頭條日報

林峯跟無綫合作14年，將於明年初約滿，有傳他有意向外闖簽約女友（吳）千語BB的經理人公司，實行孖住搵食兼主力向電影圈發展，亦有指他另起爐灶，肥水不流別人田自組公司捧自己。日前他出席全新「Oral-B Pro-Health」牙膏活動後接受本報專訪，首度開腔談及續約問題，他坦言對傳聞感到莫名其妙，非但無想過簽約BB的公司，更無意攞苦黎辛搞公司，身為長子的他還表明有責任返家幫有「廈門李嘉誠」之稱的父親林華國搞生意，不過他一直有個搞音樂劇的夢想，或許成為去留的關鍵因素。

撰文：杜淑霞　攝影：李維隆化妝：Raymond Yip 髮型：DY @ Hair Corner

場地：優意食堂（iSquare）

林峯剛從橫店拍罷nowTV首部電視劇《大漢賢后衛子夫》返港，即傳出拒絕續約無綫的消息，當日他接受訪問時，也坦言第一個反應是「吓！又黎」，他解釋：「都唔係第一次有呢啲無中生有既新聞，我入行10幾年，經濟獨立左咁多年，又要拖埋屋企人落水，真係好搞笑。」

無意自組公司

對於自組公司的傳聞，林峯斬釘截鐵否認，「真係冇諗過，如果搞生意都係搞屋企生意，眼見同行自組公司幾多野煩，唔係咁容易，會分散左做幕前既集中力，唔係話做就做到，識做幕前唔代表識做幕後，根本係兩回事，係呢行裏面，我暫時比較有興趣係做緊既野，依家只希望生活平衡番，再埋頭苦幹去研究另一樣野，未係時候囉！」

談到跟無綫還有大半年便約滿，卻未開始傾續約，林峯還搞笑表示可能公司不要他，所以未跟他傾，「講笑啫！未係時候，大家都唔急，同公司合作愉快。（話你避樂小姐電話？）好搞笑，我地啱啱先一齊食飯，公司又會見到，點避呀？」

望實踐音樂夢

不過講到是否首選無綫，林峯就提出條件，「每個階段有唔同理想，我?家追求係各方面平衡，我都明白呢行愈忙愈多機會愈好，我好好彩呢十年都忙，但係忙到一個程度，開始忽略左生活節奏，同埋令到內裏有種乾塘既情況，雖然未去到透支，但係用得七七八八，我想吸收多啲新野，所以我要搞清楚自己意向先決定，我?家未諗，我始終係大仔應該要返屋企幫手，所以會先同屋企傾一傾再決定。」

林峯坦言在電視圈發展已到樽頸，反而電影和音樂方面，有更多發展空間，若然留在圈中，更希望完成多年夢想，「電視方面呢10幾年好多都拍過晒，反而電影係初步，好多野未試過，電影畀到更多時間你去準備，先至過到戲癮，享受到個角色，而且電影觀眾群闊啲，局限無咁多。至於音樂上，我由10幾歲學唱歌已經好鍾意音樂劇，睇過《Joseph And The Amazing Technicolor Dreamcoat》後，更加覺得創作空間係無限，所以好仰慕學友可以做到《雪狼湖》，如果問我返屋企幫手最唔捨得，就係一手創作音樂劇呢個夢想，做到就真係無憾。」

※林峯當日出席完Oral-B活動，自豪地表示自己棚牙全天然。 

※林峯父親是富商林華國，更有「廈門李嘉誠」之稱。 

※林峯今年沒有為無綫拍劇，反而為nowTV拍了《大漢賢后衛子夫》。 

※林峯夢想可以好像張學友一樣，能夠創作像《雪狼湖》一樣的音樂劇。 

今年林峯未有劇集推出，無緣問鼎「最佳男主角」，反而《十大勁歌金曲》改制玩全民投票，向來粉絲數量驚人的他，即成「最受歡迎男歌手」大熱，他則自謙說：「當然希望透過我呢個媒介令到幕後製作人得到認同，同埋透明度高左係少左拗撬，所以我不嬲都贊成全民投票，大家參與度又多左，對節目收視同推廣音樂有幫助。」