闺蜜(福州语微小说)

我老妈有蜀隻闺蜜

伊稠稠共伊丈夫冤家

所以稠稠来我厝礼

讨我老妈攀讲

女界都是总款

碰着气儥顺心儥通辰候

就讨侬攀讲碎喘囇

心情就会轻松仂囝

然后固是转去煮暝

嚽我也会理解其

有蜀回我转厝固看见

伊翻起衣裳讲

汝看我身乞拍礼都是痕痕

我头覆礼赶紧行房里去

仱我就讲汝这闺蜜

自家脾气也真呆

使钱共使水若

嘻日伊讲伊去店礼看衣裳

讲现在汗衫都过贵去

蜀件着399

我听伊总款我也无敢做声

我想我汗衫都俪买99

汝自家都是去品牌店买衣裳

自然都是贵啊

就是便宜也啰199~299

伊丈夫会趁偌夥钱

难怪伊两隻会稠稠冤家

俪是我也见觉着搦拍

汝敢拍，汝敢拍

结果就是因为我侈话

我乞我老妈搦礼拍

但是伊闺蜜儥八

我对伊其看法

伊固是稠稠来我厝礼

但是有辰候我老妈固未转厝

我就讲汝俪无坐仂行

我想孤男寡女屈蜀堆儥好

我就行房里拍开电脑客遛

伊看见我客遛电脑

仱就讲伊丈夫也是日日着厝礼

家庭事都儥看见俪八客遛游戏

我讲男界客遛游戏也真正常

无什乇要紧，俪使伊会疼汝

对伲囝会关心就会使了

想儥遘我总款讲话

就像揬着马蜂窝去

伊马上情绪大激动

复开始大讲伊丈夫脾气偌夥呆

甚至连伊台家老倌也讲蜀遍

仱固好这辰候我老妈转来

我乍有办法安静蜀下

有蜀晡我共我老妈冤家

仱伊就怀疑我着外首有侬

我讲无，但伊儥相信

伊讲手机掏过来

伊开始看我手机裡势其联系侬

李梅，兹隻底侬

我讲是单位检验员

工作上有联系

柳娜，兹隻底侬

人事处其部长

也是工作上有联系其

汝肯定将狐狸猫精其名字

隐藏起去

我讲无，我外首俪有侬

固共汝总款癫脬蜀日屈蜀堆

伊听我总款讲伊

复将我搦礼拍

突然伊将我手机复夺过去

输裡伊闺蜜伊电话号码

我讲汝卜做什乇

伊讲伊最近发现

我共伊闺蜜儥正常

攀讲会嘻满粘牢

现在伊伓是伊其闺蜜

是我其小蜜

我讲汝无乱由讲啊

都是伊来讨汝

仱我蒋无将伊逐出去啊

我老妈也无措我

伊使我手机发蜀芘

短信乞伊闺蜜

我真想汝汝现在着礼做什乇

过仂行，伊闺蜜短信回过来

我共汝老妈是好闺蜜

侬家之间是无可能其

我老妈看完乍无话讲去

但是第二早我拍开手机

看见伊发蜀芘短信乞我

我也真想汝但是当时我丈夫着旁边

我赶紧将短信删赖去

我想我现在蒋样解释

我是跳裡黄河也洗儥清唠啊