自細就好鐘意中秋前後嘅日子，好多好多鐘意嘅食物都大量上市。

譬如栗子，芋仔果啲。。。。

早排中秋前後，無停過買芋仔同栗子煮食。


好難得係一個檔仔見到依款長身嘅芋仔，好鬆化，好香芋味。


鐘意隔水蒸熟，貪其味道更甜。

某日晚餐。

蒜蓉炒椰菜。

麵豉炒青豆。

買佐一舊梅頭肉，鹵甜肉（叫甜肉，其實係咸中帶甜，好好餸飯），有興趣可以在我博客內搜索以前寫過的做法。

好滿足~~~

薑汁煎肉片。。。。


父親最常煮俾我嘅一味餸。


肉片挑選梅頭近豬頸肉嘅位置 ，既爽又香。

肉切片，用豉油、黑糖、米酒、少許生粉、少許清水、大量薑絲，味道偏甜味，醃大約半個鐘。

鑊底落少許油，開中細火，慢慢煎至熟透，全程無落水。

我細個時，無胃口食飯，父親必定煎返一碟仔咁樣嘅薑絲肉片俾我，帶少少汁（最後落少少水，就會有汁），咁我就會非常滿足地食完餐飯啦。


自己煮嚟，味道同記憶中父親嘅味道，已有八成相似~~~

又滑又香口嘅一碟炒肉片，引得強哥一片讚賞~~~

再炒個蒜蓉生菜

簡單兩味，開得飯~~