方舱日记(方言微小说)

我本底是鹰其啊

做大几轮核酸都是鹰其

我也无行外首啊

都封城去唠我去底呢躃

但是做礼做礼

我就变成羊去

我想肯定是做核酸做出其

我开头肝火真熧

但是我现在想啰想

我真感谢许隻

将病毒传乞我其嘻隻侬

让我也体会囇这病毒

着我身礼是什乇感觉

其实无什乇感觉啊

就是共普通感冒差罔多啊

就是流鼻水空嗽鼻塞

最关键其是我着感谢嘻隻侬

让我过上好日子

原底敆厝礼

居委会告我着配合做核酸

我就日日早早去做核酸

喉咙已经都乞揬卜破去

核酸做完着去买菜

但是无法出去买

只能着网礼团购买菜

但是就是乞汝抢着

许菜价我也买儥起啊

肉蜀斤35，米蜀斤7块

番囝薯12，红萝卜12

韭菜20，草莓50

汝看食会起儥

我店也拍倒去

身礼无剩几片钱

我敆厝礼

只能日日食快熟面

开头看见120来

警察来，大白来

我真恐怖都惊死去

但是一切证明

我其顾虑都是多余其

现在我就着方舱礼

一切都伓使考虑

每日就是食，睏

每日有肉有鱼有卵

有牛奶有各种青菜

并且每蜀顿都儥重样

关键一切都是 免费其

医生讲感染啰总款病毒

一定营养着好

我讲正是正是

医生告我食什乇我就食什乇

伊讲连花清瘟有效无

我就讲有效有效

因为我着配合医生

有大白来做卫生

伊讲汝甭定动

我马上就倒眠床礼看手机

所以我连卫生都伓使做

汝讲我配合有遘好无

医生讲像我总款再过几工

就可以出院唠

我心礼想，只满快

我希望最好永远

都伓使出院

我就喜欢着方舱礼

比着厝礼侬快活舒畅真侈

仱就是无侬共我讲话

更更无办法拍批

客遛麻雀

只能看电视刷抖音

但是今旦总算有侬

共我攀讲唠

并且固是蜀隻依妹

原底乍裡辰候

亲戚朋友都不断

拍电话乞我

我就讲无事计

只裡条件真好啊

所以最近

也无侬拍电话来唠

仱今旦接遘蜀隻

依妹其电话

我讲汝是底侬

伊讲我有无需要贷款

我讲有需要啊

汝有无贷款过

我讲有啊

中国银行工商银行建设银行

交通银行农业银行固有花呗

我都有贷款

回汝填去未

未填

溪势未填，时间未遘啦

伓是啊，我无钱填

回汝就逾期去唠

汝有无店噜

原底有，现在无去唠

汝有无车

原底有现在都乞银行拖去唠

汝有无厝

我讲有两间

不过现在俪剩蜀间

汝厝有无厝契噜

无，现在只间是我租其啊

伊讲儥使

我讲溪势儥使

伊讲我征信无遘

我讲征信无遘

汝溪势乞我拍电话噜

伊讲伊是随机拍其

我讲无遘无要紧啊

汝钱掏借我

我将欠债都填上

我征信就有遘唠

伊讲儥使其啊

我讲只满简单道理

汝溪势就儥明白噜

汝钱掏借我

反正汝借底侬都是借

我将债还去

我就无问题唠啊

伊讲不兴啊，对不住先生

伊就将电话截赖去

汝看是伊截伓是我截

说明我是有好好配合其

各侬都听见唠啊

仱我马上就出院唠

我现在特别会体会犯侬

放出去溪势复裡去

因为伊已经儥习惯

外首其生活唠啊

所以我就想

蒋样想办法

再变成羊

各侬俪有办法

希望着评论区告诉我