加载中…黃子華 多得你唔少
(2014-11-11 12:45:17)
标签：
黄子华 |
分类： 子華心路專訪 |
（原載《東週刊》，期目不詳，根據內容推測為1999年的文章）
子華應邀出席我們香港大學利瑪竇宿舍的高桌晚宴，用餐前他在臺上播放了一段美國棟篤笑的錄音帶，錄音帶中雖然傳來陣陣笑聲，但現場的同學卻毫無反應。子華當場注釋：我久聞HKU是最高等學府，英語水準好高。
這個笑話令到同學很不快，大家以沉默作反抗，這種抗議方式比噓聲更恐怖。
七年後重提此事，子華說：「我好唔開心，你地好冇禮貌。」 自此之後，子華再沒有出席類似的活動。
今日，想對子華說句多謝。因為你令人難堪的笑話，叫我地認識自己嘅傲慢與愚昧。以前系，而家都系。
東：做咗咁耐棟篤笑，究竟你最想講乜？
黃：我最終最想講嘅話題系人生的意義。每一日如何活？跟住去邊度？我以前冇真正咁講過呢個話題，希望呢次《拾下拾下拾年棟篤笑》能夠講到。
東：呢十年你嘅人生有乜轉變？
黃：好勝心少咗，以前我以勝者為先作判斷，我要贏，要做乜乜要做物物。又或者成日怕自己做唔到乜嘢。其實，咁諗真系好傻，呢個世界Anything is possible and everything is impossible。最重要系你真系要做D乜嘢，其他一切原來都不在你估計掌握之列。
近呢幾年我有時間不多的感覺，覺得系時候要做D嘢，唔可以再浪費時間。又唔系話真系要做D嘢出嚟，而系可能有半年乜都唔好做，總之要搵出如何活好每一日嘅方法。
東：棟篤笑系咪最能表達你自己理想嘅媒界？
黃：用咩方法都唔緊要，只要滿足到我嘅創作欲就得。棟篤笑嘅好處系：我身無分文都可以做。做唔到大場，做細場，一萬人、五千、五百都可以做，去間bar都可以做，個問題系你仲要出去搵嘢做啫。
冇話out唔out
東：有冇擔心過自己有一日會好out，再冇創作能力？
黃：out咪諗Dout嘅嘢囉，專諗out嘅，in D嘅就唔好諗，咁都系一種創作嚟嘎。
其實out只系對市場嘅指標，除非你條命玩完你就真系out喇，你一日唔死，你都要食飯、交租，做人冇得out。out系市場話你知唔再歡迎你，你呢只嘢搵唔到錢。問題系你能唔能夠覺得自己嘅生活賦予你夠嘅意義，以致你可創作。好似我嗰次喺油麻地（見到有人）盤咗個好高嘅頭，十足幾十年前嘅女人，你覺得佢out啫，但佢都唔知活得幾實在。我哋面對系market之嘛，如果冇market，呢個世界會多姿多采好多。
有人話日本依家只興呢種衫，我去日本不知幾多style，有軍look、英國look、rave look、呢派唔可以話嗰派out，有人到死嗰日都唔會著你話興嗰D衫。所以一切系視乎社會嘅空間。
黃：當我入電視時，好得人驚，問我：你捱唔捱得住呀子華？兩個意思：1. 體力上；2. 接唔接受得到咁流水作業呀？佢哋以為我拍慣電影好巴閉，殊不知我系拍過好多比電視更差嘅電影，我不知幾ready。大家都不知道依家電影幾坎坷，以前就話拍電視辛苦，訓練到你拍電影，依家真系調番轉。
東：依家拍戲系咪淨系為錢？
黃：我一直嘅心願系做演員，第一份工作系喺香港話劇團做演員，電影有得我做我點會唔做？我爭取任何機會去做，希望有一日我可以做到一個角色有人認同，以致我有機會喺D更好質素嘅電影出現。
依家當然已經唔系咁諗。基本上我已經放棄，放棄「我會有運行」呢個諗法，我唔會覺得拍到D特別有質素嘅，我唔會覺得嗰D人會對我感興趣。我唔放棄嘅只有：希望我可以導演一部。
做導演系一個遊戲
黃：拍電影就好似去歐洲旅行，一世人點都要去一次。去完返嚟，你可能會話「扯，D嘢咁貴！」咁系另一回事，但點都要去遊一次埠，系應該去經歷一下嘅。對我而言，做導演系一個遊戲。
東：喺娛樂圈咁耐，仲有冇乜嘢你會執著？
黃：質素。我最近一次發脾氣都系因為呢樣嘢。做嘢點可以咁嘎？我最初返香港，會講哥普拉嘅戲，入咗個圈D人會話「你都唔明，哥普拉一個鏡頭等於我哋拍一套戲」，慢慢就會有太多諒解，「呢套戲都唔錯呀，嗱，唔好講其他，呢場戲真系抵死，淨系香港人肉侏羅紀先可以做到。」
因為諒解，就唔知自己要求D乜，然後你會冇咗夢想。
結果，我拍戲咁耐，差唔多次次都系諗：「點樣可以將自己嘅角色，救好佢呢？」系「救」呀！唔好諗套戲喇，起碼救咗自己個角色先，做出嚟好好睇睇，後來自己都救唔到自己。
好！再嚟一次！
說到這裡，大家都有難言的悲哀。此時，子華送上一則動人故事。
「我記得拍《人間色相》一場戲，喺天臺拍嘅，拍完就落下面打燈，但當時我同導演同攝影講，我覺得自己做得唔系幾好，可唔可以再嚟一次？『好，演員有要求，好再嚟一次。拍完，我又同導演講，可唔可以再嚟多次呀？『好，演員有要求，我哋再一次。』呢一剎那，真系美好。」
導演系張志成，攝影系關柏（煊）。
「我要多謝呢兩個人，送俾我電影生涯裡最美麗嘅一個片段。」
喜欢
0
赠金笔