幸福密码

美红爱写诗

郭伟爱写小说

因为都爱好文学

美红共郭伟就认识去

所以俪碰着就

爱交流写作其经验

美红真喜欢郭伟

郭伟看会出，因为

伊也真喜欢美红

但是美红见觉着等郭伟来

追求伊，伊讲诸娘囝不能恰主动

下日会乞侬看儥起

郭伟面皮真薄，伊想我俪

表白，乞伊拒绝去

我面子做拍无去

所以伊两隻都真迷信

都想伊两隻侬俪有真其缘分

月老一定会替伊

会替伊两隻创造机会

但是有蜀日美红看见郭伟

共蜀隻诸娘囝罔行罔讲

有讲有笑，真亲热

诸娘囝固拍囇伊肩头

美红心礼就真难过

目滓都卜逿落来

但是伊复无敢主动去讨郭伟

就着这辰候

伊姨乞伊介绍小王

伊开头伓肯

但依妈安伊着去

依妈讲年纪都只满大唠

仂滴都儥八事

所以逼伊去看亲

结果小王对伊真满意

因为美红侬生真俊

所以每日伓是馆店

就是看电影

小王是公务员

条件儥呆

所以美红就共小王

谈恋爱去

郭伟看见美红谈恋爱去

伊心礼也真难过，因为嘻日

共伊行蜀堆其诸娘囝

伓是伊女朋友

是伊舅其诸娘囝，讨伊有事计

难过归难过日子固着过

有亲戚介绍

郭伟认识啰小玲

总款美红共小王结婚无偌行

郭伟也共小玲结婚去

结婚以后美红发现小王虽然

无郭伟漂亮，浪漫

但是侬真聪明真上进

对伊也真好

所以美红见觉真幸福

郭伟虽然无讨着美红

但是结婚以后伊

发现小玲侬真好

碰着家庭事

小玲都是讲我做我做汝做儥清楚

目的是让郭伟安心写小说

并且小玲对

郭伟依爸依妈也真孝顺

所以郭伟见觉也真幸福

现在美红共郭伟都幸福唠

所以我其小说结尾也是像

蜀条歌所唱其逢款：花好月圆

所以讲婚姻总款事真伓好讲

美红共郭伟虽然是一见钟情

但是真正生活着蜀堆无一定

就会幸福

并且人生是无法

同时行两条墿其

所以我发现婚姻幸福其密码

就是夫妻之间关键是着会互补

虽然总款讲

但是我固是鼓励无管男女

看中意去，都着勇敢追求

因为我就像郭伟若，面皮真薄

年轻辰候有中意几隻诸娘囝

但是就是无胆量去追求

所以遘现在固是单身哥

遘现在固真退悔

有蜀回有侬乞我介绍冰冰

冰冰是演戏其

并且是蜀隻大美人

但我发现伊虽然对我无呆

但是我儥清楚

伊到底是演戏

固是真其对我好

我哩，是写小说其

伊讲我嘴礼

也儥八底蜀句是真其

底蜀句是假其

碰着事计伊都是讲

嚽我都是经纪侬替我做

我讲我也做儥清楚

我都是我爸我妈替我做

结果俪蜀个月日

我共伊就 拜拜去

其实我共伊敆蜀堆其时间

拢共俪7小时35分58秒

因为伊每日满世飞

所以现在我只能通过

不断写小说

共我小说裡势其诸娘囝

谈恋爱