2018年1月26日

方卓如 方如玉帅

如此年代

现在是什么年代？是冷漠到无反应嘅年代。任何新闻过了一星期，除非是局内人，否则社会就毫无反应。例如高官僭建，只要捱得过一星期没有更大发现违规违法，社会就变成麻木，唔再当系一回事。议员DQ更加引唔起什么关注，一日货仔，隔日冷却，边个可以选，边个唔可以，唔会引起任何人关心。就连股市都系，创新高，成交大增，麻木晒。楼市相继破顶，卖地比去年同区又贵五成，sorry，大家无晒反应。正如真正嘅周大师星驰响《喜剧之王》开场时说，人受咗太大打击，会进入咗精神官能休克状态，唔会再有任何反应。全社会都进入了这种状态，任何事都冷漠到冇晒反应。

专家都无料 ICO满障碍

现在是什么年代？是无料扮四条嘅年代。通街都系专家，收你钱话你知你一早知嘅嘢，例如ICO。而家筹备中嘅ICO数以万计，最肥仔嘅就系帮人搞ICO嘅传统专业人士。佢哋对ICO完全无认识，自己未买过crypto，对呢样嘢都好怀疑，唔明白点解有人会买。但偏偏好多人走上门，问佢哋点搞ICO，仲要佢哋帮手搞ICO，因为到你要搵人问嘅时候，传统嘅专业人士系你唯一选择。佢哋收你高昂费用，在佢哋识嘅范围搞一大轮你唔系最需要嘅嘢，至于你最生死攸关嘅问题，佢哋嘅答案可以系「唔在咨询范围内」，叫你去搵第二个；又或者进取啲，答咗你，但同你讲呢样嘢太新，唔敢包行唔行得通。但最绝嘅系，你件ICO系全球通行，我答得你呢个国家安全，唔代表去到另一个国家你冇事。结论系，钱你就使咗，一堆文件你就攞咗，但你个心都系十五十六，唔知自己啱定错。

现在是什么年代？是要求你乜都识嘅年代。你读书学到嘅知识，到你出嚟社会做事，已经完全用唔上。你若非边做边学，不断将自己嘅观念更新，日日都打倒昨日的我，你根本无法生存。

书本话你知，加息会令股市楼市跌，但而家加息，股市楼市依然直线上升。你用你读书嗰套走去沽空股市？今日你输到连买呢份报纸嘅钱都冇。从来未试过淘汰旧观念嘅速度会系咁快，而家做事慢一步你都冇饭食。

如此年代，你顶唔顶到？