《朱买臣》之
                    《逼写分书》
                              潘一帆撰曲
                       新马师曾.郑帼宝名曲
如花【卖相思】
    我错嫁买臣叹倒运，我满心苦困，佢两餐都不继，自称君子乐贫。唉吔我最怕喺捱穷，十分不甘！我暗里结识情郎，立心改嫁别人。
如花【口白】
    哈！个衰佬呀，咁抵死喎，日头落岗嘞，都重未斩倒柴返嚟添喎。好！等一阵间哩，我借头借路嚟逼佢离婚至得！咁衰。
买臣【南音】
    唉，真喺悲失运，二竖侵，今朝我仲发紧冷，带病入山行。真枉我满腹珠玑，也要捱饥馑，怪不得话百无一用，就是书生。空负我饱学多才，只因生活困，只为点金无术，我今作採樵人。不幸家有一个蛮妻，可叹佢难安份，
买臣【二簧慢板】
    只知把虚荣贪慕，不知所谓淑妇，安贫。唉！真个是柴米夫妻，我事事强为，哑忍。
    (买臣：唉，唉，阿如花！如花：咩呀？舍得躝返嚟嚹咩？

     买臣：唉，你咪开口就闹咁阴功吖。我今日唔知嚸解斩柴，梗喺成日都觉得沾寒沾冻噉样，都唔知几辛苦呀。阿花，唔该你同我﹑走去﹑走去药材铺，执剂廿四味，畀我饮。赊住先，好唔好？

    如花：唉吔，执药饮添呀！好心你咯，冇钱仲病乜鬼嘢啦！

    买臣：我都话赊啦嘛。如花：我话之你死呀！唔赊！

    买臣：哦？阿花，我咁样同你做夫妻，叫你同我赊剂药嚟饮嗄都话唔得？你都唔好咁绝吖你！ 如花：好绝咩？冇钱咪学人病啦衰佬！我睇见你就衰啦，真喺！  买臣：唉吔，乜你噉都噏得出咖花你？  如花：哼)！
【泣残红】
    (生唱)为何待我咁狠心，一旦当路人？
    (旦唱)哼！你寒贫咯！
    (生唱)赊剂药我饮啫，
    (旦唱)执药要银嘅。
    (生唱)叹贫穷在路边冇人问，苦煞你良人。
    (旦唱)你个病坏灾瘟。(买臣：唉吔，乜噉讲呀)？更令你妻捱穷，受苦困。
    (生唱)艰辛，不过暂强忍啫。
    (旦唱)我饥馑都实恶忍！不再受你呃凼！
买臣【反线中板】
    妻莫发牢骚，须知小人穷斯滥，而我则君子，安贫。(如花：冇钱就冇得讲嚹)！守得云开见月明，(如花：我等你有钱呀我都老嚹)！终有日否极泰来，劝妻你应宜，守本份。贫贱夫妻百事哀，纵使牛衣相对泣，只嬴得烦恼，加深。
买臣【滚花】
    达人应知命，他日夫贵就便妻荣，开讲话先苦后甜，唉！你都休怨恨好嘛？
如花【口白】
    唉吔！唔该你啦，你哩几句说话，我听都听到厌啦！
如花【爽梆子中板下句】
    哩个现实嘅人生，我不能心存幻想，等到你高中，带挈我做夫人。就算你学姜子牙，到晚年富贵荣华，可惜我已经，都冇命等咯。好彩我仲年青，(买臣：喺咯，噉咪好啰)！凭我嘅花容月貌，结识一位理想，嘅俏郎君。(买臣：嗄)！
如花【快中板】
   有势有财，英俊甚。谁叫你粮无隔宿，太清贫。
如花【滚花】
   佢可以助你金百两，唯是要离婚！(买臣：嗄)！精嘅你就当堂允肯呀！
    (如花：喂，畀钱你离婚啵！要唔要呀？要咗佢啦穷鬼！

     买臣：哼！哩啲噉嘅衰钱，就算我饿死街头，我都唔要！

     如花：嘿！唔要悭翻)。
【下西歧】
    (生唱)拒绝钱财我难退婚，盼望如花休变心，哩你是我嘅娇妻，焉能另再婚？嫁夫纵是穷要安份。
    (旦唱)你确实养妻都无能，重弊过一碌棍。鬼愿共你捱贫？
    (生唱)唉，我不过暂时累你遭苦困，终有日大富来临。
    (旦唱)请问你何时，至得你穷鬼会转运。我冇咁得闲再为你等吖。
    (生唱)唉！妻呀要想真，
    (旦唱)想去想来都要另配婚。
    (买臣：阿如花，你须知女慕贞洁，自当从一而终至好。你何必又要贪慕虚荣，我话畀你听，你千祈唔好畀啲万恶金钱，累到你一失足成就会千古恨！

     如花：喂！我而家唔得闲听你讲古嘅啵！要你写分书，脱离夫妻关系，大家各行各路，此后休管女嫁男婚呀)！
【妆台秋思序衬白】
    (买臣：唉吔，好好。虽则夫妻本是同林鸟，唯是大难临头都只有各自飞。好啦，我唔写都唔得！  如花：快啲写啦)！
买臣【妆台秋思】
    下笔痛苦已万分，写分书令我断肠甚。小书生抱恨痛心，杏已出墙羞不禁。家声破，真不幸，我带病都更被刺激深。拆散鸳盟，恨赋仳离绝爱分书写了，令我长怀恨。
     (如花：写完未呀？买臣：嗱，写好喇。如花：畀我睇过先。呀，得啦。噉样唔该嗮你咯啵朱先生。 买臣：你死啦你)！
【滚花】
    (旦唱)唉吔本来我都好唔舍得你咖，
    (生唱)哼！我真多谢你呢个无廉崔氏，你刺激起我今后，我都奋斗去做人！
                           曲终