加载中…
个人资料
cgkyk
cgkyk
  • 博客等级:
  • 博客积分:0
  • 博客访问:10,630
  • 关注人气:2
  • 获赠金笔:0支
  • 赠出金笔:0支
  • 荣誉徽章:
正文 字体大小:

外首其世界

(2022-03-30 08:59:00)
标签:

娱乐

分类: 福州话诗歌

外首其世界

美娟共美菊是好朋友

有蜀日美娟共美菊讲

伊准备去外首做工

问伊什是也去

美菊伊妈儥同意

因为美菊伊爸真早就死去

为啰美菊伊妈也无再嫁

共美菊相依为命

所以美菊就是伊其命

依命依命,伊都是总款喊美菊

所以美菊只能覭着小山村礼

美娟去大城市以后

过几个月日写批乞美菊

讲伊现在蜀个月日

工资会趁千把块

美菊尽落羡慕

因为美菊敆厝礼

蜀年固儥趁两千钱

做年辰候美娟转来

美菊看见美娟

难也变真俊去

颂其衣裳真漂亮

头发做囇

就像城里其诸娘囝

所以过啰春节

美菊就硬卜跟美娟

去外首做工

伊妈真儥受

但也无法只能送伊去

长途车站

来遘大城市

正是目睭会看花去

美菊想好好看啰看

但是无办法着先讨工作

原来美娟是着蜀间

嫩嫩其电子厂上班

因为美娟介绍

所以美菊也来只间厂礼

确实工资会掏遘千把

但是着日日加班

蜀礼拜俪歇蜀工

早头七点半就着上班

着直透坐逢呢,手不断定动

中午食饭加休息俪蜀点钟

所以这钱趁是真喫亏

美菊见觉侬像关笼笼礼

但是美菊发现美娟

无共伊住蜀堆

伊住专门其单人宿舍

伊工作能力真强

侬也生这俊

老板提伊做部长唠

为啰生意为啰客户

伊着稠稠陪老板出去

所以伊衣裳颂真时髦

妆也画真浓

美菊心礼有蜀种感觉

但是伊也无敢讲出来

每日起早睏暗

真儥容易遘礼拜日

想行出去跞跞

但是电子厂着工业园

旁边对面都是工厂

俪有几间店囝

离市区复远

实在无乇看无乇跞

遘五一节放假

伊共美娟两隻乍搭车

去城里逛蜀逛

想遘明旦复啰上班

伊就无心绪

伊发现自家就像

犯侬“放风”逢款

蜀日复蜀日

也儥八乜候会出头

下日老去该蒋样做

伊想都无敢想

会混蜀日是蜀日

伊内心复恐怖复空虚

伊就去买化妆品

买衣裳买食其乇

去填补这空虚

但是空虚像无底其洞洞

蒋样填也填儥满

伊想起敆厝礼辰候

固会想有蜀隻丈夫囝

会讨伊做老妈

伊会养蜀隻囝

伊会做郎奶

厝囝养几头鸡几头鸭

几头猪

生活虽然平静但是有盼望

但是现在就是有漂亮其衣裳

颂乞底侬看噜

每日都是颂工作服

电子厂都是诸娘囝

有蜀隻电工是丈夫囝

伊有注意美菊

但是美娟由伊目睭礼

看出兹隻丈夫囝

共伊蜀样也真空虚

伊讨儥着生活其希望

希望变拍无去

为啰安慰伊妈

伊固是去最闹热其地方

夹蜀张相

寄乞伊妈,共伊妈讲

汝安安心,我无事计

一切都好

商场礼放礼伊熟悉其歌

外面其世界真精彩

外面其世界真无奈

伊原底真喜欢只条歌

但现在伊听礼听礼

目滓就 逿落来

0

阅读 收藏 喜欢 打印举报/Report
  

新浪BLOG意见反馈留言板 欢迎批评指正

新浪简介 | About Sina | 广告服务 | 联系我们 | 招聘信息 | 网站律师 | SINA English | 产品答疑

新浪公司 版权所有