2017年11月1日

方卓如 方如玉帅

做得大 蚀钱都有前景

加泰罗尼亚独立不成，而家连自治区主席都走咗去比利时，寻求政治庇护。西方国家咁民主，左胶当道嘅社会，对付独立都绝不手软，倾都冇得倾。就算你唔系真独立，想用独立做筹码，攞多啲自治嘅权力都唔得。证明政治最后都系讲实力，你唔够实力去完成政治目的，到头来只会焦头烂额，一事无成。加泰罗尼亚未有自行独立嘅本钱，亦未做到全民同心，后果就系宣布独立嘅领袖变成叛国犯。

香港比加泰罗尼亚更加冇条件，北京比马德里更加唔会手软，年轻人要认真留意吓加泰嘅处境，未来系比而家凄惨还是比而家开心。讲得太响但却达唔成嘅政治目的，自身同社会一样受害。

雷蛇（01337）蚀钱可以上市，上咗市嘅公司缩皮蚀少少反而要DQ除牌，其实系乜嘢逻辑？生意有兴衰循环，市况唔就，生意缩皮，股东唔喜欢嘅可以在市场沽货退股，死守嘅，可能等公司管理层有新概念，更实际嘅系等公司搵炷好人家，卖壳由下手打理。利伯维尔场，咁系非常合乎商业运作。

等好人家接手，自然会将公司搞到有咁简单得咁简单，接近冬眠状态，咁先有利下手接盘上场；当人哋搞到自己干干净净，冬眠搵下手，你走去DQ人，将人哋挽救公司嘅心血化为乌有，系咪最有利投资者嘅做法？

雷蛇现在蚀钱，下年好大可能又蚀钱，券商最乐观估计2019年先赚钱，咁你凭什么断定一间冇硬资产嘅公司，未来两年都唔赚钱嘅公司，3年后唔会倒闭？又或者唔会被另一间雷龙电蛇取代？科技公司，三两年就可以迅速冒起， 又可以极速滑落。

如果你可以嫌人细蚀少少而要人除牌，点解一间蚀得劲嘅公司反而会揽住嚟锡，欢迎上市？

结论系，要成功，唔好先谂赚钱，先谂如何做大。做得大，蚀钱都有前景；做得细，赚钱仍然等死。