有关上海小吃格文章，各位写了勿少，看得我是馋唾水勒拉舌头浪厢一波一波冒出来，咽也来勿及。想想真有点搞勿懂，年纪介大了，哪能还会得像小辰光拨人家刮老面皮格馋佬胚一样？呵呵，呒没办法，吃是人格第一欲望么。
       虽然大家林林总总已讲了介许多，毕过总归还是有漏脱咯，譬如油氽馓子，好象还呒没人提起过。可能勿是到处看得到，吃过格人也比较少伐，伊本来就是外来品种么。
       前几日路过福州路，突然之间一记头想起了猪油菜饭，勿晓得算勿算小吃？冷面算拌面算伊好象也可以算了，反正，总归可以划进“上海特色美食”咯伐。脑子里跳进了猪油菜饭，两只脚就熟门熟路走到了浙江路口，一看，店名已经叫老半斋，“菜饭”两个字倒还是老大格写了玻璃窗高头。走进去，店堂呒没啥变化，还是老大个面积，吃客也勿少，可惜菜饭已停止供应，只有中浪厢有。再看看价目表，菜饭是3块一两，黄豆汤（骨头汤）是7块一碗，还好，价佃还算大众化，平民身份呒没变成冒牌贵族。
       想想廿几年前，上个世纪八十年代，我上班格办公室就勒拉福州路。当时阿拉办公室里一忒刮子只有几个人，呒没食堂，搭伙也呒没地方搭，只好每天中浪厢到处打游击，东吃西吃，浙江路口迭家菜饭店也去吃过好几次，伊个辰光店名叫美味斋。
       办公室里有个长辈，是我一辈子也忘记勿脱格忘年交，伊有个爱好就是“吃”，讲好听点是“美食家”，勿好听么就是“吃客”，上海格老饭店，啥么事好吃啥么事出名，伊晓得交交关，平常里经常津津乐道一样一样讲拨我听，美味斋格菜饭就是伊拖我去吃咯，一吃味道蛮好，就又多去了好几趟。有辰光阿拉只吃最简单格菜饭，再加一碗骨头汤，有辰光阿拉也会点两样小菜，记得有两趟有外地同行来上海，阿拉就勒拉美味斋请客招待，所以讲对美味斋对菜饭侪是算得熟悉咯。
       菜饭，小辰光自己屋里厢也烧咯，毕过美味斋格菜饭有点勿一样，伊叫猪油菜饭，加了猪油两个字，吃口当然勿一样。亮晶晶格白米，绿油油格青菜，油光发亮，既有油水，又有香味道，还有一眼眼咸咪咪，吃勒嘴巴里是津津有味，小菜也用勿着。当然汤是勿能少咯，配套格汤是骨头汤，味道浓，来得格鲜。就格能介一碗饭一碗汤，一顿中饭简简单单，吃了适意，价佃又便宜，比现在快餐差勿了多少。还记得伊个辰光美味斋格生意来得格好，介大爿店有辰光去晚了还呒没座位，亏得基本上侪是吃菜饭，吃得快周转快，就是忙煞了服务员，伊拉人虽然多，一歇歇工夫，粗瓷大饭碗还是一叠一叠堆了老老高。碰到大热天，伊个辰光呒没空调，只有电风扇，店堂低，里厢热得来是还呒没吃已经满头大汗了。呵呵。
       想到了猪油菜饭，老味道又回到了嘴巴里，等下趟再路过，一定去吃一趟，寻寻老味道，老感觉。可惜，我格忘年交已经走忒交关年了。唉，人生一世，稀里糊涂。
（最近本地论坛都在说上海小吃，故以上海话写一篇，凑数。2012.4.27.）