小明 and NADIA

明: 小明 NA: NADIA

小明獨自坐在客廳, 聽著音樂, Bach 的 Air on the G String 繼續播放。 NADIA 從睡房走出, 正趕著出門。)

明: 黎, 聽下—

NA: 唔得啊! 我就黎遲到喇

明: 好重要架, 聽下

NA: 乜嘢啊?

(她聽了一會)

NA: 你鐘意啊?

明: 十分!

NA: 係巴哈啊!

明: 卑鄙下流

NA: 咩話?

明: 抄人

NA: 巴哈抄人?

明: 仲要係一粒一粒音咁抄, 抄得唔好先死啊! 我比個原裝正版你聽下, 一隊鬼佬樂隊黎架! 林子祥都唱

過架!

(他走到 CD 機面前, NADIA 走到他旁邊)

NA: okay, 自己小心啲

(她趕快及輕輕地吻了小明的臉頰一下, 小明不以為意) 明: (輕聲地) 你都係

NA: 今日剎科啊, 不如你都黎 ya

明: 唔啦! 我地啲幕後寫手留返係幕後好啲

(電話響起)

NA: 如果係佢地嘅話, 話我走左

明: (拿起聽筒) 佢已經走左喇, 你等陣… (對 NADIA) 你朋友啊! (NADIA 有點猶豫) 黎啊  (小明把聽筒拿 給 NADIA)

NA: (拿起聽筒) 喂, 風…係啊…唔…我遲咋 MA… 係喇…得喇, 知喇, 好啦…唔…bye bye (她掛了線) (此時小明走到盆栽面前, 拔了其中一塊葉子出來吃, 他感到無所適從)

(NADIA 走到小明身後)

NA: 我愛你, 你明唔明啊?

明: 唔明

NA: 你覺得唔公平?

明: 唔覺, 我覺得係我自己…唔小心, 諗緊第二嘅嘢冇閂好度門 NA: 我會停架喇

明: 唔好為左我結束, 我都唔會叫你結束架, 我唔會架, 當你見我唔開心, 你就結束, 我就盡力開心啲, 我又唔會發難咋, 我都想像到我自己發難咋嗰陣有幾咁樣衰, 幾無聊, 姐係十足你個前夫阿 MAX 咁呢, “愛我吧! 我是那麼的痛心” , 咁樣太台灣歌啊! Yeah! 戴綠帽戴得有尊嚴, 係高難度動作, 但係事在人為, 現代婚姻唔需要再扮嘢, 愛情, 唔係私家重地閒人免進, 嗰啲叫做地產霸權

NA: 夠喇, 唔該唔好講喇

明: 你知唔知問題係咩啊? (開始哭) 因為你真係我嘅……一切, (開始平復) 姐係我寫嘢, 因為你鐘意我 寫嘢, (哈哈!) 當然, 咁都係因為咁可以支持到我地而家嘅生活啦, 唔係因為你想咁樣生活, 係因為我想 咁樣同你生活, 姐係如果唔係因為你, 我可以餐餐食罐頭, 我可以一個禮拜換一套衫, 而家因為你, 我日 日換襪, 我又搵錢, 我又幫白家傑, 將嗰啲聽到人日全身殘廢嘅廢話雕琢到只係會令人半身不遂, 令到 佢都可以成為一個作家, 好似我咁

NA: 如果你覺得你係啱嘅, 你係唔應該寫架!

明: 但係你覺得應該啊 MA, 我而家係唔可以有兩套道德標準啊! 你覺得應該就應該架喇, 姐係, 你想要,就應該要, 你想做, 係應該做, 你知嗎? 有一班人當李小龍好似神咁拜, 好似宗教一樣, 佢地愛李小龍,我愛你

NA: 咁姐係無論我做乜, 你都會原諒我啊? 姐係我係一隻自私精, 但係因為你太愛我喇, 愛到我乜嘢都 睇唔到, 係咪咁啊? 多謝你啊! 但係唔係咁樣架, 我都想覺得我係自私, 咁樣真係可以容易啲解決,

byebye 啦阿風, 我點會鐘意阿風呢? 我點會鐘意一個細路啊? 我覺得我自己真係好似…阿…嗰個叫咩 啊? 金字邊一個射字係咩字?

明: 咩字?

NA: 幅射嗰啲嘢啊!

明: 邊個射?

NA: 金字邊一個射啊你明我講緊咩啦!

明: 我兩個老婆講嘢都冇頭冇尾

NA: 我唔覺得我自私, 反而, 我覺得我自己好似有幅射啊! 我放射出去話比人聽我冇興趣, 唔好搞我,但係佢就偏偏走埋黎, 佢會走黎火車打下招呼, 咁我又會去返火車度等下佢, 咁我嗰日就會覺得開心啲,唔知係咪愛情啦……呢啲梗係愛情啦, 呢啲唔係愛情係乜嘢, 但係佢係冇取代到你個位置架! 冇人可以啊! 咁但係我又鐘意呢種感覺喎, 我第一次做成熟嗰個, 第一次做話事嗰個, 咁廣州又咁遠, 我又似有好多理由可以咁樣啊! 對唔住, 我知我係傷害到你, 但對我黎講, 我真係唔係玩架! 係重要架! 咁而家, 佢已經冇我想像中咁重要喇, 我真係覺得我自己戇居喇, 雖然係咁, 但我都唔可以當淨係睇左一場戲, 我話之佢, 飛佢就飛佢, 佢唔係咁樣架, 我唔係咁樣架! 我淨係唔想佢繼續咁鐘意我, 咁我唔需要, 再去扮成熟, 我而家係好努力咁樣去扮緊成熟架! 兩個裡面, 我要傷害一個, 我選左你, 因為, 我, 係你架!

(電話響起) 可能呢個就係我…

明: (拿起聽筒) 喂, 佢已經走— 阿 Roger 你唔好同我講咩專業啦, 你拍嗰套<</span>回歸十年>個咪成日突出黎, 仲大個曾蔭權個頭啦! (NADIA 搶了聽筒) NA: (激動地) 喂! 帶返個口罩啦真係, 你吠咩姐, 拍戲咋 MA! (她掛了線, 正想離去)

NA: byebye

明: NADIA, (停頓) 冇嘢喇

NA: 我好需要你架!

明: 我知道

NA: 你唔會比呢件事沖淡我地架 MA, 係咪?

明: 唔會沖淡架, 唔會咁平淡架… 佢一係會推去另一個極端… (溫柔地) 你幾點返? NA: 好快返

(小明點頭, NADIA 向他點頭。小明坐在梳發上, 隔了一會他走到 CD 機播放了—Procul Harum—A Whiter Shade of Pale—)

(他聆聽了一會, 走到客廳中央, 他強強顏歡笑, 直至播放到有人開始演唱的部份, 他開始收起笑臉) 明: 唔好…唔該……唔該…NO……

(燈暗, 音樂漸大)