2017年9月14日

方卓如 方如玉帅

从来冇生涯规划

Apple嘅产品发布会，识睇梗系连同股价图一齐睇。唔讲你唔知，成程介绍会一直进行中，股价好哋哋一直上升，但系一到介绍iPhone X之时，股价随即掉头向下，全日倒跌收场。奇就奇在，iPhone X一定大卖，求过于供，卖到出iPhone XI都仲有人等紧，而咁好卖嘅产品都支持唔到股价？莫非投资者见到啲平常人见唔到嘅利淡讯息？

唔使乱谂，你睇番历史，大多数时间新iPhone公布后3日，股价都系下跌。但结果系点？结果系任何一部新iPhone推出嘅时候你买Apple股票都赢，所以你唔好误会iPhone X是否有问题，市场唔接受。迭埋心水谂计去买呢部你有钱都买唔到嘅iPhone。

谂番起10年前Steve Jobs第一次介绍iPhone，佢只系视iPhone为集打电话、听歌、上网功能嘅新工具，全因为全世界手机数量咁多，iPhone只要占市场百分之一都已经唔得掂，有信心做电话系有赢冇输，况且Steve Jobs认为iPhone系划时代，重新发明了电话，净系可以听歌嘅电话已经肯定卖到钱。而佢台上示范一啲而家视之为基本嘅新功能，全场哗哗声，佢自己都未知iPhone唔单止改变了Apple嘅命运，令公司成为全世界市值最高嘅公司，仲直接改变了世界，制造了唔少新行业，带挈了一批新富豪。

Steve Jobs系我由细睇到佢大，由Apple II开始，亲眼目睹佢嘅起跌。佢唔知iPhone原来有咁大威力，只系由一部新电话开始，就改变了世界。做人同做生意一样，冇乜嘢生涯规划，唔可以由头计划到尾。

而家创业嘅年轻人，唔使睇得咁长远，见步行步，你或者都可以改变世界。