第四場

【報社，明顯已了下班時間，半明亮的辦公室只有一臺電腦螢幕在不斷更新市內新聞消息。】

【Tricia急步上，見室內無人，便喚醒其中一部在沉睡在電腦工作，不一會有人亮了室燈】

Tricia：你嚇死我喇蕃薯！

蕃薯：你嚇死我就真呀老闆娘，我以為真係有人嚟搞事呀！

Tricia：有人嚟搞事？

蕃薯：前兩日文化館火燭吖嘛。

Tricia：你驚會燒到嚟呢度呀？

蕃薯：唔係，有人恐嚇啲同事，又有幾個報站反口唔入我哋份紙，Johnny驚出紙之前有乜閃失叫我呢兩晚返office睇住……你呢？你的返嚟做乜呀？

Tricia：我搵啲嘢！本來想攞返嚟俾Johnny睇……

【一邊將相機遞給蕃薯】

  我今日再去火災現場影相，喺附近見到呢啲海報。

蕃薯：「完美的都市」？

Tricia：我本來搵到個好靚嘅角度，拍緊塊燒黑咗嘅告示牌，對焦嘅時候唔覺意zoom到一個圓形，係一張好新sharp嘅海報，就貼喺文化館後面嗰個地盤，我好好奇，呢張海報究竟sell咩呢？冇具體嘅資料，但係隔條街你就會見到一張，我去埋其餘嗰幾區，果然俾我搵到類似嘅嘢……我終於知道，呢海報係城市嘅暗示。

蕃薯：城市嘅暗示？

Tricia：木訥最後一篇公開嘅文章，題目就係「城市的暗示」，裏面講到喺生活中點樣插入訊息，引導群眾走入設定嘅路線，呢啲海報就係有呢種作用，佢帶你去幻想，當你去幻想嘅時候已經開始進入嗰個世界……然後我再去發掘城市裏面嘅其他細節，所有設計離唔開呢種城市嘅暗示，全部都係圍繞未來都市，冇可能有咁多巧合。你哋跟緊嘅重建計劃，我覺得已經正式開始。

蕃薯：你一日裏面去曬咁多區影相？幾個鐘頭就摷咗咁多嘢出嚟？老闆娘你的咁搏……我覺得好大壓力囉！

Tricia：Johnny呢？我想聽嚇佢點諗！打咗好多次佢都唔聽。急死我。

蕃薯：唔使打喇，條件友又賴低個電話。

Tricia：佢會返嚟攞，我做住嘢等佢。

蕃薯：咁你的有排等。

Tricia：點解呀？

蕃薯：條以今晚去咗溝女。

Tricia：哦。

蕃薯：佢約咗個靚女食飯，所以實有下場。

Tricia：……

蕃薯：喂，你唔好「咋」佢形呀，即係我應該話佢去搜集資料定係咩，但係條件友呢兩個月僕心僕命咁幫你的哋做嘢，都係今晚先出去輕鬆嚇咋。

Tricia：你唔使同我解釋，咁好好呀。

蕃薯：你唔會嘈佢嚇嘛？

Tricia：做咩呀蕃薯，你唔好真係當我老闆娘先得架。

蕃薯：你哋兩個好似面阻阻咁，我費事講多錯多。

Tricia：我哋兩個面阻阻？

蕃薯：你的唔好話唔係呀

【稍頓】

Tricia：蕃薯，你的真係得意。

蕃薯：嚇？

Tricia：我冇唔妥Johnny，我知你講上次開會嗌交嗰件事，但係我哋以前都係咁，喺囉，嗌完就冇嘢。

蕃薯：你睇你，講出口連自己都唔信哩？

Tricia：唔係，我係覺得佢策略上急進咗、寫嘢狠咗，但係我明顯，尤其今日見到呢啲嘢，我終於明白點解佢成日話唔好諗眼前嘅問題，要諗將來嘅問題，好明顯我同佢都唔知將來嘅局面會變成點，但係佢比我alert……有時一直喺一個地方生活，會變得唔敏感覺，反而變得唔熟悉嗰個地方，我就係咁。

蕃薯：知道就好啦，你的應該信佢。

Tricia：但係佢有時真係太「盟塞」，只要佢認為係咁，就算損手爛腳佢都要照自己嘅方法行。

蕃薯：係呀，佢由細都大都係咁！o靚仔嗰陣試過上山蕩失路，就係因為佢嗰啲死人直覺到成隊人差啲渴死，我哋咪就係嗰次之變咗老友囉，因為只有我肯陪佢錯到最後。

Tricia：但係我有信心，Johnny同阿阮互補不足、我哋份報紙一定會搞得好好……如果一段婚姻都可以咁你話幾好。

蕃薯：嘩。

Tricia：做咩呀？

蕃薯：你會唔會太貪心呀？

Tricia：女人就唔可以貪心？

蕃薯：可以，不過唔應該講出嚟囉。

Tricia：你的可唔可以攞土地拍賣嗰份報告俾我，我想比較嚇呢幾年嘅成交。

蕃薯：好快。

【蕃薯工作，Tricia有點落寞】

Tricia：我係咪有排等？你話佢今晚多數有下場。

蕃薯：唔知呀。

Tricia：你唔係同佢好兄弟咩？

蕃薯：係佢老母死嘅時候我撐佢，我老母死嘅時候佢撐我，我成日諗再搵唔到呢種兄弟，因為以後識嘅人連我老母都未見過，親極有限！但係我都唔知道佢搞嘢搞幾耐架嘛。

【蕃薯繼續工作，稍頓】

Tricia：訪問識架？

蕃薯：咩呀？

Tricia：Johnny約嘅人。

蕃薯：舊相好嚟架，不過又好似真係以前訪問識。

Tricia：估到啦，佢個人咁懶。

蕃薯：仲話唔係唔妥佢？咁都要放人暗箭。

Tricia：【笑】點解你係都要話我唔妥佢呢

蕃薯：我想搞清楚，然後勸你的唔好囉，你知啦，你的唔妥佢我就要唔妥你的，大家一齊做嘢你話面阻阻幾唔好呢，尤其係女人，我最憎同女人面阻阻……

Tricia：都係嗰句，蕃薯你真係得意。

【稍頓】

我知喇，一定係Johnny喺你面前讀過我你先成日「形」住我都唔妥佢，佢唔鍾意我，至少佢令你有呢種感覺。我叫呢啲做「關係的暗示」

蕃薯：梗係唔係！Johnny冇講你，Johnny都唔講人嘅，問佢佢都唔講。

Tricia：你問過佢咩？你問過佢乜嘢？

蕃薯：費事講啦。

Tricia：關於我架？你做乜咁八？

蕃薯：唔淨止我，其他人都八。

Tricia：其他人？

蕃薯：其他同事囉。

Tricia：我從來都唔知道你哋會想知我嘅嘢。

蕃薯：學佢哋話齋，返工唔講上司仲有乜好講呀？

Tricia：蕃薯你都幾快俾人同化，Johnny知道一定好後悔帶你出市區。

蕃薯：係佢要我融入社會架。

Tricia：肯定你只係為咗融入班女同事……你哋講我啲咩呀？

蕃薯：其實都好無聊，唔講喇。

Tricia：講啦，我唔小器

蕃薯：譬如話佢哋唔明顯點解你冇做model企喺度俾人影，反而要周圍走幫人影相……

Tricia：OK，我當你哋贊緊我。

蕃薯：仲有啲人話你成日唔見咗人，佢哋話睇過更表你唔使出crew，又知道你唔係跟阮生去開會。

Tricia：我鍾意留喺自己studio，我鍾意揀啲冇人嘅時候返office，啲人好似你咁當正我係老闆娘，我喺度嘅時候佢哋好唔自在——不過我唔喺公司都做緊架。

蕃薯：呢點我唔懷疑……

Tricia：未到戲肉，等我估嚇吖，你哋一定有講我同阮生。

蕃薯：少不免，少不免啦。

Tricia：你哋想八我哋點樣走埋一齊，我哋係咪真心相愛、佢咁忙我哋年紀又爭咁遠關係點維繫，諸如此類係咪？

蕃薯：我都好知道自己嘅新聞價值嚇。不過你都唔方答我啦。

Tricia：點解唔答？又唔係咩唔見得光嘅事。

       其實從來都係我愛佢多過佢愛。我一入行就遇到佢，而且深深咁愛上佢，似一個小fans多過可以同佢分享生命嘅女人。當我要求佢一齊嘅時候佢已經講明顯自己俾唔到咩我，包括時間，但係我唔理，我覺得同一個叻嘅人一齊即使佢唔喺身邊佢嘅精社都會孕育我，我幻想佢忙嘅時候我默默等佢，到佢死嘅時候對佢一樣忠貞……但係我高估咗自己，選擇一段咁樣嘅關係等於選擇生活喺一片陰影，我其實handle唔到，我對佢冇要求，佢有咩缺失我都諒解到，我曾經有想做嘅事，但係後來做咩都以佢為先，因為任何事拍埋去佢所做嘅嘢都顯得冇意義，我冇咗自己，唔知道應該將自己擺喺邊，直到開始同第二啲男人上床，我覺得被需要、覺得有人等緊我，我先知道自己仲存在。我從來冇諗過為任何人離開佢，我只係想得到性愛上嘅歡愉。

【她看著蕃薯，靜默】

你記住幫我揚出去。

【蕃薯這才倒抽一口氧】

蕃薯：車！

【看著大笑的Tricia】

嚇死我！搵啲咁嘅嘢嚟玩，嚇死我……

Tricia：好心你哋，八埋啲無聊嘢，知道呢啲嘢對你哋嘅人生有咩幫助？點解你哋唔可以討論啲深層啲嘅嘢呢？

蕃薯：咩呀，我哋啲討論好深層架。

Tricia：我信

蕃薯：我哋八表面嘅料係先攞個背景，為咗拗啲好大嘅議題。

Tricia：譬如話？

蕃薯：譬如話你到底知唔知有冇木訥呢個人。

【稍頓】

Tricia：我唔明。

蕃薯：嗱好明顯老闆娘一定撐老闆所做嘅，所以喺公開場合你一定話木訥失咗蹤，但係私底下呢？私底下你究竟信唔信佢失咗蹤呢？你究竟知唔知有冇木訥呢個人呢？定係盲目咁隨？

Tricia：咩呀？咪住，你知道我哋點解會開呢間報館架呵？係因為有個叫木訥嘅人失蹤而冇傳媒肯cover。

蕃薯：係，但係……

Tricia：你係話喺我哋呢間為木訥事件而開嘅報館裏面，喺嗰啲自願入嚟做嘢喺面試嘅時候聲稱好想為木訥嘅自由做番啲嘢嘅記者入面，其實係有人唔信有木訥呢個人嘅存在？

蕃薯：喂你唔會秋後算帳嘛？喂你唔好咁呀！佢哋講得啱，唔應該同啲高層咁friend。

Tricia：No no，唔昆要架蕃薯，我應承你，我唔會追究呢件事，我唔會令你難做，但係我求你話俾我知道，我只需要你答我一個問題——佢哋係咪唔信有木訥呢個人

【停頓】

蕃薯：咁人哋都係打份工啫

Tricia：咁你呢蕃薯？你信唔信有木訥呢個人？

蕃薯：我？Johnny話有咪有囉。

【稍頓】

放心，我實撐佢架

【Tricia如夢初醒】

Tricia：我要搵Johnny。

【Tricia感到虛弱】

      我要搵Johnny……幫我搵Johnny。