清清哋，一個油鹽蒜蓉炒紹菜，好清甜。

前幾日原來想整回鍋肉，行勻成個街市搵唔到靚嘅蒜苗，唯有作罷。

今日都係死心不熄，買舊五花腩，整嘅雖然唔係回鍋肉，不過亦相去不遠，係回鍋肉嘅好姐妹「鹽煎肉」。

回鍋鍋同鹽煎肉最大嘅區別在於肉嘅處理，回鍋肉係先烚熟五花腩，再切片回鍋煎至乾身，而鹽煎肉，係生嘅腩肉直接切片落鑊煎至乾身，其它嘅步驟同配料，基本上一模一樣。

準備嘅配料有「蒜苗、豆瓣醬剁碎、豆豉粒」

蒜苗幾時都比肉好味，所以落多啲，買佐半斤。

今日買嘅腩肉有少少肥，不過唔緊要，切極薄片，落鑊慢慢煎至油逼出嚟，食起上嚟，不覺油膩。

因為逼佐好多油出嚟，多到要傾走好多油，先可以繼續炒。

所以炒腩肉依個步驟，無需落油，只需要生嘅肉落鑊，慢火俾啲耐性慢慢翻炒，就會自己走好多油出嚟。

腩片煸炒至乾身之後，倒入豆瓣醬同豆豉煸出香味。

趁熱倒入蒜苗翻炒無需炒太耐，蒜苗好易熟，炒得太耐就會失去佢嘅爽甜，會起渣無咁好食。

起鑊之前俾啲砂糖，中和個辣度，增加鮮味。

因為我用嘅係四川豆瓣醬，味道偏咸味，所以我無額外俾鹽或豉油，已足夠咸。

勁好送飯嘅一碟餸~~~

簡單兩味，開飯`~~~