猜谜乐

作者：孙宏彝

沪语改写：姚琳

讲述：王邦基

文字、语音审核：丁迪蒙

编辑：王乙其 

“谜语“又称作“叟辞”、“隐语”，上海人叫伊“谜谜子”。据说，猜谜谜子历史悠久，最早是出自中国个易经八卦。

https://mmbiz.qpic.cn/sz_mmbiz_png/lo6yceUgyI1c7fgd3SZuZgJ9tiaAJXCib6ycbcosv4CG5K7APmjfPJibhyCEeM11tk7Qyqd7ZjCdVrT9Fic79pgRtg/640?wx_fmt=png&from=appmsg&wxfrom=5&wx_lazy=1&wx_co=1

记得小辰光，勒小人书里向就会得看到交关大家侪晓得熟得勿得了个谜谜子，譬如“麻屋子，红帐子，里向住了个白胖子”（打一果实），迭个谜谜子讲个是花生；还有，勒下课以后白相个香烟牌子，背面有辰光也有得谜谜子印勒海，我看到就老感兴趣个，勒“刮香烟牌子”白相个辰光，也顺带便增长、拓展了文化知识，我还常庄拿得来拨同学伊拉猜。经过勿断个演变、发展，猜谜谜子已经变成功一只大家逢年过节辰光个助兴活动，老百姓侪老欢喜个。

1999年2月，年初五埃日天个夜快头，我搭屋里向人到城隍庙去看彩灯。进去一看人是潽出潽进呀，过来看灯个市民造造反反，各式各样个彩灯勒商店门口挂勒海，造型别致，争奇斗艳。勒一家商场个三楼，好凭入场券参加“有奖猜谜”活动个。

https://mmbiz.qpic.cn/sz_mmbiz_png/lo6yceUgyI1c7fgd3SZuZgJ9tiaAJXCib6WU8G3CtpSy16icxMkv1W88BZ6SicE2Om2OlFyShG7ThckHddRPtbrbSQ/640?wx_fmt=png&from=appmsg&wxfrom=5&wx_lazy=1&wx_co=1

有只谜面是：古代天下第一声（打一景点），我马上就猜出来，是“故宫”，奖品是只钥匙圈；埃下来我又猜中了另外两条：泰山（打一字）、大脚（打一字），谜底分别是“仗”搭“距”，奖品是只可爱个戴草帽个洋娃娃。一等奖个奖品是只老大个洋娃娃，但是谜面只有两三条了。我选了其中个一条：黑面包（打一颜色）〈卷帘格〉。

卷帘格是一种谜格，又称倒读格、倒卷珠帘格，谜底文字要从下朝上倒读以后再对得上谜面。我想：黑面包末就是面孔黑黜黜个包拯，大家侪叫伊包青天。因为是卷帘格，所以倒过来就是天青，天青刚好是深黑带眼红个一种颜色。我自认为迭能个推断呒啥破绽，但是，工作人员翻看答案之后笑笑，讲：还是推板一眼。

周围个人看阿拉猜一只中一只、捞着交关奖品，侪有点眼热。有几个小人个家长偷偷叫托我帮伊拉猜几只，我就拣三等奖个帮伊拉猜了几只。埃日天回转去之前，我悄悄叫个问工作人员：“黑面包”个谜底到底是啥，伊晓得阿拉要跑了，就用上海闲话搭我咬耳朵讲“shang青”，又告诉我迭条谜谜子已经有好几天呒没人猜中了，我好猜到介接近已经老勿容易了。我估计“shang青”可能是“藏青”，但是搭我个答案相比较呢，还是觉着我个谜底答案好像是更加贴切个，因为是卷帘格个要求嘛。

https://mmbiz.qpic.cn/sz_mmbiz_png/lo6yceUgyI1c7fgd3SZuZgJ9tiaAJXCib6Ee8f8AyXCBjcuyibic0Z5Wg3bwHm58BLeo271EjF8zKpnoZMS0AV94Bw/640?wx_fmt=png&from=appmsg&wxfrom=5&wx_lazy=1&wx_co=1

2012年个元宵节，阿拉屋里个居委勒活动室也做了场猜谜谜子个活动，为了大众化，出个题目侪比较便当，居民侪兴致勃勃个翁勒一道竞猜。我只是勒人少个地方猜猜，中个奖品是一包五只塑料大夹子，晒被头辰光好夹夹，倒也蛮实用个。所有个谜谜子最后只剩下来两条呒没人猜出来，我反复推敲之后，选了其中一条。埃条谜谜子是“高丽飞鸿”（打一古代人名），尽管我猜到是“韩信”，但是工作人员讲：奖品已经侪发光了。虽然奖品呒没了，但是拨我猜出来了，心里向也是邪气开心个。

勒勒迭一日个前一天，街道勒公园里向也开展了猜谜谜子个活动，我中了两只好折叠个小个红灯笼。两只字谜是：主动一点（谜底“玉”字）、硝酸加盐酸（谜底“汪”字）。发奖品个工作人员夸奖我有化学知识功底：硝酸搭盐酸按一定比例混合之后，俗称“王水”啦！有个游客交关喜欢小个红灯笼，用一只彩色风筝搭我调了一只。

2018年个元宵节，街道图书馆也搞了猜谜子谜活动，我一记头猜中了四只：内有一人（谜底“肉”字）、一一入史（谜底“更”字）、十日雨水（谜底“洵”字）、上下四方平安（谜底是地名“六安”）。

https://mmbiz.qpic.cn/sz_mmbiz_png/lo6yceUgyI1c7fgd3SZuZgJ9tiaAJXCib6XoMWFD4kcCXkIZ3PvNsBAtBWUKUIV98ZSjNibaHTBZH3633whcNANNg/640?wx_fmt=png&from=appmsg&wxfrom=13

猜谜谜子，是种有广泛群众基础个娱乐活动，伊既要有一定个科学、文化知识，也要有一定个智慧。每当经过苦苦思索，最后终于寻到正确个谜底时，有一种“蓦然回首，那人却在灯火阑珊处”个感觉，埃种介个乐趣啊，就像欢喜钓鱼个人拿上钩了个鱼一记头拎起来个痛快。我体会到，猜谜谜子有眼像“脑筋急转弯”，伊要绕过几只弯，再好最后寻着正确个谜底；伊又有眼像流传民间个歇后语：前头一句是谜面，后头一句是谜底（当然歇后语难起来也是老难个，比方讲陈望道先生勒伊个《修辞学发凡》一书当中举过迭能一只例子：猪八戒个脊背——无能之辈）。

破谜个技巧啊，关键勒勒“别解”，要有意识个利用汉字、汉语个特点进行曲解，进行非常规个思维。猜谜谜子，真个是一种娱乐身心，启迪智慧个好活动啊！

https://mmbiz.qpic.cn/mmbiz_jpg/lo6yceUgyI07ykNtTIZmgaLefy71HXcAib00xicJbscvdjqMX1p29suicDkmCmxLVl5BE0MFEqxy8iaiafwVsFk3g4A/640?wx_fmt=jpeg&tp=wxpic&wxfrom=5&wx_lazy=1&wx_co=1

作者：孙宏彝

https://mmbiz.qpic.cn/mmbiz_jpg/lo6yceUgyI3OSa03EdtEtu4gkX077axHh1rPm6GyDl8UaLP8OvS51NZ3vtEQSOHWyFHS3dTOF0yVAjPAA6rsbw/640?wx_fmt=jpeg&tp=wxpic&wxfrom=5&wx_lazy=1&wx_co=1

讲述：王邦基