頭先睇電視，超複雜煮個焗豬扒飯。

昂貴的食材，繁複的次序，未食已先驚。

普通人家，最緊要材料就手，價格實惠，操作簡便，想食，隨手就煮到出嚟。

尋日真係好突然地，想食焗豬扒飯。

立即煲定一煲飯，落水稍少，咁就煮到比較乾身嘅飯出嚟。

1，然後用甜粟，火腿，青椒粒，蛋，炒佐一個飯底。

落少少鹽俾味。

樓下買佐盒豬扒，都係二十蚊有找。

簡單地用「豉油糖胡椒粉蛋白」醃半個鐘。

2，然後落少少油，甚至係頭先炒飯未洗嘅鑊，直接落油，煎至兩邊金黃至熟。

煎得剛剛好，入邊總有少少濕濕哋。

3，將飯倒入耐熱碗度，煎好嘅豬扒用剪刀煎成一塊，擺上飯面。

4，稍洗個鑊，落油煎香乾蔥同蒜蓉，倒入去皮蕃茄炒，落茄汁，少少糖，喼汁俾味，唔需要落鹽，因為飯同豬扒入邊已經有咸味，茄汁係要增添甜酸味配合個咸味。

5，將茄汁倒入豬扒面，撒大量芝士，入焗爐擺上架，焗至芝士金黃融化。

一啖干爽香噴嘅炒飯，配埋香軟嘅豬扒，一層甜酸嘅茄汁，再加埋香香芝士，味道,不言而喻~~~~

煮佐兩杯米,同強哥係咁食到唔停口,全部掃清光,睇老公個樣,意猶未盡咁~~~~

尋晚睇電視,做法真係不敢苟同,個肉經過咁多次煮法,肉味都衝淡曬啦,茄汁係要起到畫龍點睛之處,食到個味已經足夠,電視上落到咁多茄汁,搞到好好嘅炒飯變到濕漉漉,咁又洗乜多此一舉先炒佐個飯咧.....

不過喜好依家嘢,悉聽尊便啦,最緊要自己鐘意,點方便,點好味,就點煮,烹調之美妙,在於能夠盡顯個性,唔洗墨守成規嘅~~~