姐夫禮拜五通常未返到香港，家姐自己一個人通常無咩事都會過嚟睇下信丞順便痴餐，但佢無乜交待，通常最後一刻先俾電話「收工後我過嚟食飯」

所以星期五我都會備定多少少餸，家姐來都叫有餸，佢唔嚟我就食多餐。

家姐鐘意食豆卜，又鐘意食粉絲，所以煮佐一個粉絲豆卜娃娃菜煲，煮埋一大煲，唔洗食飯，食菜都夠~~

買佐條盲曹，原本想蒸，睇到雪櫃有凈兩個蕃茄，加上家姐話過嚟，由細同家姐都好鐘意食阿媽煮嘅蕃茄魚，所以索性將蒸魚改為蕃茄魚。

魚撲少少生粉，煎至金黃。

起鑊爆香薑同蒜，加入蕃茄炒軟，落生抽，白醋，糖較味，煮好醬汁，將煎好的魚倒入醬汁煮一煮即成。。。

好開胃好好味~~

蒸多碟臘腸，開飯！

知我鐘意食腰果，提早一晚家姐係屋企預先焗定一大包腰果俾我做飯後果

我同家姐的性格一模一樣，又敏感，又純粹，同我哋相處，少啲功力都唔掂，信丞出世的幾年前，因為一個好細好細的矛盾，兩姐妹大吵一場之後斷絕來往超過五年時間，後嚟係籍著信丞的出世，兩姐妹搵到一個最適當的檯階，合好如初。

一啲芥蒂都無，好似從來無發生過不和事件，憎佢嘅時候，我真係連佢名都唔要聽到，但好返嘅之後，比以前，更珍惜同佢的感情。

某次閒談中我同家姐承諾，就算再俾家姐激怒，就算幾唔認同佢嘅做法，我都會選擇「咕」一聲吞落去，因為我真係好愛好愛佢，唔想再因為一哋好細嘅事令到我失去一個比朋友更親密的人。

家姐聽完之後無出聲，但自此之後，好明顯感覺得到家姐的變化，依家同家姐的相處，真係舒服佐好多好多，佢笑容多佐，脾氣少佐，真心為佢感到開心，亦為自己失而復得的這份感情而慶幸。