笔者爷爷一辈呃人要讲得多一眼，“AA制”是后来才开始流行起来呃，年轻一辈人使用频率来的多一眼。

有一些人认为“劈硬柴”迭三个字最最正确呃写法，应该写作“劈硬材”，而覅是写作“劈硬柴”，实际哴向迭些人都覅是最最正宗上海人，都是自家按照读音臆想出来呃词语。其实勒辣上海闲话当中，“柴”和“材”的发音绝对是不相同呃，前者是齿尖发声，同上海闲话当中“惹”字发音是一样呃；然而，后者却是开口音，同上海闲话当中“赚”字发音是一样呃；“惹”、“赚”两个音勒辣普通话中相去有的多远，“柴”和“材”勒辣上海闲话中发音也有多远。

还有覅少人认为，上海自从开埠以来，就逐渐变得开放洋派了，学外国人呃各类么事就交关多，尤其是学英文呃人最最多，因此“劈硬柴”迭三个字很有可能是从英语当中学的来呃，实际哴向凡是有迭种想法呃人都错特了。“劈硬柴”首先是由老底子一些老饕吃客们发明出来呃，辰光一长就被大家推而广之了。每趟要聚会时，就推荐一人做东，剩下来呃人各出等额银钱，如果有超出部分，就由做东之人付铜钿，每趟做东之人都是覅相同呃，覅是事先约定好，就是通过抽签来决定做东之人，做东之人还要选好地方并负责点小菜。迭能样子呃分法，既可以保证做东之人，有的一定的、足够的积极性，又可以保证做东之人，覅会面临狭气大呃财政压力，的确是一个好办法！

格么，“AA制”又是哪能来呃呢？！伊呃出处有的多种讲法，最最集中呃讲法，有的如下四种，笔者就分别来加以详细讲讲清爽。

第一种是：“劈硬柴”和“AA制”都是从英文语词当中翻译过来呃，因为勒辣民国时期老上海人会得讲一些洋泾浜英文，嘴巴里向叫“half and half”，“half”中文意思是指“一半”呃意思，“half and half”自然是指两个人各付一半啦。比较有趣呃讲法就是，今朝覅管聚会有得多少人，仍旧可以采用“half and half”，上海人就用上海闲话读音读做为“哈斧--哈斧”，当然是指“劈硬柴”和“AA制”。

第二种是：“劈硬柴”和“AA制”都来源于英文词语“Algebraic Average”的缩写，伊有的两种讲法，第一种是讲“代数平均”；第二种是讲“同样一桩事体由两个人一道做特了”；两种讲法都包含了“等分”呃意思，极有可能成为“劈硬柴”和“AA制”的来历。

第三是：还有一些人勒辣讲，“劈硬柴”和“AA制”，极有可能是上海人从拉丁文当中学的来呃，是众多解释呃来源之一，因为勒辣西医当中某些处方用药，就用拉丁文来标明剂量呃，“aa(ana)”现在勒辣处方上还是能够看的到呃，伊所要表达呃意思就是指“等分”。

第四是：有覅少专家学者认为，勒辣英语词语当中，实际哴向并么“AA制”迭种讲法，比较正式的、最为准确的讲法就是用--“Let's split”，其中“split”中文含义就是指“分开”的意思，是要分啥么事呢？！当然是分账单哦，勒辣英语语词里向，讲得最最多呃是“Let's go Dutch”，翻译成中文意思是讲：“让吾伲一道来做个荷兰人伐！”

为啥要采用“Let's go Dutch”，据说荷兰是世界上最早开展贸易呃国家，荷兰人又是全欧洲地区最最抠门小气呃人，又据传说最早采用“AA制”呃方法，就是由荷兰的阿姆斯特丹发明出来呃，而且还发扬光大到了全世界。因为伊得是一个大港口，往来呃客商络绎不绝，今朝跟侬聚餐，就覅晓得下一趟是否还能碰得到，所以采用“分账”方式是最最公平、最最好呃方法，辰光一长久而久之，荷兰人就以“AA制”闻名全世界，大家通通就把“分账制”叫做“go Dutch”了。

有的各类媒体曾经报道过一则新闻，来了一趟关于谈恋爱呃全国性调查与访问（问卷），讲从谈恋爱到结婚组成家庭，是否愿意采用“劈硬柴”和“AA制”呃方式方法？！由于交关人受到了传统文化呃影响，伊拉认为谈恋爱期间，男人付铜钿自然要比女方来的多，比率居然要高达56.5%；有的26.1%的人认为，勒辣谈恋爱期间，所有开销应该全部由男方“承包”特；有的45.2%的男人认为，男人多支出，就能“证明自家经济交关独立”；有的29.9%的人表示只要是双方关系好 ，“无所谓”啥人买单；只有10.2%的人支持“劈硬柴”和“AA制”。

而且居住勒辣大城市里向呃人，绝大多数人都有的迭种想法。笔者居住的上海迭座城市，谈朋友一样是迭能样子呃。上海小姑娘一旦到了谈朋友年龄，每谈一趟朋友，第一趟交往，覅管成功与否，多数是由男方来挺分买单呃，如果有的女方表示也愿意买单，采用“劈硬柴”和“AA制”，绝大多数意思是表示，侬覅是吾碗里向要的那份小菜，吾对侬一眼感觉呃没得，吾伲俩个人奥斯两八开就此结束伐。

千万覅要一味地认为，上海人只会“劈硬柴”和“AA制”，实际哴向，勒辣某些上海人当中，也有“不等分”呃吃法。笔者读大学本科期间，结交了一帮子好朋友，至今已经有十六年了，每年都要聚会好几趟，讲好采用“劈硬柴”和“AA制”的，有的好几趟酒宴结束以后就完全变样了，覅是由老班长张孝光压压较全买单了，就是由年龄最大呃老大哥文小明，去寻找各式各样呃因头，买了一趟又趟单。

个人是迭能认为呃，既然全部是自家吃自家，既用覅着去摆啥呃阔气，也覅要去铺张浪费，每当酒宴聚会，大家采用“劈硬柴”和“AA制”，吃得了多少就点多少，既经济又实惠，何乐而覅为呢？！

【备注：文章为作者原创；各类上海风景和聚会吃饭图片均来源于网络上；感谢原创图片。】

杜老倌侠客居（陆伟）写于2019年05月30日星期四晚上