送别

应该有廿年唠

嘻蜀年，我转福州

有蜀日经过三叉街

蜀间杂货店

看见店门口有排礼书摊

我像有其侬看见诸娘囝

就行儥定动逢款

我看见书骹步就停啰来

我发现摊礼有卖蜀本书

《福州方言俗语歌谣》

我翻啰翻，见觉真有味

因为裡势有真侈俗语歌谣

我做细是有听过其

并且我发现

伊是使方言文字写其

嚽是我头头回

注意遘方言文字

原来福州话是有文字其

固有拼音

但是拼音我看儥会意

我是通过字反推过去

去猜伊这拼音是蒋样拼其

以后我乍会八伊是国际拼音

我当时就将伊买啰来

如果我其印象无绽其话

应该是10块或者是12块

转厝有闲就翻蜀翻

我乍注意作者是号礼

陈 泽 平

我想像伊是应该蜀隻

文质彬彬其侬

戴礼乌乌其眼镜

只本书应该是有看完其

因为伊儥像小说

着由头遘尾去看

汝可以随便翻开蜀页

就会看其

以后因为我爸搬厝

将我真侈书都当字纸卖赖去

其中就包括只本书

以后我因为编译歌词

有侬就问

我什是受只本书其影响

什是我看野熟

我讲无，基本无什乇影响

因为我是按照流行歌曲其样式

去编译歌词其

所以俗语歌谣使儥上

唯一有蜀回就是编译

《天黑黑》只条歌

伊裡势有：天乌乌欲落雨

所以我就使真鸟囝啄菠菠代替

陈泽平先生

着福州方言界真出名

《福州方言字典》裡势

也有伊其名字

但是我儥认识伊

今旦听讲先生行去

看见伊其照片乍发现

伊共我心中其伊反差真大

伊汉码悬悬，目睭真大粒

侬做肥肥喏，面色红红

估计血压共伊侬蜀样悬

我想陈先生也算是我其

启蒙先生

所以我应该写仂囝文字

最后我将《送别》

只条歌送乞伊

以表达我其 怀念