梁正刚印·岭南之春

 

立春（广州话）

冼启明

斗柄指寅宫，吹来係暖风。

田边啲草绿，山上嘅花红。

食碗生鱼粥，嚟支炸米筒。

年头盘算下，大计告叔公。

 

和冼启明立春（广州话）

吴大元

逛逛上元宫，出街避避风。

观音山树绿，水塔基花红。

勝记鱼生粥，南洋手电筒。

藤箱冇乜用，小雨送师公。

 

雨水（广州话）

冼启明

水喺五行生草木，一春冇雨禾难熟，

求神畀个好天时，设法开源防变局。

 

惊蛰（广州话）

冼启明

老窦唠嘈叫落田，醒来窗外雨绵绵。

翻泥用力身酸软，唔敢偷闲负上天。

 

和冼启明惊蛰（广州话）

吴泽江

开门就见水和田，细路年时忆念绵。

跟着阿嫲猪仔养，满捞蒲蕎累成天。

 

春分（广州话）

冼启明

今朝日出正东方，已到开耕有排忙。

水少却惊苗旱死，雨多又怕地遭殃。

睇嚟靓嘢先拎用，谂到衰咩早预防。

喂饱只牛犁备好，祛湿除菌食葱姜。

 

吴泽江诗并书

 

羊城夕照（广州话）

周敏基

闲嚟走上海珠桥，感觉河堤景色娇。

睇见红棉花吐艳，又逢霞落好妖娆。

 

草赋（感怀师道·广州话韵）

李景超

至诚能染无边绿，野火难烧不了魂。

织就千秋春绵绣，堪称一等大功勋。

 

无 题

李景超

咪话方言冇内涵，精通其实好艰难。

老兄当係烂柴擗，仲要摼埋啲瓦罉？

 

杂 感

李景超

其一

  贪生怕死可怜虫，两面三刀变色龙。

  最是难堪青白眼，憎人富贵厌人穷！

 

其二

  附势趋炎犹可恕，阴谋诡计乞人憎。

  民情咪话唔中用，边个千秋跪岳坟！

 

七绝·三八节偶成（广州话)

冯健钊

虎乸今天扮富婆，三茶两饭仲K歌。

平时为我捱驴仔，咁鬼开心有几何？

 

醉夜游园（广州话）

卓姬

公园灯暗影朦胧，几处徐娘傍老公。

晕脑晕头生尿急，一旁听雨入花丛。

 

老 妻（外一首）

卓姬

鸡啄唔断话成箩，周日禀神理事多。

欲辩无词还一笑，难能矜贵在人哦。

 

雀局众生相

雀枱拍烂嗌声喧，鬼噏唔停猛袋钱。

懒理旁人烟屎计，鸡鸡鸭鸭又重圈！

 

老友记（广州话）

冼启明

咿生相处係缘逢，抬望长天冇极终。

唔讲旧时鸠屎嘢，山亭共赏晚霞红。

 

旧阵海皮夜泊一景（广州话）

卓姬

孖舲艇尾狗看鹅，入夜埗头有贼哥。

拖友行堤晕嗮浪，咆恒吠出蜑家婆。

注：“友”读上声“柚”。

 

何门遂国画

 

即事(广州话)

李景超

血染帽徽红五星，舍生忘死作长城。

浩然气不容污蔑，耿耿丹心照汗青。

 

解放军中印界河打狗（广州话）

卓姬（仇焯基）

摩啰叉鬼胆生毛，关圣爷前舞大刀。

社稷安宁凭血换，阿三尘绝罪难逃。

注：红头阿三，印度人。

 

学野 (广州话)

紫燕

一打泡泮溪，三巡可横犁。

纽纹原有路，鸠噏共提携。

 

出院感怀

苏绍怀

鸟上青天得自由，鱼归大海乐幽游。

离开医院开心笑，别了同房有泪流。

感激医生 叶教授，难忘护士我回眸。

人间大爱真情在，谢谢连声作报酬。

 

萧远荣书品

附录廖凤舒广州话咏史诗九首

秦始皇二首

一

荆轲吓失佢三魂，好在良官有搬亲。野仔执番条烂命，龟公害尽几多人。

监生点解嚟陪葬，临死唔知仲拜神。万里咁长城一座，后来番鬼当新闻。

二

六国吞埋擸下鬚，安心就咁着龙袍。收齐废铁烧铜像，堆起新书透火炉。

过海点嚟求味药，当天仲去贴张符。既然慌到江山箖，生仔唔该叫阿胡。

 

汉高祖二首

一

荷包冇货仲招呼，外父公真眼色高。皇帝着条龙打种，功臣当只狗掹毛。

乱嚟射尿淋人帽，诈去屙茄避把刀。唔系打蛇随棍上，江山点得到渠捞。

二

几句歪诗大炮车，唔通咁就吓人咩。老婆恶马封亲戚，野仔真狼食伯爷。

用到军师屙削屎，做成皇帝笑依牙。霸王已自乌江丧，边个同渠拗手瓜。

 

楚项羽

声大条腰又咁粗，杀人放火乱糟糟。恶爷点忿嚟丢架，病佬唔啱就掟煲。

两条公婆流出尿，八千人马剩渣毛。吟诗睇白吟唔甩，跑到乌江就一刀。

 

萧 何

一入咸阳屎眼松，擸埋数簿去充公。出身咪笑衙门仔，发脚嚟追裤裆虫。

几只武牛唔忿气，成班猎狗咁争功，若然皇帝唔开口，打到登时乱晒笼。

 

张 良

阔官散尽咁多资，只恨龟公死得迟。执起草鞋交伯父，落埋蚊帐做军师。

惯孖皇帝撑擡脚，怕见行家铲地皮。仲估练仙唔食饭，原来借意就溜之。

 

韩 信

单单婆乸眼睛开，棍咁光时冇睇衰。点忿低头钻裤裆，分明打手上擂台。

相爷趁势吹几句，老将登时震起嚟。咪估书锥唔识相，果然黑狗就当灾。

 

陈 平

撇落书包就带兵，阿哥绿帽戴唔成。生嚟剥壳鸡春靓，重比黐金狗屎腥。

猪肉分匀唔过称，龟头缩住咁灵擎。若然唔得周丞相，撞板当堂撞到正。

 

吴大元国画