介讲依婆

有蜀回我爸身礼生紧腰蛇

伊去医院礼开礼

几粒白白其药丸转来

伊讲真疼，倒眠床礼

我去看啰看

就是红红喏几粒点点

我以后乍会八嚽号带状疱疹

民间讲真厉害

介发几粒红红涿出来

如果连成蜀环，就像老蛇喏

缠汝身礼，侬会乞伊缠死去

但是当时我见觉无什乇

因为我爸兹隻侬真少

着伲囝面前表露感情

但是就总款红红几粒点点

伊做遘无法上班，歇厝礼

我放斋转厝辰候

我听见伊共我妈讲

伊告依婆看啰看

我讲依婆会看嚽

伊蒋样看其，我问

我爸讲真简单

就是将红纸头搓嫩嫩喏

然后使火笃着去

将光弹着紧腰蛇礼

固有什乇，我问

无唠

回汝有无见觉好仂囝

也无什乇感觉

过蜀段时间，我爸病就好唠

我乍会八，依婆固会做嚽

难怪平常间有看见

生分侬来讨伊

神神秘秘，鬼鬼祟祟

都是女界，诸娘囝

听讲伊会治奇奇怪怪其妇女病

我是儥相信其

我爸讲伊也是儥相信

我爸是物理学先生

当时，伊讲，因为当时

实在疼真厉害

罔去试蜀试，因为是熟侬

所以也无收费

由只件事计，依婆着我心中

伓啻是依婆，伊变成巫婆去

伊死以后，据讲总款其技术

传女无传男

现在是伊诸娘孙着礼做