2017年10月31日

方卓如 方如玉帅

要有青春或银纸做本钱

iPhone X热卖，全世界iPhone概念股实时弹升，Apple股价亦创新高。我之前写过，9月Apple产品介绍之时，股价实时下跌，尤其是临尾介绍iPhone X嘅时候，直情系反高潮。介绍会之后，股价更加冇起色。我亦讲咗，之前iPad都系同一路数，就算Steve Jobs亲自介绍，外界都系泼冷水，股价向下抗议。不过，时间又会证明Apple新产品终归渴市，市场又会发现Apple又有一件大卖产品，股价最后都要破顶。iPhone X再一次令市场相信，Apple还有能力推出令人抢购嘅产品。

雷蛇（01337）周三招股，但认购阅文（00772）嘅资金未赶及回笼，所以认购嘅投资者未必可以再一次瞓身。阅文招股撞正10月尾，市场资金多人争逐，唔系个个都可以借尽入飞。雷蛇同阅文、众安（06060）都一样，唔系靠盈利做卖点。而家嘅股票，唔赚钱嘅公司反而多人争，情形似唔似2000年？分别只在于2000年唔赚钱嘅公司大细都有，今年只有大晒士嘅公司可以用蚀钱嘅成绩卖股票。而2000年嘅时候，大家都未知呢类蚀钱嘅公司将来点赚钱，但今时今日，买蚀钱公司嘅股票，你相信自己系买紧平货，因为他朝赚钱嘅日子必定降临，而到时就唔再系呢啲价。

仲有一点，2000年同2017年有好大分别。2000年嘅时候，年长嘅中年人都可以扑出嚟，搞档dotcom呃吓人。当年科网嘅门坎极低，任何人攞个domain都可以变科技人，搞科网股。今时今日，科技股嘅门坎极高，一系你有青春做本钱，否则你就要有银纸做本钱。只有真正年轻，识得谂用科技颠覆传统嘅；又或者真正有钱，可以雷霆万钧强势起坛嘅，先有本事玩得起科技生意。如果又老又冇钱，想沾手科技赚钱，可能只有靠响先达租间铺炒iPhone。而家嘅科技生意太扎实，冇得靠吹水。人工智能，blockchain，cryptocurrency，你识咩？网红开店一年卖3亿货，你得咩？传统嘅business centre而家变咗WeWork，以前鸡记而家变咗GoGoVan，你谂到咩？

2017年唔只系科技股再一次抬头，更加系见证了传统行业急速被加入科技元素嘅升级版取替。