篱笆

依姆真年轻就守寡霜居

现在伲囝都大都结婚去唠

依姆无乇做就去山礼拾柴杮

有蜀日伊翻过山

行遘蜀只伊以前无去其地方

伊弯腰着拾柴

听见有侬告伊：依妹 依妹

是蜀隻男界其声音

伊真激动

真像复回遘伊做诸娘囝辰候

伊看见蜀隻依伯徛篱笆旁边

篱笆裡势栽礼真侈桔树

汝儥记我去唠

我共汝丈夫是表兄弟

汝结婚辰候我有去食酒

伊死辰候我也有去

依姆看啰看 乍想起

原来是汝啊

汝只十把年儥容易啊

依姆听礼目滓就流落来

行裡坐吧

依姆看见裡势也无侬 就讲

伓坐伓坐，我着转去煮暝

依姆个郎晡都睏儥着

耳边都是依妹依妹其声音

以后每日依姆都去逢呢拾柴

依伯告伊行裡坐

伊都是讲伓使伓使

汝这桔红唠

依伯讲我摘几粒乞汝食

伓使伓使，伓使客气

依伯讲 等桔摘完

我就伓来使唠

以后大几日

依姆无去逢呢拾柴

但是伊始终儥安心

最终有蜀日

伊固是行逢呢

但是再无桔也无侬

依姆肝火野熧

伊将篱笆其竹批都拔出来

迈转厝

蜀芘蜀芘廮灶礼去烧

火烧红红 依姆其面 也红红