沪语诵读《钱源个墙绘艺术》

(2022-11-13 08:33:31)

标签：

教育

文化

分类：孙宏彝专栏

钱源个墙绘艺术https://mp.weixin.qq.com/s/klQlO8Xfh0leATEsmfruDg

原创孙宏彝启迪心田沪语 2022-11-13 07:00 发表于上海

作者：孙宏彝改写：丁曙立讲述：刘引烽指导、推荐：丁迪蒙编辑：王乙其

钱源个墙绘艺术音频：00:0005:23

搿几天，勒水电路车站南路交错个转弯角子浪，交关来来往往个人会得勿由自主个停下匆匆个脚步，一幅巨型墙绘创作像磁铁一样吸引了伊拉个眼球。一位画家勒升高个机械车厢里正面对高高个楼墙勒认认真真个画一幅大型个彩色画。

勒我看来，搿是幅科普宣传卡通画，画面主体是一个活泼、可爱个小囡骑勒勒甲壳虫个背浪，手里向叉勒只红苹果，朝天空中调皮个趴勒三角风筝浪朝伊飞过来个小熊猫伸过去。搿幅墙绘画得有眼夸张、富于想象，色彩绚丽，伊所含勒海个思想搭所要表达个意思邪气耐人寻味，值得深思，但是，美中不足个是交关人侪勿认得搿只老大个甲壳虫。我勿晓得搿幅画叫啥名字，不过勿要紧，相信观众看了画之后会得基本浪读懂并理解作者创作个意图搭仔目的个。

老早勒国外城市，我也曾经看到过勒闹猛个街浪向，一幢房子个墙面浪画了一个活泼个长发少女个巨大个头像，搿画勒离马路老老远个地方就可以看得到，勒视觉浪受到邪气大个冲击，当时觉着惊讶、新鲜；勒车站或者一眼隔离墙个地方，看到更加多个是眼喷涂个艺术文字。

墙绘，是一场新型个“色彩实验”，国内么，老早倒勿大看得到，就是勒上海，文化内涵属于比较丰富个东方，到目前为止，总共只有三十几幅。我搿趟邪气幸运，总算看到墙绘是哪能介完成个了。勒国外看到个是写实头像，搿趟是充满童趣个科普卡通画。

说来也巧，就勒搿幅墙绘完工个搿天下半日，勒居民区小花园健身活动个地方，我看到好像有人勒采访一位年轻人，年轻人对面架勒海一只看上去蛮高级个照相机，好像还勒录音、录像。从一问一答交谈，我隐隐约约听出搿位年轻人就是居民楼墙绘个创作者。

我马上来了兴致，对创作者邪气感兴趣。乘采访暂停个间隙，我插进去搭伊聊起来了。伊个名字叫钱源，今年27岁，人看上去谦虚，邪气精神。伊告诉我，搿种墙绘其实有眼像外国个涂鸦。我问伊搿幅画体现啥个含义。伊讲其实是想通过画体现人搭自然个和谐相处，教育、引导儿童从小就要懂得敬畏自然、保护环境，爱护动物。伊拉采访辰光紧张，我没办法更加多个、广泛、更深入个谈下去。

转去之后我上网查了。了解到钱源是StoneCrew涂鸦艺术团个自由涂鸦人，也是今年立邦以“儿童关怀和动物保护”为主题个“为爱上色”专项基金项目个主笔人。搿幅墙绘个左上角有伊个签名，右下角则是“为爱上色”搿四个字。搿个项目邀请国内外知名艺术家搭仔设计师，深入城市、山区搭农村，创造独特个艺术人文风景。勒城市，主要通过创作墙绘来加强社区互动，呼吁城市里向个人关心儿童搭大自然。

今年七月份，钱源曾经拨请到甘肃个群山环绕个一只学堂去，创作了以熊父子为主个《我搭爸爸》个墙绘：小熊骑勒大熊肩胛浪，脚伸出去捉挂勒树浪个蜂蜜。

上个号头，伊又勒上海鞍山路锦西路口个居民楼墙浪完成了《新渔童》，老老大个鲸鱼勒蓝天下头自由飞翔，邪气有艺术个魅力搭感染力。

我曾经盯牢仔问小钱搿个项目个具体流程，伊讲只晓得项目是带公益性质个，伊只管具体创作、蹲勒上头画图。

我看，墙绘搿门艺术尽管还没能够登入高雅之堂，但由于伊贴近生活、美化环境，为普通百姓所喜爱搭接受。因此，搿种艺术形式还是有得广阔个创作天地搭发展前景个。

我勿晓得钱源个生活经历是哪能样子个，但是伊真诚、朴实，看上去邪气阳光，相信伊勒墙绘搿门艺术个创作当中会得有更加大个发展，会得取得更加大个成就。

丁迪蒙

迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。