本人是土身土长呃上海人，勒拉笔者所在呃城市上海，每年只要是跨进了入夏时节，勿单单是骄阳似火，而且还邪气闷热潮湿，真呃可以讲是酷热难耐，让人浑身都觉着热煞脱嘞，即便是到了天气逐渐凉爽呃秋日时节里向，假使讲畀一波“秋老虎”唻袭击，照样是酷热难耐，依旧会得让人觉着热煞脱嘞，实在是热煞脱嘞。一些居住勒拉市区里向呃居民、勒拉空调还呒得去发明、还未曾迈入到千家万户呃前头，覅管是居住勒拉老式石库门里向呃居民，还是居住勒拉新式里弄里向呃居民，尤其是居住勒拉顶楼高头呃居民们，自会得勒拉夏秋季节即将到唻呃前头，向房管所去打一嗰申请报告，【备注：老底子呃“房管所”就是今早仔改制过唻呃房地产管理局，勒拉老底子、勒拉本人所在呃城市上海，就勒拉每嗰市区里向，至少会得有一嗰房管所。】去开一嗰“老虎天窗”，以便让室内呃空气恁够多去流通一眼眼，从而使得整嗰屋里厢多多少少恁去降降温，还可以变得凉爽一眼。

本人从一些历史文字资料搭历史纪录片当中看到了，国家是勒拉1978年呃11届三中全会当中，提出了“改革开放”呃口号搭决议，但畀过，吾伲国家全面呃去执行“改革开放”迭嗰政策，是勒拉二十世纪九十年代中期以后了，勒拉迭嗰前头，绝大多数呃城市依旧还处勒拉“计划经济时期”，一切呃人事物情侪都是要听从政府部门呃计划安排，而覅是依靠市场唻调节呃。勒拉掰搿辰光、勒拉上海滩哴向，即便是居住勒拉市区里向呃人，去打了申请“开老虎天窗”呃报告，假使覅勒拉计划安排之内，房管部门（房管所）也未必肯去办理唻，就勒拉迭嗰辰光呃老百姓，只好是八仙过海各显神通，去寻门路托关系开一嗰老虎天窗，而且是越快越好，为了畀“开一嗰老虎天窗”恁勒拉最最快呃速度里向去办好、办成功，哪怕是多去花一眼铜钿也是愿意呃。辰光走到了今早仔，全国各地到处勒拉讲违章搭违法建筑呃问题，吾伲到处勒拉提及违章建筑、举报违章建筑、还要大力拆除违章建筑，覅晓得勒拉掰搿辰光开老虎天窗是否也属于违章建筑。

去查阅所恁查到呃资料以后晓得了，吾伲国家是勒拉1974年侪开始研发空调呃，上海是勒拉二十世纪九十年代中期以后，侪逐渐开始普及并使用空调呃，勒拉迭嗰前头、勒拉上嗰世纪呃八十年代到九十年代，每家每户屋里厢侪恁拥有各式各样呃电扇。比方讲：就有得吊扇、落地扇搭台扇，【备注：勒拉掰搿辰光，迭嗰三种电扇，有得一样呃人家，已经好算家庭经济条件邪气好了，假使讲恁够去拥有两件，就好算大户人家了。】加之勒拉掰搿辰光，电压覅是交关稳定呃，伊呃电量又是邪气狭小呃，假使讲有得好几家人家同时开启好几件家用电器呃閒话，是交关容易引发断电呃事故，一到热天家，避暑呃方式就是去“乘风凉”。有些人家自会得早早呃吃好晚饭汏好浴，拿上小板凳搭蒲扇，到弄堂口去乘乘风凉；有些人家会边吃晚饭边乘风凉；有些人家会边读书报边乘风凉；有些人家会边下棋打扑克边乘风凉……勒拉乘风凉前头，多数人家会勒拉地上洒两三遍清水，为呃就是畀地面降降温，勒拉乘风凉呃辰光，多多少少就可以变得凉爽一眼。

假使讲碰到了那些充满生活情趣、有小资情调呃人家搭家庭，伊拉勒拉乘风凉呃辰光，勿单单会得勒拉自家呃身哴向去佩戴两朵或栀子花、或白兰花，还会得畀自家呃子女也同样是去佩戴上栀子花搭白兰花，那淡淡呃、似有似无呃自然幽香咪道，霎时间就会得侵入到鼻孔里向，一直要通到肠胃搭脑子里向，是邪气好闻呃，就勒拉迭嗰辰光嗰人呃精神也会变得清爽一眼眼，迭嗰是老底子【备注：“老底子”就是指“过去”。】上海人勒拉入夏时节，最最欢喜闻到呃三大香咪道之一了，其余呃两道香咪道就是花露水呃香味搭檀香扇呃香味。

勒拉笔者呃青少年时期，由于自家呃身体是邪气弱小呃缘故，加之自家呃身哴向还有得一眼眼黄牛肩胛，基本哴向是买覅着合适呃衣服搭皮带呃，衣裳只好去定做了，皮带只恁去购买吊带型呃皮带，勒拉绝大多数呃情况下侪都是穿吊带裤呃，家母也会得勒拉那些有卖栀子花搭白兰花呃时节里向，去购买上几多栀子花搭白兰花，更会得勒拉笔者呃吊带上头，左右各去佩戴上两朵或栀子花或白兰花，勿单单是迭恁样子噢，家母伊自家也是会得去佩戴呃，家母之所以也欢喜佩戴栀子花搭白兰花，最最大呃一嗰原因就是——受到了外婆张榴妹呃影响，外婆张榴妹之所以欢喜佩戴栀子花搭白兰花，就是因为伊本人邪气欢喜去闻迭两种花呃香咪道。笔者还勒拉少年呃辰光，出于好奇之心，也会得偷偷摸摸呃去摸栀子花搭白兰花呃花骨朵，假使讲畀家母发觉以后，就会得对本人大声呃唻训斥道：“侬是覅好去触摸伊呃，去触摸了花骨朵，要覅了多少辰光，伊就会得发黄枯死，花瓣会得逐片呃掉光，到辰光侬再想闻迭嗰呃花香咪道就闻覅着了！”……

笔者呃外婆张榴妹勒拉生前勿单单欢喜各种鲜艳美丽呃花朵噢，更欢喜去闻各种花朵呃香咪道，伊顶顶欢喜去闻栀子花搭白兰花香咪道了，勒拉伊本人看唻，迭嗰是老天爷赏赐畀人世间最好闻、最最香呃花香咪道了，只要是辰光走到了有得购卖栀子花搭白兰花呃季节里向，自会得各去买上两朵带回到屋里厢，一朵放勒拉衣橱里向，另外一朵就佩戴勒拉自家呃身哴向，以便恁随时随地呃闻到迭两种花朵呃香咪道。伊还会得对笔者迭恁唻讲道：“闻到了迭两种花朵呃香咪道，好像自家呃身体就会随之变得好得交关多了，自家身哴向呃各种毛病搭病痛，也会随之要减少得交关多了，真呃可以讲是变得神清气爽噢，而且迭两种花香咪道对衣服搭被子还有防蛀虫防霉呃功效哩！”

自从笔者晓得了外婆张榴妹邪气欢喜闻栀子花搭白兰花呃香咪道以后，本人就从开始工作呃第一年起，【备注：本人从1998年7月份开始工作。】每逢到了有得购买栀子花搭白兰花呃时节里向，只要是看到街面上头搭大马路哴向有得卖栀子花搭白兰花呃摊位，起码要买上四朵或白兰花或栀子花送畀了外婆，伊本人看到了以后，总归会得一边眯开眼笑笑得合不拢嘴，一边夸赞笔者是嗰有良心呃好小囡。

勒拉笔者本人呃印象里向，那些卖栀子花搭白兰花呃人（群），主要还是以乡下头农村里向呃老阿奶为主，有得一些市区里向呃老阿奶也同样会得去卖栀子花搭白兰花噢，勿单单是迭恁样子唻，而且卖栀子花搭白兰花呃老阿奶是呒得啥呃固定摊位呃，伊拉侪都是以打游击呃形式为主，就勒拉那些天气晴朗呃日脚里向，今早仔有可恁是勒拉迭块地方卖栀子花搭白兰花，到了明早仔有可恁会得勒拉另外一块地方去卖栀子花搭白兰花了，而且伊拉所去选择呃地方，勒拉通常情况下头唻讲，侪都是一些人唻人往人流量交关大呃区域去做生意。

伊拉一边卖一边还叫喊道：“栀子花白兰花要伐！要伐栀子花白兰花！”……也有邪气少数、嗰别摊位呃老阿奶是覅会得去叫喊呃，假使是去购买会得认真仔细呃服务，覅买也覅会强求点啥么事！

勒拉通常情况下头，栀子花搭白兰花一朵是覅肯售卖呃，起码是要两朵起卖，伊拉会得畀两朵花用细铅丝串联勒拉一道，并做成一嗰弯型呃钩子，以便于携带（佩戴）勒拉身哴向。伊拉总是挎着一嗰竹制呃大篮头，就勒拉大篮头呃最最底部，还去放置了一块蓝印花布头，花布上头还铺满了栀子花搭白兰花，再勒拉篮头呃上头去搁一块木板，木板基本哴向侪都是以汏衣裳板子为主，有韧条纹呃朝下头放置，平面呃朝上头放，木板上头还要铺上一层要卖呃栀子花搭白兰花，再勒拉栀子花搭白兰花呃上头，铺盖着一层薄薄呃、白颜色呃细纱布头，每间隔一段辰光，伊拉还要勒拉细纱布头呃上头去喷（洒）一眼眼水，之所以要迭恁样子去做，防止栀子花搭白兰花马上去干瘪忒……

自从外婆张榴妹于2008年2月16日星期六弹老三了以后，【备注：外婆弹老三呃辰光，享年虚岁为91岁。】也是从迭嗰一天开始，即便笔者看到了有得卖栀子花搭白兰花呃摊位，再也呒去购买过……

【备注：文章为作者原创；各种和文章有关的图片均来源于网络上；感谢原创图片。】

杜老倌侠客居（陆伟）写于2016年08月07日星期一晚上