最近阮小儀和金剛主持無線的<<街坊廚神>>，平均收視24點，除口啤不俗外，有網友發現她在節目中忽然靚咗，更熱烈討論她是否整容。本刊收到消息，去年初，小儀與出版社男友黃志輝(Theodore)分手時，曾秘密赴星級整容醫院，整鼻和削腮箍煲。可惜復合不久，男友又玩失蹤，再飛小儀令她傷上加傷。

執靚樣標尾會不成，小儀頻頻叫身邊好友介紹男士給她，無奈暫未有着落。快將41歲的小儀，繼續過dry爆剩女生活。本刊到星級整容醫院直擊，獲院長親證她曾來整容。為求嫁得出，小儀不惜大執搏反身。

在飲食節目<<街坊廚神>>中，小儀明顯由豬膽鼻變成間尺鼻，梯形面變尖面。有好友大讚她靚女時，小儀開心到忘形，不經意自爆在去年曾整容。

其密友透露:「小儀話佢去好多明星幫襯嘅整容醫院整容，係美容界嘅朋友介紹。佢攞咗假先至預約，事關佢想唞吓消晒腫。佢話嗰兩個醫生手勢好好，一個星期左右傷口就好晒，麻醉藥過晒後都唔算太痛。佢怕撞到人養傷其間唔敢出街。嗰陣佢同Theodore(出版社男友黃志輝)拍左幾個月拖，Theodore就飛咗佢。小儀好傷心，周圍打電話向人哭訴，又話好掛住Theodore，掛到訓唔着。佢話之後個樣執靚咗，信心先返晒嚟，仲狂keep fit拍纖體廣告。Theodore見佢瘦咗又靚咗，再追番佢。不過年中Theodore升做尚方文化出版社CEO後，突然潛水，唔聽小儀電話，留言又唔覆，飛多小儀一次。整靚咗都留唔住個男友，小儀好傷心，我哋班朋友就叫佢以後要帶眼識人。」

盡地一煲標尾會

其實小儀一向恨嫁，05年同拍拖7年的理工設計系同學分手後，努力學廚藝，希望以內在美取勝。無奈外形所限，dry足4年。09年在拍檔森美介紹下，認識同樣外形平實的出版社男友Theodore。小儀一向表示想結婚生仔，難怪步入四字頭，盡地一煲變面尋春。

本刊記者直擊小儀幫襯的整容醫院，發覺院內有不少明星整容的照片。由於有接待中、台的「整容旅行團」，故有操流利普通話的護士招待病人。醫院內有數間病房和手術室，設備一應俱全，病人可以留宿。

當記者甫入內，護士便帶記者去會客室，以普通話向記者簡單講解整容過程，其間勁sell兩位院長是院內整鼻和整面高手，又謂有不少明星都幫襯他們。之後兩位院長做完手術，護士帶記者去二人辦公室。記者表示想隆鼻和削腮骨，專門整鼻的金駿昊透過翻譯表示:「依家整鼻唔痛架，最多人想整金喜善鼻，不過唔好一次整得鼻樑太高，整少少效果自然啲!」至於專門整面的金起甲就說:「削腮骨喺口腔內開刀，一定冇疤痕!但做完要休息一星期先可以搭飛機。」

記者用手機向兩位院長展示小儀的照片，昭二人對她有冇印象? 金駿昊說:「唔係好記得!另一位院長金起甲聞言，主動看看照片，然後笑笑口話:「我認得佢!(真係嘅?)係呀，係呀!我記得佢，因為佢好心急返香港，想快啲走，做完手術翌日來覆診，就猛問幾時可以搭飛機!」

小儀:可能狀態好咗

據悉小儀去年去整容時，請了一星期假。周六她去做電台節目，即刻趕搭飛機去，甫落機即做手術。當時醫生力勸她留院一晚，翌日才轉往酒店暫住。由於削腮骨，要休息夠7日才能搭飛機回港。一個星期後，她周五覆完診，搭夜機返港，翌日即開咪做節目。知情人士透露:「小儀同人講佢去咗日本，不過大家見佢冇買嘢返嚟，都唔係好信，原來去咗整容。」

就醫生力證小儀整容，本刊於周三(18日)記者向小儀求證，她表現避忌。

記:記者 小:小儀

記: 有網友讚你個樣靚咗喎。

小: (開心)我拍完<<街坊廚神>>，出街個個見到我都係咁講，讚我真人靚過上鏡!

記: 聽聞你去年初去整腮同個鼻?

小: (尷尬)我真係冇 …….其實我覺得可能係精神狀態好咗，我覺得自己冇分別。近年我識咗黐假眼睫毛，有時有專業人士幫我化妝，打咗鼻影，個鼻咪高咗囉……你問我想唔想整，我想架，但唔夠膽囉。

森美:應該係整咗

小儀唔認變臉，不過拍檔森美就玩踢爆。

記:記者 森:森美

森: 小儀係靚咗，索咗好多。自從今年初轉咗髮型時，成日人唔同晒，好似吳日言咁。

記: 傳佢去年初去執靚咗喎?

森: 咁應該係啦!無理由爭咁遠呀，梗係有唔同啦!好明顯塊面瘦咗，腮骨削咗，鼻樑高咗!應該整咗鼻樑，同割咗雙眼皮。

記: 咁佢靚咗，你對佢有冇改觀?

森: 我唔鍾意佢靚，我鍾意佢以前多啲，越醜樣越好。我對咗佢好多年啦，如果佢越嚟越索，我年紀大會心臟病發。

記: 你有冇問過或讚過佢?

森: 我唔知佢有冇去過喎。

至於新拍檔金剛則力撐她說:「小儀不嬲都咁靚啦!如果佢真係有整容，整到咁就唔得啦!」非常抵死。

雖然小儀整完容都唔算好靚女，但為標尾會嫁得出，她不惜改頭換面，真你用心良苦!

http://blog.yimg.com/3/hD_yKDZ7s59I7oR_eYc98au56M6KYwUT5qhie7.Szfj0eU4hNaw0VA--/56/m/g1xJN2SZ6DJaCWtvV_C3iA.jpg第825期 20.05.2011 封面主題︰直撃首爾醫院 失戀打撃小儀整容" TITLE="忽然一周 第825期 20.05.2011 封面主題︰直撃首爾醫院 失戀打撃小儀整容" />