蘋果即時

【捉蟲了？】林峯拉攏徐子珊起無綫飛腳 反被出賣？

早排有報道話，由無綫一手栽培嘅林峯，打算約滿後離巢，自己開公司搞電影製作及經理人業務，仲諗住搵埋子珊一齊做對螢幕情侶齊齊返內地搵大錢。

無綫高層樂易玲就話林峯明年底先約滿，無綫一路都有搵佢傾。問樂小姐傾成點？佢就答來答去都冇一個確實答案，只係話:「佢拍劇、做巡迴個唱、仲有部戲傾緊，好辛苦，佢要時間休息，去吓旅行，拍吓拖先！……」聽完都係一頭霧水。不過，報道一出，林峯就話，無綫根本都未搵佢傾。

如果林峯開公司真係成事，拍住林峯組情侶檔返內地掘金，肯定和味過喺無綫日捱夜捱仲要俾公司抽佣。不過，今日又有報道話，徐子珊本來已經一口答應咗，但後來又反口喎，點解呢？就係子珊醒目囉，知道公司花旦走得嘅都走晒喇，佘詩曼一年拍得一個劇，法拉又唔續約，胡杏兒同楊怡又攞過視后囉，得番子珊同鍾嘉欣BB未攞過，留低有著數喎，難怪佢最近改口風，話死都要黐住樂小姐，起峯峯飛腳，激到峯峯好嬲，搞亂晒佢個plan呀嘛!

不過問番子珊係咪起林峯飛腳呀？佢竟然話:「係咩？阿哥(即林峯)開公司咩？唔知喎!佢咁怕麻煩，唔會啩!」

而另一邊阿峯對無綫態度就180度改變喇，由乖乖仔踏入反叛期。消息人士透露話樂小姐叫阿峯拍拖要低調，但峯峯當然唔理啦，日前仲攬住千語BB，出席黃百鳴個仔嘅婚宴，席上仲一齊玩BB，預演家庭樂。報道仲話，最近峯峯連樂小姐電話都唔聽啊。

訪問阿峯的時候，問到佢會唔會續約？阿峯就話未諗將來計劃，仲話有可能會返去幫屋企人手。講到模菱兩可，留番條後路俾自己嘛。

有指林峯拉攏徐子珊，而起無綫飛腳。