手机历险记

我就是嘻架手机

只两日逢侬都着礼讲

上海人们偌夥好

杨洲依妹偌夥好

但是都无考虑我其感受

所以我必须出来

讲啰讲只回其经历

毕竟这事计我最清楚

我共依妹认识有三年唠

当初别侬也介绍

真侈架手机乞伊

但是伊就是中意我

伊讲我生得俊

关键夹相做真好

依妹爱开美颜

我是可以理解其

所以伊再无犹豫

就将我带转厝

每日都带礼我

无管行底呢

去底呢地方

是上班固是去睏

就是去厕所也带礼我

固乞我买礼各种样式其手机壳

过两工换蜀下，就像换衣裳若

伊固乞我贴礼膜膜

就像伊自家贴礼面膜逢款

所以虽然我共伊都三年唠

固是就像当时逢款年轻

侬都讲手机两年换蜀架

伊讲我手机好好喏

真溜律，也儥敆，我溪势着换

只回上海疫情真严重啊

全国人民都支持上海

依妹共伊姐都主动

要求做自愿者

最近都着礼负责包菜包包裹

因为上海人民都关厝礼

无法去买菜，着网礼猴猴叫

不断有侬拍电话来

所以伊将我廮伊旁边地兜礼

但是想儥遘伊姐

着包菜辰候将我也包裡去

我直透告伊也儥听见

因为会惊手机铃声

会影响别侬做事计

依妹将我设为震动

仱总款我就莫名其妙

送上去上海其大货车

我着裡势气都儥透出

固有裡势湿度真悬

复热，我会惊乞伊熻死去

固好我有本身防水功能

我觑啰觑周围，蜀粒包菜

固有蜀把芹菜，两粒番囝薯

几条红萝卜，蜀楞肉

我共两粒苹果屈蜀堆

并且夹着台中

但是虽然讲都是苹果

我这苹果共苹果儥蜀样啊

伊蜀斤俪五块我蜀斤两万五啊

仱我也真急 但是我有话讲儥出

固好杨洲遘上海真快

俪3点钟就遘唠

因为我听见有侬着礼讲

阿拉相海宁

这辰候我听见有侬讲

各侬注意啊

有蜀隻依妹其手机

无细腻也乞包菜裡势

就着只几架车礼

就是儥八是底蜀架

我复听见有侬讲

依妹发出包裹其照片

各侬可以按照总款其包装

去帮依妹讨手机

原来依妹通过网络来讨我唠

我真感动，目滓都卜逿落来

仱全上海其侬都着讨我

这辰候我感觉

有侬拍我其手机

我看囇是依妹姐其电话

但是我俪震动啊

外首其侬都儥听见

会急死去

固好真快我见觉有侬

掼礼我只包菜

送去小区礼

有侬讲，实在讨儥着手机

侬家上海侬每隻侬出仂囝钱

乞依妹买蜀架新其手机

我听礼复感动复受气

感动其是固是有只侈侬

关心依妹啊，上海侬也真肝胆啊

受气是伊各侬都无想遘

我共依妹感情偌夥亲

伓是别架手机可以代替其

就着这辰候

我见觉来遘蜀间厝礼

听见有侬解开包裹其声音

听见蜀隻依哥讲

手机着伊租块

我见觉侬做蜀下舒畅去

因为憋包裹裡势侬真喫亏

突然呼吸遘新鲜其空气

我听见依哥讲

手机俪有5%其电唠

着赶紧充电

伊蜀边充电

蜀边拍电话乞居委会

真快，我听见依妹电话拍来

依哥讲伊已经共

居委会讲好唠

马上告顺风车带乞汝

固有手机来侬家上海

着开蜀只证明

俪无依妹汝其行程码

会变黄去

依哥讲，依妹啊上海侬

真感谢汝啊

我想共汝加蜀只微信会使儥

依妹讲会使会使

我看依哥厝礼俪伊蜀隻侬

估计是单身哥

伊想共依妹交朋友也真正常啊

依妹现在也固未谈恋爱啊

顺风车真快，现在我

已经复共依妹屈蜀堆唠

伊摸礼我讲

固好讨着，裡势有我真侈

个人资料，我夹其相片啊

我听依妹共嘻隻依哥着礼攀讲

我想嚽正号礼千里姻缘一线牵

并且我就是牵线其侬

这辰候我复听见

有侬着抖音裡势讲

疫情结束以后

应该将这事计拍成电影

我真欢喜

因为现在全国人民都八传去唠

并且俪拍电影

我是男主角

我是女主角

但是到底我是男是女

我也分儥清楚去