蠟髮知識
　

要髮型持久，少不免會使用定型產品，日日用又洗唔乾淨，頭油加上產品油份會阻塞毛囊，輕則傷害髮絲，嚴重的會引致脫髮。
定型噴霧：一般含有小量酒精及化學物，用得多容易抽乾頭髮水份，令頭髮變得脆弱易斷。
髮泥：含海泥及植物油份，會黏附在頭髮及頭皮上，若長期使用又清洗不當，容易阻塞頭皮毛孔，嚴重會造成脫髮。
鹽粉：因呈粉狀，造型時容易灑落在頭皮上，若本身有傷口，容易引至發炎。
造型霧絲：性質相對溫和，近年的出品更加入修護成份，而且只會停留在頭髮鱗質表層，並屬水溶性，容易清洗。

　
拉傷
　

我束長髮，紮馬尾幾乎係指定動作，去蒲，更加要蠟到 all back示人，簡約有型，仲有輕微提升輪廓效果，直至……發現髮線稀疏見頭皮，才急急改變分界位置，同時使用加入人參、乳木果油等成份產品，有助激活毛囊、強韌髮絲。

　
Q：紮馬尾時，我經常大力梳頭，頭髮折斷及打結情況愈來愈嚴重，點算？
　

A：太大力梳頭，會令頭髮表層鱗片因磨擦而受損，同時會產生大量靜電，令頭髮變得蓬鬆及更易打結。於吹頭或梳頭前，搽上順滑噴霧或護髮油，當中的修護成份，可以即時撫平毛燥，減少打結。

　
Q：長期紮馬尾，前額變得稀疏，點補救？
　

A：紮馬尾時，會隨毛囊相反方向拉扯，導致頭髮近毛囊位置折斷。平日多用齒頭有按摩膠粒的梳來梳頭，能加速頭皮血液循環，以刺激頭髮生長，配合含角質蛋白洗頭水，令髮質更強韌。

Q：我經常用熱風吹乾頭髮，最近髮質變得暗啞又易斷，有冇預防方法？

A：熱風會讓頭髮水份大量流失，導致髮絲鱗狀表層張開而變得不夠順滑，影響光線折射，頭髮顯得更暗啞。吹髮前，在髮絲中至尾段搽上 leave-in treatment，可以修復鱗狀表層，令頭髮有番光澤。

　
色傷

Q：連續漂染頭髮，頭皮開始生頭瘡，可以點？

A：漂染過程會令頭皮水份流失，令水油分泌失衡而生瘡。洗頭時切忌用熱水，會加速油份流失。同時要逐束拿起頭髮，輕力拍打近頭皮的髮根，製造空間，讓水份能夠沖走頭皮內污垢，之後敷上頭髮和頭皮專用的水份 mask，日子有功，就冇咁易生頭瘡。

　
Q：染髮後，頭皮幾處被染了色，同時感覺頭皮有點痕，有咩解救方法？

A：如果本身頭皮極乾燥，很容易有「乸」的感覺，可以先敷上有效滋養頭皮的 mask補充頭皮水份，如果情況不太嚴重，用幼粒潔面磨砂膏，輕輕打圈推走色素，以免化學物繼續傷害頭皮。

Q：想經常轉換髮色，又怕傷頭髮，有咩方法？
　

A：視乎想要的效果，做 color treatment，顏色經 20-30次洗水才褪色；選擇永久性染髮劑（ Tint Color），顏色深入至髮芯，洗水 30-40次後開始褪色，前者相對冇咁傷頭髮。

靚就要付出代價，經常拉直吹鬈削鬆頭髮，日日轉花款，頭髮傷到不能，所以我轉造型前，我一定為頭髮打定底，之後再用有效去除化學物和污垢的洗髮水，型都型得好安心。

　
Q：我剛電鬈頭髮，今個禮拜又拉直，頭髮開晒叉，點算？
　

A：頭髮結構已被破壞，鱗片打開令髮芯脆弱，容易受污染物阻塞或折斷。使用含有角質蛋白、胺基酸的抗熱噴霧、髮油等，都可以強化和修護受損髮芯。

Q： Set髮後，頭髮上的 styling產品，好似洗極都唔乾淨，𣲷𣲷哋，應該點清洗？
　

A：洗髮前可用小量護髮油，均勻按摩全部頭髮，當中的油份可以修護及軟化打結的頭髮，再以清水沖洗 3-5分鐘，直至油份沖走後再洗頭。