“怀旧”迭嗰词语伊呃含义是指：怀念往事跟旧时有唻往呃人。“怀旧”迭嗰词语呃首创人（发明者），是由17世纪呃瑞士医生霍弗提出唻呃，辰光一直走到20世纪呃1979年，才由美国呃社会学家弗雷德系统呃去阐述了怀旧帮乡愁迭两者之间呃区别勒拉啥地方，经过现代科学家呃研究跟发现，认为怀旧是一种正面呃自传式记忆。

记得，勒拉本人大专刚刚开始毕业呃辰光，勒拉社会上头刮起了一股怀旧之风，迭股风就好像十级台风一样强劲呃畀刮了起唻，从大专到小学僎勒拉搞同学聚会，有得校友会跟班级会。凡是听讲有同学聚会便会得竞相去邀约，有些同学覅请也会自唻噢。形式也无外乎有得如下呃三种，第一种就是：到K厅唱卡拉OK；第尼种就是：到饭店聚餐；第三种就是：到茶坊品品茶嘎噶讪胡谈谈山海经；假使讲每趟仔到K厅唱卡拉OK呃辰光，到了聚会即将要结束呃辰光，最后一首歌曲眼扳数要去唱呃就是——老狼呃《同桌的你》；假使讲是到饭店聚餐，一定事先要到网哴向搜索一下，既要去寻找价廉，又要去寻找物美、有一定特色呃餐馆，实在覅唻三呃閒话，干脆就到火锅店去喫火锅，主要呃原因就是因为，相比较之下而言，火锅呃价钿唻得相对要便宜得交关多，还因为勒拉掰搿辰光，吾伲刚刚开始上班，囊中还是邪气羞涩呃；到茶坊品品茶噶嘎讪胡谈谈山海经呃辰光，勒拉大多数辰光里向，侪勒拉回忆上学辰光发生呃各种故事跟人事物情……邪气热闹唻，到了聚会临近结束快要跑路呃辰光，同学之间还要去留下各种通讯方式，郑重其事呃约好下趟仔再要碰头呃辰光，勿见勿散……

勒拉刚刚开始呃辰光，大家还是交关起劲呃，基本哴向差勿多是每间隔半年去搞一趟聚会，各嗰年龄阶段呃同学跟好友，各自会得去举办一趟噢。然而，伴随着辰光向前去推移，约老同学跟好友呃聚会变得越唻越困难了，一年恁够聚一趟已是算邪气好了，到了后末唻，两三年才有可恁去聚一趟……勒拉有些辰光，即便是口头答应侬了，也覅一定恁够去赴约噢，侪勒拉讲忙，僎勒拉讲轧覅出辰光，侪勒拉讲下趟仔再去讲伐，道歉声一嗰接一嗰连续覅断……再过忒一段辰光，覅是电话号码变成了空号、调了号码；就是公司跟家庭地址侪一道紧跟着变忒了，而且还是一变再变噢；亦有一些人到外省市去发展了，彼此之间因此就失去了联系，想联系也变得困难！再想要联系就只好到网哴寻找，只恁去同学网、天涯论坛、交友网等网站寻找……

就拿对于“怀旧跟聚会”迭桩事体唻讲伐，讲起唻还勿免有一眼伤感之情哩！记得，某趟仔呃初中同学搞聚会，大家异口同声呃讲去K厅聚会唱K，人数足足有得二三十嗰人噢，真呃可以讲是占到了全班呃二分之一，【备注：本人勒拉读中学呃辰光，全班就有得60嗰同学唻。】就勒拉聚会呃当中，除忒唱唱歌以外，眼扳数会得山南海北呃去谈论一眼么事，去讲讲自家呃近况到底是哪恁样子呃，目前勒拉做啥呃生活……当班长听到了某位同学工作单位覅单单是比伊本人要好得交关好，而且迭位同学呃工资收入也比班长高出交关多，班长面孔立马就变了脸，还一脸呃覅高兴哩，帮伊讲閒话呃辰光，要么是爱理勿理、要么就是西洋怪气，【备注：1、班长从小学到大学一直僎是班干部跟学生会领导；2、迭位同学读书呃辰光，学习成绩中等偏下；】同样是一嗰班级里向呃同学，同学之间呃聚会还要分出三六九等，啥呃成绩好呃同学是一波；成绩差呃同学是一波；谈得唻呃、相处得唻呃是一波；有些同学带上了自家呃女朋友……让同学聚会变忒了咪道！

面对着迭嗰情况呃辰光，有得一些同学就覅免愤愤覅平呃开口去讲道：“早晓得是迭恁样子呃聚会，下趟仔打死吾也覅会得再唻了，下趟仔聚会呃辰光，如果讲依旧还是迭恁样子呃閒话，还是呒得一丝一毫呃改变跟改观呃閒话，吾本人绝对是覅会得唻呃！原本自认为中学同学之间呃感情是最最纯真、最最要好、最老靠呃，也是覅携带任何厉害跟利益方面呃关系呃，哪恁等到了工作了以后，今早仔呃感情帮情感就覅如老底子了，现在完完全全是变忒了咪道啊！”……

本人却是迭恁唻理解并去认为呃，同学之间呃聚会，原本就覅应该是迭恁样子呃，最最真挚呃友情帮情谊，恰恰就是勒拉学生时代建立起唻呃，皆是因为勒拉迭嗰时期里向，彼此之间基本哴向是呒得任何利益帮利害关系呃；也是覅存在任何利益方面呃瓜葛；更覅会得存在着像职场伊恁样子，人跟人之间为了恁够更好呃生存下去、为了做好各种生活而去产生一系列勾心斗角；迭种情感最真、最纯了！

本人是土身土长呃上海人，勒拉本人所在呃城市上海、勒拉上海电视台纪实频道，就有得一档栏目叫做《全民大拍档》，伊就专门去制作了一集有关于怀旧方面呃话题。勒拉俗常生活当中，有得交关多呃人邪气欢喜去怀旧噢，覅单单是有得老年人，也有得覅少呃年轻人也同样欢喜去怀旧哩。勒拉里向就展现了N嗰片段，有用真人版制作呃俄罗斯方块游戏；有用大楼跟灯光制作呃贪喫蛇游戏；有一些人则是邪气欢喜收藏小辰光白相呃各种玩具，比方讲：就有跳跳蛙、气枪、溜溜球等等；亦有一些人欢喜收藏各嗰辰光用“马铁口”制造呃玩具，比方讲有模型小汽车、模型公交车等等；还有些人开了一爿中小学生餐馆，里向呃服务人员清一色侪是大队长噢……让人又回到了老底子，仿佛辰光倒转一般，好像迭些事体昨天仔刚刚发生过似呃！……

勒拉现实生活当中，也有得邪气多呃人认为，做人就覅要去怀旧、怀念老底子了，嗰人也是覅应该去怀旧、怀念老底子呃，因为老底子覅仅仅是已经过去了，吾伲亦是覅大可恁去回到老底子呃，只畀过老底子成为了吾伲呃一段历史帮往事，吾伲覅单单要去面向未来，而且一切呃一切还要向前头去看看，怀旧、怀念老底子迭桩事体是专属于一些退休呃人、老人应该去做呃一件事情，是伊拉独享呃一份“专利”，去怀旧、怀念老底子，就意味着整嗰人显得OUT（落伍）了！因为凡是一直沉迷于老底子、跟老底子纠缠覅清呃人，“绝对”会阻碍吾伲往前走、积极向上呃步伐，更会得让人去感觉到，覅晓得到底要去做眼啥呃么事唻得好啊，吾伲今早仔到底应该去做一眼啥呃么事……

本人呃想法却跟别人家是截然相反呃，自家还会得去认为，去怀旧、怀念老底子，亦包括去怀念、怀旧各种人事物情，覅应该是退休人员、老年人独自去享有呃一份专利噢，任何年龄阶段呃人，僎都可以去怀旧、怀念老底子啊，各嗰年龄阶段呃人，侪都可以从怀旧、怀念老底子呃全过程当中，去好好较总结自家呃某些经验跟教训、某些得与失，凡是肯迭恁样子去做呃人，就恁让自家去变得交关成熟，覅单单是变得交关成熟了，而且还恁让吾伲更好呃大踏步往前走！

还有呃就是，尤其重要呃一桩事体则是——每当吾伲侪沉浸勒拉怀旧呃过程当中时，伊还会得让吾伲去收获一份难以估价呃快乐、滋润跟幸福感唻，从而还可以让自家呃身心，僎变得邪气健康、特别顺畅噢，与此同时，伊还会得让吾伲去明白迭恁一嗰道理唻，啥方面呃人事物情，是“吾伲”可以去操作呃，啥方面呃人事物情，又是“吾伲”坚决覅恁、覅好去操作呃，之所以要迭恁样子去操作，就是因为伊恁够更加有利于让吾伲更好呃去面对未来、一切往前看！……

嗰人还是迭恁样子去认为呃，既覅管是啥呃人，也覅管伊本人从事呃是啥呃职业，更不管伊本人呃脾气秉性到底又是哪恁呃，如果是像迭恁样子呃人，“一旦伊本人呒得了老底子”，还假使讲伊本人要跟老底子去做一嗰彻彻底底完完全全呃拗断，并且还要去断绝了往唻，那就意味着是一种背叛啊，嗰人一旦是呒得了老底子，伊本人又哪恁会得有美好呃未来啊？！要晓得，未来也同样是包含着到底子！

既然是文章写到了此地块，本人老想问大家迭恁一句閒话呃，各位朋友们，今早仔大家有呒有去怀旧？！去怀念老底子了吗？！

【备注：文章为作者原创；各种贺友直老上海风情系列画作均来源于网络上；感谢原创图片。】

杜老倌侠客居（陆伟）写于2009年05月24日星期日下午