中国人历来欢喜拿老百姓分成三六九等，古辰光勿是就有一官二吏三僧四道五医六工七匠八娼九儒十丐格讲法么。到了现代，讲阶级斗争了，又行出来个红五类黑五类，弄得大家蛮好格朋友也要互相划清界线，勿敢来往。到了后来，又拿人家知识分子定为臭老九，一记头历史又回到了古代。作孽啊！现在勿讲阶级斗争了，但是等级还是有人要分格，侬想想，交关人刻苦奋斗，勿就是为了做人上人嘛。格么啥人是人上人？古代是官，现在呢？还是官。尽管勿叫官老爷叫国家干部了，尽管装模作样叫作人民公仆了，但是大家心里侪晓得格，伊拉还是排了等级格最前头，跟皇帝手下格官吏呒啥两样。侬勿相信？格么大家来看伐。
       前几天勿是冒出来一句“我们也是有身份的人”吗？我翻了翻报纸，原来讲格句闲话格人自称是公务员老婆，原话是迭能格，“我们也不是完完全全的老百姓，我们也是有一定身份的人，不然不会来香港购物”。听话听声锣鼓听音，人家格句闲话格背后意思就是：完完全全格老百姓勒拉等级制格一二三四里厢是根本呒没位置格，真正格老百姓可能连讲身份格资格也呒没。唉，想想阿拉老百姓真可怜，自以为是主人了，自作多情了几十年，原来勒拉格帮由阿拉供养格“公仆”眼睛里，根本就是一群谈勿上有身份格人。阿拉算啥？奴才？仆人？格么到底啥人是主？啥人是仆？
       格条新闻，背后还有交关疑问，譬如讲，因为是公务员，伊拉一家门参加旅游团费用竟然好优惠2980元，也就是讲打了对折。原来当个官做个公务员有介许多好处，有介许多人会来拍马屁。勿晓得旅行社格笔账哪能算格？假使打对折以后旅行社还能赚炒票，说明旅行社利润实在忒高了，假使打了对折后会亏本，格么伊拉为啥还要做格笔生意？公务员真格可以迭能亨三亨四？连伊拉白相也要供养？还有，亏本格炒票是勿是会摊到别人格头高头？从别人头高头多刮一笔？气人啊！
       另外一点，原来到香港买么事格人并勿仅仅是女人小白领，还有公务员啊，公务员也同样看勿上国产么事啊。想想伊拉公务员，拿了薪水拿津贴，还里里外外捞外快享受优惠，退休养老金又高人两倍，公务事体却做勿好，还好意思？介大格男人，一点点委屈也勿肯受，一眼也勿肯谅解别人格苦处，拆了外快还要投诉旅行社，还是哭诉，最后竟然还讨到了2000元赔偿费外加白住一夜酒店。唉，哪能有格能介格中国男人公务员？勿要面孔！
（2013.5.8.）