题记：笔者决定采用上海方言閒话唻写一篇有关于上海滩哴向电话机方面呃历史，以及与之相关呃各类人事物情搭各种趣闻轶事，文章很有可恁写得交关多，还会显得邪气冗长，讲覅定还有一眼眼啰里八嗦，但愿某些欢喜写写文章呃文学爱好者、交关欢喜上海滩哴向各类历史呃网友们，还恁够看得下去、还是愿意去看一看。凡是涉及到上海滩各类人事物情呃文章，侪都会得去用上海方言唻写作，多多少少去保留一眼眼上海方言文墨，去留存迭座城市呃历史记忆……

据笔者查阅到，有关于上海滩哴向呃电话历史资料以后晓得嘞，实际哴向，上海滩勒拉老里八早就已经拥有电话机嘞，拥有第一部电话机呃确切辰光是勒拉1882年，顺大便要去讲呃一句閒话就是，只畀过，比英国人亚历山大·贝尔勒拉1876年发明电话晚忒嘞6年。

当时光跨入到1882年呃辰光，“丹麦大北电报公司”勒拉上海外滩7号，开通嘞人工电话交换所，迭家公司就是——专门经营租界内电话业务呃，迭呃就是上海滩哴向，老里八早呃市内电话。勒拉相当长呃一段辰光里向，电话机只畀过是邪气少数、交关搛铜钿呃大人家侪恁够去拥有，除此以外，某些各类大型呃商家也有得电话机。

依据上海滩哴向，有关于电话机历史资料方面呃统计以后，侪晓得嘞，自从1949年05月27日解放嘞以后，全市一塌刮子侪拥有电话机437部。到嘞1951年呃辰光，全上海市也只畀过拥有嘞各类公用电话机1512部。就勒拉掰搿辰光，绝大多数呃公用电话机，侪都是安装勒拉弄堂口烟纸店里向，是由买卖各类杂货铺子呃老板代为看管呃，伊拉是覅负责“传呼”迭项业务呃。就从1952年开始起，勒拉部分市区里向，开始试点并执行传呼电话服务，一年以后陆陆续续向市区全面推广迭项业务，到嘞1960年，全市公用电话达到了3293部。

自从1952年开始向全市推广传呼电话以后，就陆陆续续开始设立嘞各类“电话亭子间”，依据相关部门统计，当时光进入到嘞1985年，全市角落山姆设立嘞传呼电话服务亭3257处，其营业收入占市电话局年收入呃百分之九，年话务量最高时曾达到1亿多次，占全市通话总量呃百分之十覆盖市区1000多嗰居委会，服务人员有1万多名。到嘞1991年，整嗰上海市安装嘞2000多部夜间应急电话，伊呃服务辰光是从夜到头10点钟开始，一直要服务到翌日早哴向7点钟，基本哴向遍布嘞上海市所有呃区，极大呃满足嘞市民夜间紧急通信呃需求。

勒拉上海滩哴向，有得一种独特呃建筑样式叫做——“石库门”，勒拉每一幢“石库门”房子里厢侪都有得“一间亭子间”，伊呃地理位置就勒拉灶披间上头、晒台下头呃空间，高度大约摸勒拉2米左右，面积大约摸勒拉6、7平方米左右，伊呃朝向是面朝北面呃，大多数情况是用唻堆放各种杂物呃，极少数是畀屋里厢呃佣人去居住呃。勒拉老底子呃上海滩哴向，“电话亭”就遍布勒拉上海市区每一嗰角落里向，就连得每条街道至少侪会有得“一间电话亭”，一般情况唻讲侪都是邪气小呃，伊呃平方大约摸只有4、5嗰平方左右，只有极少数规模稍微大一眼，因此上海人交关欢喜畀“电话亭”叫做“电话亭子间”。或许，勒拉有关于老上海各类人事物情呃电影搭电视（连续）剧当中，吾伲还有可恁会看得到各类“电话亭子间”哦，恐怕即使畀90后、00后呃年轻人看到嘞以后，伊拉还覅一定会得认得伊唻！

从上海解放以后，一直要到上嗰世纪90年代初期之前，除忒各类大小商店、各级政府机关搭某些大人物会得“拥有电话机”之外，“电话机”勒拉普通老百姓眼里覅是必需品，而是绝对呃奢侈品。一般情况下头，呒啥呃邪气要紧事体，是用覅着电话机呃，可以通过写信唻解决各类问题。勒拉笔者呃印象当中，最最早呃辰光，市内通信只要四分洋钿邮资，外省市通信是八分洋钿邮资，等到笔者本人也会得写信以后，是勒拉读小学六年级呃辰光，还曾经畀自家呃尼表姐沈清去写过一封情真意切呃信，只因勒拉掰搿辰光，伊是搭尼姨妈倪兰英居住勒拉一道呃，伊拉屋里厢距离外婆呃屋里厢是顶顶近呃，顶多只有半站路之远哦，就希望伊搭伊呃老娘恁多去看望照顾外婆一家们。畀过，勒拉掰搿辰光，邮资已经涨到嘞两角洋钿。就勒拉掰搿辰光，之所以要去写信，是因为掰搿辰光国家规定，每一嗰小学生侪都要去学会写一封标准呃信，还是一项覅可或缺呃技恁。今早仔，因为几乎覅再去写信呃缘故，恐怕通通忘记忒哪恁去写信嘞，也已经写大覅唻信嘞！只有是碰着嘞邪气要紧呃事体时，侪会得去使用电话。另外就是，男女青年到嘞谈恋爱轧朋友呃年纪会得去用电话机。即使是迭恁样子、又因是上述两嗰原因要用到电话机，也会得尽可恁去做到长话短说，用顶顶简练呃閒话，去畀一桩事体呃前因后果讲清爽，只因勒拉掰搿辰光，绝大多数老百姓手里向是呒得多余呃铜钿去煲电话粥呃。

各类电话亭子间为老百姓服务呃人，基本哴向侪是一些退休以后“实在是呒事体做呃”兼职老爷叔搭老阿姨。既发挥着伊拉呃余热，又多少可以去补贴一眼家用。一间电话亭子间起码有得俩嗰人，还要分两班制，即分早班搭夜班。伊拉啊覅是一天到夜忙到头呃，也有空閒辰光。比方讲一旦碰着嘞空閒辰光，如果是俩嗰老阿姨呃閒话，伊拉会得一边结结绒线，一边搭另外一嗰人嘎嘎讪胡谈谈山海经；如果侪是俩位老爷叔呃閒话，会得一边喫喫香烟、喫喫香瓜子之类呃小零嘴、大口喝着泡好呃一大杯浓茶，一边搭另外一嗰人嘎嘎讪胡谈谈山海经；讲一眼张家长李家短、电话亭子间人唻人往呃各类事体。到后唻，又增加嘞一批下岗男女工人，加入到电话亭子间队伍里唻。

勒拉掰搿辰光，传呼电话又是哪恁为老百姓服务呢？！最最早呃电话机多数是黑颜色呃，拨号键盘是圆形呃，需要去旋转拨电话号码数字。勒拉最初呃辰光，打一趟电话，是三分钟四分洋钿，人工叫一趟电话需要三分洋钿。居民一旦有需要打电话搭对方联系通话呃閒话，就要事先打电话到对方所在地呃传呼电话亭子间里向，再由电话亭子间里向呃老爷叔搭老阿姨记下唻唻电电话号码、或者简单呃内容以后，所写呃内容通通是畀记勒拉三联（连）单子上头呃，再上门去通知“畀叫户”，只有“畀叫户”接到嘞电话单子以后，再去跑到传呼电话亭子间回电话。辰光一长，有些人家搭电话亭子间关系邪气好呃各位老爷叔搭老阿姨，彼此之间又是邪气熟悉呃人，很有可恁免忒覅去开电话单子，会得直接去对“畀叫户”讲，侬有电话需要马上去回电。

每当各位老爷叔搭老阿姨到嘞“畀叫户”门口以后，会得拿一只电喇叭哇啦哇啦喊：“某某弄（里）18号里亭子间嫂嫂啊，侬女婿打唻嘞一只电话，需要马上去回只电话啊！”、“23号里向呃张家姆妈，倷呃伲子唻过电话嘞，伊讲今早仔厂里向要加班，夜饭就覅回唻喫嘞，覅需要侬回电话嘞！”、“31号客堂间里向呃老王，侬单位唻电话嘞，讲有得要紧事体，需要侬马上去回只电话啊！”……勒拉掰搿辰光，上海滩还建造嘞有6层楼高呃新工房，去新工房服务侪是按照楼层唻结算呃，一楼是一角洋钿，依次类推，每上一层楼加一角洋钿……

老里八早，大姨父沈小兔搭大姨妈倪榴娣是居住勒拉虹口区东汉阳路呃，离伊拉屋里厢顶顶近呃电话亭子间，起码也要走一站路之远，笔者呃屋里厢，勒拉掰搿辰光，是居住勒拉有着八百多年营造之乡美誉呃高桥古镇上头呃。姨夫曾经对笔者是迭恁样子唻讲到呃，因为伊搭电话亭子间里向呃各位老爷叔搭老阿姨关系相处得邪气融洽、交关好，自家还会得发香烟畀电话亭子间老爷叔喫喫，时不时搭各位老爷叔老阿姨嘎嘎讪胡谈谈山海经搞好关系，每趟有得事体需要搭伊联系呃閒话，只要报出伊呃名字，伊拉就会得晓得并及时通知伊呃。

后唻由于1978年开始改革开放，老百姓呃日脚越唻越好，像芝麻开花一样节节高，传呼电话呃服务价钿也是水涨船高，由最初呃三分洋钿，涨到了一角洋钿、两角洋钿、三角洋钿……伊还讲到，每趟需要伊去回各类传呼电话呃閒话，电话亭子间里向呃老爷叔老阿姨是直接去通知伊呃，而且每趟也是覅开电话单子呃。之所以会得迭恁样子去做，有得两嗰原因，原因之一是因为：伊搭伊拉关系相处得邪气好；原因之尼是因为：辰光一长伊拉晓得了，姨夫屋里厢经济条件搭别人家比较起唻覅是最好，相比较而言稍微要推板一眼，恁够省一钿是一钿。伊拉搭姨夫讲，单子就覅开了哦，每趟好便宜一角洋钿……

据笔者获悉，伊拉之所以要迭恁样子去做、去操作，是有得四嗰原因呃。第一嗰原因就是：作为问“畀叫户”收铜钿呃凭证搭依据；第尼嗰原因就是：就凭着三联（连）单子搭打电话呃频次，过忒一嗰号头后，会得搭邮电局唻一趟总结账，看看营收到底有得多少，到底是邪气繁忙呃？！还是变得交关空閒？！到底要付畀邮电局多少洋钿；第三嗰原因就是：勒拉掰搿辰光，电话亭子间是受到邮电局管辖呃，邮电局是随时随地要唻查查账呃；第四嗰原因就是：老爷叔搭老阿姨们凭电话单子及一嗰号头打电话呃频次，结算工资报酬呃依据。

还是勒拉掰搿辰光，电话亭子间，既有得空閒呃辰光，又有得繁忙呃辰光。一旦忙起唻，排队打电话是会得经常性发生呃，假使公用电话机交关少，夯不啷当只有两部电话机呃閒话，打电话呃人又是交关多呃閒话，就要排起老老长呃队伍，弄了覅巧就很有可恁要排十几米长，勒拉一般情况下头，凡拎得清呃朋友，彼此之间还要空开一定距离。噶末，彼此间距离又会得有多远呢？！大约摸勒拉二三十公分左右。假使有人电话打得有一眼眼长了，后头呃人就会得催促前头呃人讲道：“朋友侬电话打好嘞吗？！还需要多少辰光啊？！”……

同样是勒拉掰搿辰光里向，还因为各式各样呃电话亭子间，就好像是一嗰小小情报站一样，电话亭子间里向呃传呼老爷叔搭老阿姨们，绝对就是属于一些“消息邪气灵通人士”，而且伊拉对各条弄堂里厢呃情况，可以讲像小葱拌豆腐一样，晓得了一清二楚煞拉斯清。假使有得探亲访友呃人唻探望亲朋好友，突然之间忘记忒自家亲眷或朋友呃门牌号头了，覅晓得具体勒拉几号里向啊里一嗰方位，伊本人只要是跑到了电话亭子间里向，去向老爷叔搭老阿姨们问一问、打听一下情况，就侪都恁晓得嘞。还有呃就是，勒拉掰搿辰光段里向，居住勒拉一条弄堂里向呃人，相互之间几乎可以讲是呒得啥呃“隐私”好去讲呃，覅管是啥呃事体，想要囥囥瞒瞒起唻，也绝对覅可恁去做到呃，邻舍隔壁之间假使稍微有嘞一眼眼矛盾，相互之间必然要吵吵相骂呃，但畀过，吵过嘞以后也就忘记忒算数嘞，一旦对方碰着嘞问题，自家又恁够去解决呃閒话，亦是覅会得忘记相互关照照顾对方呃……

像类似于迭种事体，只要是到嘞第尼天早哴向，电话亭子间里向呃老爷叔搭老阿姨们，保证会得连唻龙去脉也晓得嘞清清爽爽煞拉斯清。迭种情同一家人呃温馨场面，是上海人勒拉弄堂生活当中，一道独一无二呃风景线，勿单单是令人感到交关刻骨铭心，更是邪气令人回味无穷。今早仔，恐怕就看大覅到了。有些大嘴巴、喇叭嘴呃老爷叔搭老阿姨们，还会得拿晓得呃各类事体搭消息，覅管是好还是坏，通通侪会讲出去，因此有些人家还会得搭伊拉搞好关系，希望伊拉嘴巴搭口风要紧一眼，覅要到处去乱放喇叭，到外头去瞎讲八讲！

笔者第一趟认得并晓得“电话机”是——勒拉上小学一年级辰光，勒拉掰搿辰光，母亲是勒拉中药店做生活呃，药店里厢就有得一部黑颜色旋转拨号电话机。有一天，笔者要畀一块红双喜牌乒乓板搭一只红双喜兵乓球拿到学堂里向去白相相，母亲怕会得影响到学习，就坚决覅允许带到学堂里向去，就拿起嘞电话机假姿假眼呃去打嘞一通电话，还开口去讲道：“吾已经搭侬呃班主任梅花老师通过一趟电话嘞，伊是坚决覅允许侬带到学堂里向去白相相呃，一旦侬本人带得去嘞，就会得坚决予以没收忒呃。”……就搭母亲争吵吵闹嘞起唻，最后呃结果就是——母亲实在是拗覅过本人，只好让笔者带到学堂里向去白相相。到嘞夜快头放学嘞以后，还兴高采烈呃对母亲讲道：“老师根本就呒收过吾呃乒乓板搭乒乓球！”之所以笔者会得搭母亲争吵吵闹，是因为笔者晓得嘞掰搿辰光电话号码是六位数字，母亲只畀过假姿假眼去拨打了三、四嗰电话号码，是勒拉骗人，畀吾戳穿嘞西洋景。

有关于打电话迭桩事体，还有得一则趣事哩。上嗰世纪九十年代初期，笔者还居住勒拉高桥镇上头，邻舍隔壁过房爷汪志强呃屋里厢，去购买嘞一台日本进口呃二十一寸彩色电视机，掰搿辰光笔者屋里厢只有一台上海产呃“飞跃牌”十八寸彩色电视机，还到伊呃屋里厢看过两三趟电视，总觉着比自家屋里厢呃电视机要唻得清晰好看，色彩度也显得更加真实。但畀过，伊拉打开迭台电视机看电视呃辰光，也是有一嗰小缺点呃，覅晓得啥呃原因，每天夜到头大约摸勒拉五点五十分左右到六点十五分左右，总归有人家勒拉打电话，迭呃辰光就看覅到电视嘞，电视机屏幕也变成嘞黑颜色，只恁听到打电话呃声音，双方之间呃通话音侪都听得清清爽爽，只恁等到通话结束以后，侪恁显示出屏幕、侪可以去看电视，要覅然绝对是看覅到电视呃，基本哴向每天是迭恁，后唻经过研究，晓得嘞打电话会得干扰看电视。

“程控电话”畀世界科技发展历史认定为：“是属于第尼次科学技术革命”。“程控交换”勒拉1960年由美国贝尔公司开始试用“程控交换机”并成功嘞，就于1965年5月开通嘞世界上第一部程控电话交换机，标志着自动电话交换控制技术，从机电制布线控制发展到电子制程序控制。就算到嘞今早仔，笔者还恁清楚呃晓得，当时光跨入到上嗰世纪九十年代中期呃辰光，上海市全面去使用程控电话，拨号时长最快恁缩短控制勒拉二十秒钟，只要对方勒拉拨打电话，或者电话打得交关繁忙，就会得听到忙音呃声音。“程控电话”，既会得显示拨打呃电话号码，还会得显示对方呃唻电，更会得记录拨打电话呃时长，真可谓是一举多得唻，伊拨打一趟电话价钿是每分钟一角洋钿。

笔者哪恁会晓得打程控电话是一分钟一角洋钿呢？！因为勒拉掰搿辰光，三姨妈倪金英搭伊拉俩嗰伲子，就是吾呃大表哥朱琪搭尼表哥朱彬居住勒拉大娘舅倪榴发借畀伊拉呃老式新工房里厢，一梯六户，左右各三家人家，厨房公用，是呒卫生间、电话机呃，每趟需要打电话呃辰光，就要跑十分钟左右呃路程，到老镇上头去拨打。勒拉某一天，尼表哥就噱笔者一道到老镇上去白相相，讲今早夜到头屋里厢要搞聚会咪一点小老酒，就到老镇上买一点熟菜伐，实际哴向伊最主要呃事体是去打电话，电话打嘞五十分钟左右，包括等待辰光也算嘞里向，花费嘞四五块洋钿。后唻是过忒嘞若干年以后，侪晓得伊掰搿辰光正勒拉热恋当中，打电话畀伊女朋友，搭伊女朋友煲电话粥。

到嘞1997年以后，全市一年就安装嘞住宅电话70万门。自从迭呃一年起，全市呃各类传呼电话业务量开始逐年往下头降。至千禧年以后，上海滩哴向，全市一塌刮子有得传呼电话服务站近4000嗰，电话机1.2万部。也就是从千禧年开始，各类公用电话亭子间，纷纷关张歇业嘞，各位老爷叔老阿姨们只好打道回府嘞。取而代之呃就是，建造嘞一大批仿照英国红色电话亭呃新型电话亭，最初所安装呃电话机侪是投币电话机，打电话一块洋钿一趟，超过辰光另外还需要加洋钿。后唻伴随着科技呃再一趟进步，改为嘞插电话卡式呃电话机。今早仔，因为每家人家电话机搭手机已经全面普及嘞，迭恁样子呃电话亭，反而成为嘞一种摆设品搭装饰品，几乎是呒人到电话亭打电话嘞！

笔者呃屋里厢搭别人家勿单单是反过唻呃，还稍微有得一眼眼覅大一样呃地方哩，吾伲是先去“拥有嘞大哥大”，后唻侪去拥有嘞电话机。“大哥大”是“手提电话”呃俗称，又畀国人称之为“砖头机”，只因“大哥大”看上去像一块大呃砖头，故而畀大家称之为“砖头机”。之所以吾伲屋里厢是先“拥有嘞大哥大”，皆是因为父亲工作呃原因，单位为伊本人去配备嘞一部大哥大。勒拉迭嗰前头，笔者只畀过勒拉各类香港电影当中看到嘞“大哥大”，假使讲迭部电影内容是讲香港黑帮呃，黑社会老大自会得去手提一部“大哥大”手机，而且自家是覅去拿“大哥大”手机呃，勒拉一般情况下头，侪都是由跟班小阿弟拿嘞手里向呃，只有需要打电话呃辰光，侪会得去问伊拿过唻哦。

“大哥大”是由美国摩托罗拉公司呃工程师马丁•库帕勒拉1973年发明呃。1987年“大哥大”畀引进到嘞中国，成为嘞加速人们信息沟通搭社会交往呃重要工具。笔者所在城市上海是从1988年开始引进“大哥大”，一部“大哥大”手机呃价钿是人民币2万块。勒拉掰搿辰光，就算有购买“大哥大”呃洋钿，还要去等待排电话号码。有得覅少呃人家搭各类企业，虽然是预先全款去支付忒嘞铜钿银子，还要去等待老长一段辰光，整整等嘞一年以后，侪拿到嘞手机号码。

到嘞1989年下半年呃辰光，父亲终于有嘞一部“大哥大”手机，还另外去配备嘞一块电池板，勒拉刚刚开始、勒拉绝大多数辰光，迭部手机始终是身处勒拉关机状态下头呃，每趟仔只有要等到嘞有邪气紧要事体呃辰光，侪会得去开机拨打电话哦，等到打好嘞电话以后，再畀手机关关忒。为啥要迭恁样子去做呢？！只因为充一趟电需要十几嗰钟头唻，即使是充满嘞电顶多只好去使用两嗰钟头。而且电话费也是邪气贵，有一趟覅小心拨打嘞天气预报电话，到嘞下嗰号头账单唻嘞，单子上头显示打天气预报电话，每分钟价钿要两块洋钿。

勒拉掰搿辰光，据父亲对笔者讲，勒拉上海市“大哥大”手机出现嘞供覅应求呃情况，市政府为此还专门发过一嗰红头文件，要畀一些交关特殊呃单位、工作搭业务上侪都是邪气繁忙、为浦东改革开放做出过一定贡献呃企业、滴滴刮刮确实需要“大哥大”手机呃企业优先去使用。勒拉掰搿辰光，父亲所在呃单位，市政府就优先去畀嘞两部“大哥大”，其中呃一部就分配畀嘞父亲去使用，只因为当时父亲已做高级会计师三四年嘞，还分管着“财务”、“后勤”、“工会”、“人事档案”部门，工作交关繁忙，寻找伊办事体呃人又是邪气多。

到嘞上嗰世纪八十年代中后期，属于“旧时王谢堂前燕”呃电话机，亦畀“飞入寻常百姓家”，极少数有恁力呃市民陆陆续续开始排队申请安装电话机。到嘞九十年代初中期，全市市民开始装电话机呃人数变得越唻越多嘞。到嘞1993年上半年度吾伲家里也安装上嘞一部电话机，勒拉掰搿辰光滴滴刮刮确实是因为出于父亲呃工作需要。

勒拉掰搿辰光，每家人家安装一部电话机是需要初装费呃，为弥补电信建设资金呃覅足，国家自从1980年下半年起开始收取市话初装费，做为电信建设专用基金。增收市话初装费政策对通信呃发展起到邪气重要呃作用，三分之一呃电话建设资金唻源于初装费，初装费成为支撑国家通信网持续高速发展一嗰重要呃资金唻源。到嘞2001年7月1日全市取消忒嘞初装费。最初呃初装费是人民币六千元，等到吾伲屋里厢装固定电话呃辰光，伊呃价钿就降低到嘞四千五百块。

据笔者晓得，勒拉掰搿辰光父亲虽然滴滴刮刮工作交关繁忙，可以讲是一天比一天要忙，找伊办各类事体呃人也是交关多，领导希望就算父亲下班嘞，一旦有嘞事体还恁时时刻刻联系到伊。但是勒拉最初呃辰光，伊对装固定电话多多少少还有一眼心覅甘情覅愿。伊还对伊呃领导讲过，单位里有得公用电话，伊呃办公室也是有得电话机呃，到嘞屋里又有得“大哥大”手机，就覅需要去安装啥呃电话机嘞，何必要去安装电话机啊，覅仅是浪费忒呃，又是用覅着呃嘛！伊对笔者讲，还要想去公私分明，认为下班嘞就搭上班覅搭界嘞，就覅要再联系伊嘞，也好借此休息休息，否则一天忙到夜就忙覅过唻，啊忒吃力嘞！一直坚持到后唻，实在是呒办法嘞，侪去安装嘞电话机……

虽然勒拉1993年上半年度装好嘞固定电话，但是勒拉1992年下半年度就已经开始向邮电局申请安装固定电话嘞，与此同时钞票也付忒嘞。由于勒拉掰搿辰光，安装固定电话是需要排线、电话“总机门子”搭每户“分机门子”呃。【备注：过去安装固定电话是需要“门子呃”，“门子”是有数量呃，一嗰电话号码占总机呃一嗰门子数，专业呃名称叫“端口”。】只因为勒拉掰搿辰光，笔者家附近已呒得电话“总门子”搭每户“分机门子”嘞，已经畀先申请呃人安装忒嘞，需要去耐心等待，还要去排新线路搭新呃门子，啥辰光恁好还覅晓得。

笔者清楚呃记得，当电话机安装好嘞以后，是呒得电话号码呃，过忒一嗰礼拜以后侪有呃。邮电局还向吾伲赠送嘞一本电话号码本，本子里向记录嘞高桥镇所有私人安装电话人家呃号码以及电话户主呃名字，就连得吾伲屋里向电话号码及户主名字也印在嘞上头哦。

笔者还清楚呃记得，当电话机安装好嘞以后，父亲为嘞测试电话机性恁以及打电话所产生呃效果是哪恁样子呃，第一只电话就打畀嘞黄锦荣老伯伯，伊要比吾伲屋里向早一年先安装好电话机。伊既是父亲同一嗰单位里呃同事，与此同时又是笔者姑父黄锦民同父同母呃亲大哥。只畀过，彼此之间所在呃区域是覅一样呃，伊是勒拉浦西地区上班呃，父亲是勒拉浦东地区上班。勒拉打电话呃全过程当中，伊还趁机教育嘞父亲一下，因为伊老早就听到并晓得嘞，最初父亲是覅大愿意去装电话机呃，讲父亲也太覅领市面，要去多领领市面，现在只要是有条件呃人家，通通侪去安装嘞电话机，浦东搞改革开放到今早仔已有三年嘞，新区政府也已经成立嘞，一旦有嘞各类公私要紧事体，联系起唻，覅是交关方便吗？！侬哪恁还介落伍跑嘞后头啊……

每一嗰时代侪有伊独一无二呃特征，而且处勒拉覅同时代、覅同区域里向，特征搭特点覅但侪是覅相同呃，更覅可恁是一模一样呃。比方讲：勒拉上嗰世纪七十年代流行趋势之一就是：结婚需要“48条腿”搭“三转一响”；到嘞八十年代呃流行趋势之一就是：男女朋友开始流行“跳跳各类交谊舞”、“唱唱各类流行音乐（歌曲）”；到嘞上嗰世纪九十年代初中期流行趋势之一就是：安装私人固定电话……

因为勒拉掰搿辰光“电话”是交关流行呃，又加之每家每户陆陆续续普及嘞电话，电话费也逐年逐步下降嘞，亦是一嗰邪气好呃题材，因此北方呃相声演员搭上海呃滑稽戏、独角戏演员侪创作并讲过有关于《打电话》呃段子。比方讲：马季、郭启儒讲过一嗰相声段子叫：《打电话》；相声演员回婉华、胡仲仁讲过传统相声段子《打电话》；王双庆、吴双艺、童双春讲过滑稽戏《打电话》呃段子；刘福生、周艺凯讲过滑稽戏《山东人打电话》……凡是种种真呃可以讲是不胜枚举啊！就连得后唻侪出现呃新曲艺形式“电视小品”，也有《打电话》。

迭些《打电话》呃段子侪是勒拉讲——有些打电话呃人，覅管事体要紧与否，讲起閒话唻侪是啰哩啰嗦覅管覅顾，哪怕覅是交关紧要呃事体，也要去打电话，影响嘞有要紧事体需要打电话呃人；有些电话亭子间里向呃老爷叔，只因听大覅懂打电话人各类方言土语，勿单单是闹嘞笑话、畀事体耽搁忒嘞，还使得双方侪闹得覅愉快……

嗰人始终认为，既覅管是啥呃人，也覅管去做啥呃事体、讲啥呃閒话，做各类事体、讲各类閒话，要尽可恁去做到简明扼要交代清爽，只要畀“事由”、“日脚”、“辰光”、“地点”、“人数”搭需要带好“几钿洋钿”就可以嘞，是覅需要去啰里八嗦讲一大堆呒用呃閒话。

但畀过，就有一些人，平时勒拉打电话搭别人家交流呃辰光，就是主次分大覅清爽，勒拉前头啰里八嗦废话连篇讲嘞一大堆，过忒嘞三五分钟，还呒畀最最重要呃一桩事体讲出唻、讲得清爽明白，让人覅是丈二和尚摸不著头脑，就是木知木觉覅晓得伊到底要讲啥！

比方讲：几十年老友交关辰光呒碰头嘞，打电话邀请老朋友碰碰头聚嗰会，是邪气简单呃一桩事体，只要畀“日脚”、“辰光”、“地点”交代好，再去讲“聚会呃理由”、“洋钿要多少”就可以嘞嘛。打电话呃人覅是迭恁样子，固定电话接通嘞以后，先用变声变调让对方去猜，一直要等到猜正确嘞再继续去讲。接下唻就是迭恁样子唻讲到呃，曰：“侬迭只老抽筋赖棺材，今早仔夜饭喫过（好）嘞吗？！侬真覅是嗰么事啊，吾近抢把听到阿六头老娘勒拉讲，前抢把侬勒拉打喷嚏辰光畀自家呃老腰也弄伤嘞，为啥就覅恁对吾讲啊，覅管哪恁去讲伐，吾伲好歹也是有得几十年交情呃老朋友嘞嘛，侬要是恁早一眼告诉嘞吾，吾马上就好去望望侬嘞，侬迭嗰人真呃覅是么事、邪气覅够模子哦，哪恁介覅够朋友啦，连得几十年唻老朋友也覅告诉一声！”……

【备注：文章为作者原创；各种和文章有关的图片均来源于网络上；最后三张电话亭图片是作者拍摄；感谢原创图片。】

杜老倌侠客居（陆伟）写于2019年07月17日星期三晚上