每日工作時間咁長，就算朝9晚5唔駛OT，全日唔計瞓覺，已經有大半時間「奉獻」咗俾工作。既然留喺公司咁耐時間，當然要好好對自己，注意各種影響健康嘅小細節！

 

• 用mouse pad：長時間打字同用mouse，如果無一個軟墊承托，長期落去好易令關節勞損。揀返個舒服嘅mouse pad同keyboard pad，減低對手腕嘅傷害。
 

• 椅背靠墊：喺公司要經常用電腦，好多人都慣「哄」埋個熒幕度，就好容易會成日「頸梗膞痛」。其實正確坐姿係要成個背脊貼住椅背，可以喺椅背放一個厚得嚟又有承托力嘅靠墊，等自己坐得舒服啲。

 

• 清潔電話：公司嘅清潔阿姐可能都會幫你抹下枱，但平時每日用嘅電話聽筒上面嘅細菌，分分鐘比枱面仲多。有美國研究指出，電話嘅含菌量甚至係廁所板嘅400倍！試諗兀下平時用化咗妝嘅面直接貼落個聽筒到，又日日噴咗咁多口水落去，所以絕對要定期用酒精紙巾抹下，保持清潔。
 

• Add some green：枱面可以放一盆小植物，除咗可以裝飾下枱面，得閒望下對雙眼嘅健康都有幫助架。植物例如仙人掌（不過亦有人話放仙人掌喺枱會影響人緣）、吊蘭、鐵樹等，據說可以防輻射同吸收空氣中嘅有害物質，例如影印機釋出嘅苯。