小明 and NADIA

明: 小明 NA: NADIA

 

 

客廰│書房。

兩年後。客廳比兩年前多了一些傢俱。兩年的變化可以在小明和 NADIA 中找到, 小明閱讀時需要架上眼 鏡, 而 NADIA 把頭髮剪短了。唱片機橎著歌劇(Verdi)。小明獨自坐著, 正在閱讀劇本。

小明閱讀了一會。

NADIA 從睡房走出, 倒了一杯水給小明。

 

 

明: THANK YOU!

NA: WELCOME!

(小明喝了一口水, 把杯放下, 然後繼續閱讀, 隔了一會, 他望著 NADIA)

NA: 點啊?

明: (苦思了一會) Strauss

NA: 咩話?

明: 唔係 Strauss

NA: 我講緊喺個劇本啊!

(小明立刻看了一眼手上的劇本)

NA: (輕蔑地) Strauss,  點會係 Strauss 啊? Strauss 係講德文架, 你聽緊嘅喺義大利文啊!

明: OKAY…義大利歌劇, UM… Verdi

NA: 邊一個啊?

明: Giuseppe (小明從 NADIA 的眼神知道他答錯了) Monty, Spaghetti.

NA: 我係講緊邊一個歌劇啊……Spaghetti

明: 蝴蝶夫人!

NA: 你特登架!

明: 我認真架!

NA: 我以為過左兩年幾, 有啲嘢係可以潛移默化架!

明: 唔係…我係真係鐘意架! 只不過我係分唔到邊首打邊首姐, 姐係如嗰你聽到啲嘢唔係  “all” 就  “ai”, 兩年都唔係好長時間架咋, 事實上我隻耳仔係好過你, 你到今日都分唔到邊個係關正傑邊個係蔡國權喎!

NA: 根本冇分別!

明: 咪係囉! 咁不過各有各聽啦好嗎? 我自已聽 OKAY 架!

NA: 唔好啊

明: OKAY! 咁聽你 OKAY 嗰啲, (他哼出貝多芬第五交響樂) Da—da—da—dah…

NA: (無奈) 睇返個劇本啦好嗎?

明: (他望了一望手上的劇本) 其實你知唔知啊? 好多偉大嘅音樂家都係 B 字開頭: Beethoven, Bee Gees, Beatles, Bu….ddy Holly.

NA: 除左都係 B 字頭都冇野係一樣啊!

明: 死曬…OKAY, Bee Gees 同 Beatles 係未死曬, 但係, Buddy Holly, 撞機死架, 死曬啊! 你知唔知? 

NA: 我唔知啊! 個劇本你係咪唔睇架喇?

明: 22 歲就死左喇! 你諗下, 如果佢冇死到, 佢今日嘅成就有幾大啊! 你又諗下, 如果貝多芬係 22 歲就 撞機死, 成個世界嘅音樂史都要改寫啊! 當然啦! 連飛行史都要改寫埋!

NA: 小明啊…你睇到邊度啊?

明: 你咁緊張呢, 究竟係職業嘅需要定只不過係個人嘅興趣呢?

 

 

NA: 只不過係?

明: OKAY, OKAY… 你咁緊張係個人嘅興趣定只不過係職業嘅需要呢?

NA: 咁係邊一樣令到你 law law 亂呢?

(停頓)

明: ……唔…

NA: 我啱做嗎個角色?

明: MARY? 當然啦! 唔洗化妝

NA: OKAY! 咁我就做白家傑個戲啦! 我唔做三姊妹喇!

明: 你唔做三姊妹咁另外嗰兩姊妹點呢?

NA: 另外嗰兩個演員都大左肚…

明: 嗰啲改一兩句台詞就交代到啦!

NA: 係喇, 嗱~ 呢個劇本你係可以快啲改好嘅, 例如你一個月就搞掂, 咁我— 明: 咪住咪住, 你好似仲有一個亂倫嘅戲要搞架喎!

NA: 我都冇話做!

明: 我覺得你應該做, 呢個係英國貨, 高檔嘢啊! 十六世紀, 性與暴力, 呢啲 high class 啊!

NA: 係十八世紀啊! 同埋係廣州, 唔係英國, 我要去廣州做啊!

明: 咁北上掘金, 係大勢所趨啦!

NA: 我以為你會掛住我架! 我以為錯喇!

明: 我以為你會帶埋我去架! 我以為錯喇!

NA: 你唔會想去兩個星期廣州架!

明: 啱! 我啱先係死頂嘅, 但我真係會掛住你

NA: 點解而家係人都要北上?

明: (國語) 有追求啊! (廣東話)點啊? 喺廣州排戲?

NA: 第一個禮拜喺香港排  (指劇本)睇到邊啊?

明: 喺火車度。

“你真係特別啊阿 Bill, 你幾多歲啊?”

“20 歲, 但係我做人做得多過你一世做咁多啊!”

不如我讀出黎啦, 好嗎? 等你 feel 下, 好嗎?

NA: 你鐘意啦!

明: okay, 我行返前少少…做佢地喺火車嗰度, 好嗎?

 

 

(NADIA 點頭, 小明扮出火車的聲音)

“唔好意思, 呢度有冇人坐啊?”

“冇”

“我可唔可以坐低啊?”

“你有你嘅自由嘅”

“唔該”

咁阿 Bill 就坐喺 Mary 對面, Mary 就喺度睇緊書

“你去邊啊?”

“去香港”

“你頭先話, 你覺得我有自由, 人人都有自由--”

“你唔同意咩?”

“同意! 我地有自由做人地叫我地做嘅嘢”

“我叫阿 Bill, 你呢?”

“Mary”

“你知唔知架車幾點到香港啊?”

“大約一點半啦我估, 如果準時嘅話”

“放心! 實準時架! 因為佢地係用瑞士依波路錶架 MA”

 NA: 你唔打算正經讀就唔好讀喇!

明: okay, 對唔住!

“大約一點半啦我估, 如果準時嘅話”

“放心! 實準時架! 因為啲地產商係唔會容許佢地唔準時嘅” Wow~

“你咩意思啊?”

“啲火車唔準時, 啲人返工就會唔準時, 返工唔準時啲各行各業就會有問題, 各行各業就會有問題啲人就 會冇錢交租, 冇錢交租啲地產商就會唔高興, 根住啲地產商就會打比曾蔭權, “阿權! 幫我整返好部火車 等啲人準時交租”

你唔係真係要做呢套嘢啊 MA?

NA: 有咩問題啊?

明: 唔好囉!

NA: 你意思係…冇文學性?

 

 

明: 冇文學性, 唔好, 佢唔識寫嘢

NA: 我知道, 但佢真係有嘢想講架!

明: 我知道佢有嘢想講啊! 但係佢想講嘅嘢一係就好幼稚, 一係就好自大, 但呢啲都唔重要, 最重要係, 佢唔識寫嘢, 佢識放火, 但係佢唔識寫嘢!

NA: 比返我, 早知我唔問你!

明: 問心啦 NADIA, 如果唔係因為係白家傑寫嘅, 你連睇都睇唔完啊!

 NA: 就係因為佢係白家傑囉, 就係咁啊! 兩年前佢一隻字都唔識架!

明: ……而家佢都唔係識好多字架咋

NA: 粉葛!

明: 我係粉葛, 佢係唔識寫嘢

NA: 我覺得而家最自大嗰個係你囉!

明: 唔…

NA: 你覺得寫嘢係點就係點嘅, 你覺得寫嘢就好似跑馬拉松咁嘅, 全部人都喺同一個起點, 向住同一個 終點, 莎士比亞就喺前面帶頭, 後面嗰啲就抽曬筋, 喘曬氣, 你寫嘢係寫比邊個睇姐? 咪就係寫比啲想 寫, 但係又唔識寫嘅人睇囉! 文學性, 你慳啲啦!

明: 啱!

NA: 白家傑同你係唔同架! 佢寫嘢唔係為左要鬥叻, 佢寫嘢係為左要發聲!

明: 冇錯!

NA: 隻隻字都係佢自己寫架!

明: 我睇得出!

NA: 你唔可以期望佢寫嘅係咩文學作品囉!

明: 嗯…唔應該

NA: 佢係一個隔住監獄圍欄怒吼嘅囚犯啊!

明: Wa!    有勇氣!

NA: 我寧願你同我單單打打

明: 咁點解佢要寫個劇本呢? 你提議嘅?

NA: 唔……完全係

明: 即係?

NA: 係個委員會啊! 個委員會本來就有幾十人嘅, 而家就得返幾個, 佢地就覺得而家提返起白家傑就悶 喇…所有嘢都係咁架啦, 過左兩三年就悶架啦! 所以我地而家呢個活動係好需要……UM—

 

 

明: 打返支強心針!

NA: 唔係…我地而家呢個活動係好需要—

明: 絕地返擊

NA: 唔係啊! 你搵次比我講完先得唔得?

明: sorry!

NA: 我唔記得講咩喇!

明: 你呢個運動係需要…

NA: okay, 如果白家傑寫左個劇本, 港臺係會有機會拍左佢嘅, 咁呢件事就會提返出黎, 大家就會議論 返呢件事, 咁法庭就會有機會開返佢個 file, 姐係你覺得得唔得啊? 阿…小明! 你點睇啊!

明: 我認為好合理

NA: 你到底點睇啊?

明: 我到底點睇?

NA: 嗯…

明: 我到底點睇呢, 就係我認為一個人寫到一個難睇嘅劇本係證明唔到佢係改過自身嘅! 都證明唔到佢 係坐緊寃獄架! 就算證到都好啦! 當一啲一聽到白家傑呢三個字就覺得悶嘅人, 如果佢地睇埋呢本曠世 巨著之後, 佢地就會明白悶嘅真正意義! 咁當然啦! 佢地係唔會睇得完啦! 因為呢本嘢係厚過<</span>論語>一 倍, 但係<</span>論語>就好笑過佢兩倍, 姐係我到底嘅睇法就係, 其實你係心中有數!

NA: 慳啲啦! 你呢個自大狂!

明: 你再努力啲你就講到真正嘅粗口架喇!

NA: Roger 原則上係肯做架喇!

明: Roger? 大監製 Roger?

NA: 係

明: 佢點解肯做?

NA: 佢係委員會成員囉! 姐係我地而家只需要改一改姐!

明: 姐係而家係你地所有人都癡左線!

NA: 你妒忌!

明: 我妒忌白家傑?

NA: 係啊! 你妒忌白家傑可以成為一個作家啊! 你認為作家係神聖不可侵犯嘅, 唔係人人可以做, 大部份嘅人都做唔到, 姐係…我地寫嘢啊! 你睇咪得囉! 你唔鐘意白家傑, 因為佢不自量力, 佢想打入你個圈, 你去一間高級餐廳, 呔都唔打條? 過隔離檔食車仔麵啦! 字都唔識多隻? 過隔離檔食車仔麵啦! 識都幾 隻字有咩咁巴閉啊?

明: 傳統上, 識多幾隻字對一個作家黎講係一種……優勢

NA: 佢唔係一個作家, 佢係一個囚犯, 你寫嘢係因為你係一個作家, 你寫嘢你都要特登諗啲嘢出黎寫啦，係咪? 然後就死諗爛諗將邊一隻字同邊一隻字砌埋一起砌到佢好好睇睇, 咁又點啊? 一定要咁嘅咩? 邊個規定架?

明: 唔係邊個規定啊! 係因為咁樣, 就會好啲囉!

NA: 咁樣梗係會好啲啦! 姐係你同一班人講話  “咁樣會好啲”, 咁啲人自然就會講得“咁樣會係好啲”啦! 咁而家, 就係有啲唔受呢一套嘅人出現 MA, 就係有啲好似白家傑嘅人出現左 MA, 有血有肉有嘢想講嘅，佢又頂你唔順你又頂佢唔順, 對你黎講, 佢唔識寫嘢, 對佢黎講, 你淨係識得寫嘢!

明: 你好可怕啊! 你知唔知啊? 你啱啱係好可怕啊! 你知唔知啊? 你係將冇能力, 講講下變成左超能力! 我支壘球棍呢?

NA: 咩壘球棍啊?

(小明走出了客廳)

明: 有啲嘢只係講係冇用架!

NA: 你而家覺得你好搞笑?

(小明拿了一支壘球棍出來)

明: 我唔係同你講笑…

NA: (NADIA 見他拿著一支壘球棍有點害怕) 喂! 你做乜嘢啊? 你諗清楚啊—

明: 收聲啦! 超能人! 嗱! 呢度有一支普通嘅壘球棍, 佢係由唔同嘅金屬組合而成架! 就好似你頭先咁講, 有班人, 諗餐死, 邊種金屬同邊種金屬砌砌埋埋, 砌得佢好好睇睇, 於是, 佢就會產生一種彈弓嘅功能, 如果你用佢黎打波, 而你又識打嘅說話, 你輕輕一棍, 個波就會 woo—wooo-- (扮出壘球飛走的聲音), 我地寫嘢, 就係希望寫出一支咁嘅壘球棍, 以至如果我有一個諗法, 我輕輕一棍, 個諗法就可以 woo—(扮出剛才的聲音), 啊! 利害喇! 你呢度又有一支叫自己做壘球棍喎(拿起白家傑的劇本), 如果你用佢黎打波呢, 個波飛唔夠十尺, 你連支棍都扔埋啊! 然後會不停用個隔肋底按摩雙手, “Ouch!” (他雙手交叉, 放在兩腋下不斷磨擦), 呢一支棍啊! 佢係好啲, 唔係因為人地話佢好啲, 唔係因為有個“壘球棍秘密組織, 我地唔參人地玩架!”, 佢係好啲, 係因為佢係真係好啲, 你唔信你咪用嗰支嘢去打場波囉! 係啊! “阿 Bill, 你好特別喎! 你幾多歲啊?”“20 歲, 但係我做人做得多過你一世做咁多!”,Wa—Woo—Woooo—Wo---Waa-- (再次做出雙手交叉, 放在兩腋下不斷磨擦的動作)

NA: 我憎死你啊!

明: 我愛死你啊! 我係你老友黎架! 我要睇實你架! You are the one!

NA: 咁你可唔可以幫下我?

明: 你想我幫你咩?

NA: 修修補補

明: okay…修修補補, 補鞋補衫馬小明, 洗衫免費… 佢係唔識寫嘢架, 我係要幫佢重新寫過啊! 

NA: 咁咪寫過囉!

明: 唔得啊!

NA: 點解呢?

明: 因為佢所有嘢都係垃圾啊! 佢所有嘢都係陳腔濫調, 問題佢當正自己係哥倫布發現新大陸咁亢奮，真係, 你聽下, 句句都係咁架, 官商就勾結, 政黨就說教, 立法會就係鬧劇……一國兩制就係假像, 地產 商垂簾聽政, 愛國…盲目, 宗教…逃避、善良死左, 正義扲埋蓋, 頁頁都係咁架, 揭極揭揚唔完架! 你直 頭覺得好似比一部中左毒嘅花車巡遊輾過一樣。

NA: 呢個係佢嘅世界觀, 如果你係企喺佢個位置度可能你都會咁諗架!

明: 咁話唔定我知我自己企喺邊呢! 起碼我知道我係企喺某一個位置, 係! 的確, 呢個世界有啲嘢個形態 係肯定左架! (他拿起枱上的杯) 例如呢隻杯, 轉一轉, 唔見左個柄係唔係? 轉一轉又唔見左個口喇係咪? 但佢都依然係一隻實實在在嘅杯, 都係一隻有柄嘅杯, 但係, 政治啊! 愛國啊! 公義啊! 唔係好似一隻杯 咁真實架! 如果你一開口就話: 我要改變政治嗰條柄! 可能冇一條柄比你改變架喎! 咁你就會覺得好冇癮, 冇癮多幾次你就會覺得好憤怒, 但係如果你明白呢個道理, 你肯慢慢黎, 虛心啲, 咁你可能可以改變 到一啲人, 對一啲嘢嘅睇法, 姐係唔洗一講起政治就嗱起條柄! 如果你咁都唔同意呢, 我就只可以套用莊子嘅名句, “以有柄, 當無柄, 可矣。”

NA: 呢啲只係你嘅睇法

明: okay…

NA: 係邊個寫嘅, 佢因咩事要寫, 佢係邊度寫嘅, 對你黎講係完全唔重要架咩?

明: 係完全唔重要, ya! 呢個白家傑可能係比人屈可能唔係, 我唔知, 也唔關事, 而家講緊嘅係寫作, 佢唔係文盲, 佢係文霸啊! 佢認為報紙要編輯嗰啲就叫做自我審查, 但係你掟磚頭就叫做表態, 你想起一座橋, 呢個就係叫做社會暴力, 粗言惡語就叫做抗爭, 打斷人地既發言就叫做言論自由! 喂! 你唔可以對文字咁粗暴架, 文字係好中立, 好純正, 喺冇立場架, 佢可以好準確咁幫我地描述一樣野, 代表一樣野, 而同時又講緊另外一樣野, 如果你識得好好地咁用, 我地就可以係呢個充滿誤解同混亂嘅世界上面起一坐橋! 我唔覺得作家係神聖架! 但文字係啊! 你將適當嘅字放喺適當嘅位置, 將佢地拼埋一起, 你可能到以推鬱呢個世界, 少少…又或者, 你可以寫首詩, 死左之後, 將來嘅小朋友可以世世代代咁相傳落去

(NADIA 走到書枱, 拿了一張紙出來, 讀出寫在紙上的內容)

 

 

 

NA: 第 79 場, 破廟內, 從歐陽德的主觀鏡頭, 我們可以看到青鋒劍散發著陣陣紅光, 歐陽奸笑的大特寫,

“哈哈哈! 馬一超, 可惜啊!” 特寫馬一超雙眼, 特技變成綠色, 大叫, 地動山搖, 火山爆發!

Wo—Wooo—Wa—Woo! (扮出剛才小明雙手交叉, 放在兩腋下不斷磨擦的動作和發出叫聲)

明: 嗰啲唔係文字, 嗰啲喺畫面, 嗰啲喺電影, 嚴格上黎講, 嗰啲叫做膽養費, 如果阿 NICOLE 肯快快趣趣同佢男朋友結埋婚, 我就真喺可以寫啲世世代代咩落去嗰啲喇

NA: 你從來都冇為過我, 寫一部戲

明: 我知我冇, 我試過架…唉, 我都唔記得我上一次咁謝喺幾時啊! 啊! 我記得喇, 喺琴日, 你唔好嬲啦! 一係咁啦, 我陪你上廣州, 你喺出面表演亂倫嗰陣我喺化妝間度搞掂埋啲膽養費啦!

NA: 我唔會去廣州

明: 你去, 你一定要去!

NA: 唔去, 我一定唔去! 我要留低搞白家傑個戲啊, 我想做佢個戲啊! 我想做啊! 咁我重唔重要啊小明?

(停頓) 我知道, 對你呢個咁奄尖嘅人黎講喺好困難, 但係你得架! 將佢改好啲, 改文雅啲, OKAY?

明: (被激怒) 姐係點解一定要係白家傑呢? 你鐘意左佢咩? (NADIA 望了小明一眼, 小明知道自己說錯話了)

NA: (得意地) haha

明: 我收返

NA: wo… 太遲喇!

(NADIA 離出了客廳)