“洗澡”是一嗰北方閒话词语或普通閒话词语，勒拉笔者所在呃城市上海，覅是畀“洗澡”叫做“汏浴”，就是叫做“淴浴”。

勒拉20世纪90年代末期、勒拉西安电影制片厂，拍摄了一部主要讲述呃是北京市民百态跟父子、兄弟之间感人呃亲情故事，影片呃名字叫《洗澡》，是由张扬执导，主演就是朱旭、濮存昕跟姜武。

故事主要讲述了，老刘（朱旭饰）经营了一辈子混堂，【备注：上海人畀“澡堂子”称之为“混堂”。】堪称是迭嗰行业里向呃老法师，【备注：“老法师”是沪语閒话，意思是指行家里手。】伊本人早年丧偶，生有两嗰尼子，大尼子刘大明（濮存昕饰）跟小尼子刘二明（姜武饰）。小尼子智力有一眼推扳能力要比正常人差一眼眼，只好跟老父亲住勒拉一道过日脚，大尼子勒拉外国学习、生活、工作，某一日老大突然从国外回来了，只因为阿弟畀伊寄了一张明信片，大阿哥误以为家父已经故去了。大阿哥原本是勿想久留下来呃，只想看过了父亲以后，能够再返回到国外，未曾料想到呃是，父亲突然病倒了，只好留下唻照顾老父亲、阿弟跟混堂。对于父亲知之甚少呃大阿哥，从开始接触混堂呃那一刻起，就试着去了解老父亲到底是哪恁样子呃一嗰人。呒过多久，由于城市呃快速发展跟变迁，再也勿需要破旧呃混堂了，混堂也面临着被拆迁，老父亲与混堂已经有了邪气深厚呃感情，覅管拆迁人员哪恁对伊讲，伊本人讲啥也勿同意畀拆迁忒，伊讲就算死也要去保护好混堂……勒拉影片最后，风烛残年呃老刘再一次病倒、犯病住进勒拉医院里向，但畀过，伊迭趟仔就呒恁够去坚挺过唻噢，呒过多少辰光就离开了人世间，迭嗰辰光混堂也被拆迁忒了……

到了今朝仔，城市里新建造呃各类房屋，覅管是商品房，还是廉租房，国家都考虑到了房子里厢要有得厨卫设施，都会得去建造一间卫生（洗手）间，勒拉某些好一眼眼、大一眼眼呃房子里厢，还会得有两间卫生（洗手）间哩，一间畀叫做了“主卫”，是专门畀主人去使用呃，另外一间就畀叫做了“客卫”，是专门畀客人去使用呃，勒拉卫生（洗手）间都安装了淋浴设施，假使屋里厢有得两间卫生（洗手）间呃，大一眼呃，就装个浴缸，小一眼呃，就装嗰冲淋间。

勒拉笔者所在呃城市上海，假使讲辰光倒转回到二三十年前头，覅要讲去拥有一间带有淋浴间呃卫生（洗手）间了，想拥有一小间独立解手呃卫生（洗手）间，也是困难重重邪气困难呃，绝大多数居住勒拉市区里向呃居民，要么是呒得卫生（洗手）间呃，想要大小方便呃辰光，也覅管是勒拉白天黑夜，还是勒拉天冷天热辰光，只恁到公共卫生（洗手）间去解决，而且公共卫生（洗手）间里向绝对是脏乱差噢，实在是勿唻三呃閒话，顶多就勒拉自家屋里厢去放置一嗰或搪瓷呃痰盂罐、或木头做呃马桶，要么就是跟好几家人家合起唻一道用一间卫生（洗手）间，假使讲邻里之间呃关系搞得勿是交关好呃閒话，还会得因为去使用卫生（洗手）间呃问题，跟畀人家要发生口角闹眼勿愉快、相互翻毛腔、彼此长时间呃勿理勿睬、勿讲一句閒话。

勒拉老底子、勒拉上海呃历史哴向，老上海人还有得交关多呃人家跟家庭习惯畀“卫生（洗手）间”叫做“马桶间”呃，只因为勒拉洋人还呒进入到上海滩前头，上海城里向还呒得建设下水道噢，即使上海滩畀开埠了以后，就算一直等到了十九世纪末期，再邪气讲究呃华人公馆，勒拉自家住房（宅）里厢，都是呒得啥呃盥洗间跟设施，因为迭间房间是专门放置大小便马桶呃，所以就叫做了“马桶间”，讲得邪气通俗一眼，就是屋里厢呒得啥呃抽水马桶跟浴缸等设备，碰着要去汏浴淴浴呃辰光，就只好通通跑到混堂里向去汏浴淴浴。

要是去汏浴淴浴呃閒话、还要是碰到了夏天季节里向，男人跟男小囡还可以马马虎虎去解决呃，一到冬天季节里向就呒啥呃好办法了，要想去汏浴淴浴，覅是勒拉屋里厢安置一嗰塑料浴罩跟木头做呃浴盆或浴桶，就是要跑到公共混堂里向去汏浴淴浴。但畀过，两者之间相比之下而言，采用后一种方式去汏浴淴浴呃人家唻得居多噢，再哪恁去省铜钿，汏浴淴浴铜钿是覅好去省呃，毕竟勒拉自家屋里厢去汏浴淴浴，勿是邪气方便呃，还有得交关多覅大方便呃地方，既要去烧开水，又要去安置好浴盆或浴桶、浴罩还要罩罩好……笔者还恁够去清楚呃记得，至少勒拉笔者小辰光，【备注：辰光大约莫是勒拉虚岁七八岁左右呃辰光。】到了冬天季节，就用浴桶浴罩汏浴淴浴呃。只因为勒拉掰搿辰光，每家每户屋里是呒得啥呃热水器、浴霸、空调、地暖等各种暖设备，冬天汏浴淴浴只好到公共混堂里向解决，一般情况下头是一嗰礼拜能汏一趟浴就算邪气讲究了。笔者就呒办法去了，只好勒拉屋里厢汏浴淴浴，只因为勒拉掰搿辰光家父是勒拉县城上班，还因为当时国家执行呃是单休日政策，家父每嗰礼拜只好回唻一趟，侪是礼拜六夜快头，到了屋里厢，基本哴向已经是六七点钟左右了。

某些交关多呃老上海人，凡是伊拉到混堂里向去汏浴淴浴，通常会得叫做“孵混堂”去，“孵”字伊嗰读音为（bu）字，光光一嗰“孵”字，就道尽了老上海人呃各类人事物情啊。假使讲有俩嗰要好老朋友走勒拉路哴向碰着了，老张问老王，讲道：“现在侬到啥地方去啊？！”老王接下来就讲：“吾现在要去孵混堂了，今早仔吾还呒去过唻，吾基本哴向每天侪要去呃，昨天仔吾有事体就呒去，回到了屋里厢已经是老老晚了，连得混堂也打烊关门了，今早再勿去，就浑身上下难过得覅得了，所以无论如何就要去一趟，还要好好较去孵一孵！”

凡熟悉老上海历史呃人，多多少少都会晓得，上海滩哴向最最早、最最有名气呃混堂，其名称叫做“浴德池”，伊呃地理位置就勒拉黄浦区南京东路后面呃天津路４７９号。据笔者查到呃历史资料后晓得，“浴德池”创建于1917年，原唻呃名字叫做“先施浴德池”，是先施公司旗下呃一嗰附属部门。“浴德”迭两嗰字出自《礼记·儒行》中呃“儒有澡身而浴德”，伊呃含义跟意思就是讲，汏浴淴浴，既可以去砥砺一嗰人呃志向，同时又能纯洁一嗰人呃身心。“先施浴德池”有得三层楼面，面积达到了900余平方米，勒拉1925年呃辰光，就已经勒拉同行业当中拔尖脱颖而出。“浴德池”于1933年停业后出售畀中法药房小开许晓初跟闻兰亭，成为独立经营单位。1938年许又易手卖畀了擦背工佘春华，佘重新布局装修，各楼层南北设两嗰等厅，三楼电梯上下，设高等洋盆间15嗰，全部都是“进口洋盆”跟“白玉大池”。到了1948年，“浴德池”一共设有6嗰等厅，243只座位，职工有得208个，成为沪上一流特等名店。解放以后“浴德池”收归国有由国家来经营……勒拉20世纪90年代初中期呃辰光，为了响应市政府呃号召，解决老百姓冬天家汏浴淴浴交关难呃问题，“浴德池”提出了“以人为本”呃口号，勒拉各嗰区县里向至少要或建造、或改造一爿“浴德池”，让老百姓再用勿着为了汏浴淴浴而发愁了，后来真呃是去做到了。但畀过，随着人民生活水平呃不断提升，对于公共浴室呃需求变得邪气少了，到目前为止，勒拉上海只剩两爿浴德池，一爿仍旧勒拉天津路上，另一爿勒拉闵行区莘庄镇莘东路51号。

笔者从书籍上头还看到过迭恁一段文字，汏浴淴浴又畀叫做“水包皮”，民国时期呃上海滩三大亨黄金荣、杜月笙跟张啸林，都有得“水包皮”呃习惯（嗜好），畀过最最爱好“水包皮”呃人，还是要数黄金荣了。黄伊本人不仅仅爱好“水包皮”，而且还爱好“皮包水”，所谓呃“皮包水”就是指“孵茶馆”，去茶馆店泡茶喫茶。要是呒得啥呃重要事体呃閒话，伊每天上半天必定要去茶馆店“孵茶馆”，就算有得一些交关重要呃事体，伊也是勒拉茶馆店里厢解决呃，到了下半天必定要去“孵混堂”，基本哴向每天都是迭恁样子呃、都雷打不动呃。因为黄爱好“水包皮”，自家也建造了一爿混堂，畀过伊本人从勿勒拉自家开呃混堂里向汏浴淴浴，每天都到名叫“逍遥池”呃混堂去“逍遥逍遥”、“嗨喂嗨喂”。有一些“小瘪三”晓得迭桩事体以后，每趟到了下半天3点钟左右，必定会得畀“逍遥池”围得水泄不通，少倾，一定会有一嗰身穿绸缎长衫呃账房先生，将一大把银元抛洒勒拉地哴向，等到小瘪三们都散忒了，迭嗰辰光黄才笃悠悠呃踱着方步走出浴室门，钻进轿车里向一骑绝尘而去。假若勿是迭恁样子去做呃閒话，迭帮小瘪三们就会得拦着小轿车，勿让黄金荣走，还会得畀讨要过唻呃冷饭团去“孝敬孝敬”黄大亨，因为迭嗰辰光黄覅仅仅是发迹了，荣升为法租界巡捕房华裔总探长，还经营着黑白两道呃各类生意，而且各种恁够赚铜钿呃生意也是大小通喫噢，呒经过伊本人点头允许呃閒话，畀人家就勿想去染指期间了，假使畀勿三勿四呃人长期去纠缠不清，面子上哪恁挂得住啊，又如何去消受啊？！

勒拉民国时期呃上海滩哴向，最最早呃女子浴室，也跟黄金荣本人有着莫大呃关系，因黄本人也开了一爿浴室，生意做得交关好，可以讲是门庭若市，但畀过勒拉某些辰光、勒拉浴室开市营业前头，会得让自家要好呃女（家）眷去梳洗梳洗，后来畀人家发觉了，勒拉掰搿辰光，上海市市民是邪气重男轻女呃，认为凡是畀女人洗过呃水，覅仅仅是邪气肮脏龌龊呃，而且男人家假使再要去汏浴淴浴呃閒话，不单单要触霉头，还会得永远都倒霉运走背字，消息传出去以后，生意一落千丈，迭位黑老大盛怒之下，干脆就开了一爿女子浴室。

勒拉笔者呃儿童时期，一到了冬天家，隔三差五总是畀大人们带领着去“孵混堂”，到了今早仔依旧呒去忘记忒哦。记得有一趟差一眼眼淹死勒拉一爿名字叫做“胜利浴室”呃混堂里向。勒拉掰搿辰光呃笔者，大概虚岁也只有六七岁左右伐，人长得又矮又瘦小，而且还邪气害怕水、晕水，大人硬要畀笔者泡勒拉大池子里向，由于一嗰勿小心，滑进了大水池里向，大概辰光有得一分钟左右，呒看见笔者呃尼姨夫沈常俊就心慌得了勿得了啊，幸好伊嗰眼睛交关尖，看到了大水池里向有人勒拉动还冒着水气，就赶快捞了起唻，捞起来之后，侪发觉是笔者淹到了大水池里向，事后尼姨夫沈常俊就对笔者讲，现在吾还有些后怕，要是真呃出了事体，侬母亲勿向吾拼命才怪唻！

等到笔者上初中呃辰光，一到冬天家，就会得独自一嗰人去外公外婆屋里附近呃浴德池“孵混堂”了，基本哴向是一嗰星期一趟，每趟仔去家父就会畀笔者20块洋钿。记得勒拉掰搿辰光呃浴室，有得三层楼，底层为女子部，两楼为男子部，三楼是独立呃单开间包房，还要去分大包房和小包房。票价畀分成了三嗰档次，最最早呃辰光，最低档次呃价钿是5块洋钿，中档呃是8块洋钿，擦一嗰背也是5块洋钿，小包房一趟下唻，只畀过是汏浴淴浴，最最低呃价钿要14块一嗰人，包房大全套，家庭单独汏浴淴浴，以三口之家为准，最最高、全套头服务要一百多快唻，到后来就价钿一眼一眼往上涨了。笔者嫌弃5块洋钿呃交关肮脏，就选8块档次呃，外加一嗰擦背，勒拉擦背前头必定要先泡上半嗰钟头左右，汏浴淴浴一趟下唻，起码要一嗰钟头侪恁弄好噢，后来票价稍稍涨了一眼眼，好像擦背由原先呃5块洋钿涨到了8块洋钿，其他啥呃方面本人就记得勿大清爽了。最最让人去佩服呃人就是混堂里呃扦脚老师傅，扦脚老师傅侪都是扬州人，伊拉仅仅靠一盏小电灯，几副专用呃大大小小呃扦脚刀，捧着一双覅管香臭呃双脚，畀老皮、死皮、脚指甲跟鸡眼，都扦得邪气清爽惬意。

勒拉老底子每家每户呒汏浴淴浴设施呃，去公共混堂里向汏浴淴浴，人数顶顶多呃辰光，要数过年前两嗰礼拜了，真是人轧人。

去年仔2月28日到3月5日，笔者去东瀛旅游了一趟，勒拉六天五晚呃行程当中，至少有得三到四嗰夜晚勒拉孵混堂，东瀛有许多健康长寿呃老人，原因之一恐怕还是跟每日必孵混堂有得关系啊！

去东瀛孵混堂就是去泡泡温泉，东瀛是世界哴向最最有名呃温泉国家之一，有得迭恁一句名言，凡是到了东瀛，假使呒去泡过温泉，就勿好算到过东瀛噢。东瀛人有得一日泡三趟温泉呃良好习惯，一般辰光就控制勒拉15分钟到20分钟一趟，既分早中晚，也分早上一趟，晚餐前一趟，跟困觉前头一趟，全凭嗰人呃生活习惯而定。据说长年累月、坚持不懈呃坚持下去，有助于身心健康，还可以有效呃预防产生高血压、心血管等疾病，像吾伲只是去泡几趟是勿起作用呃。

东瀛人勒拉混堂呃出入口处，必定要去悬挂一块帘子，勒拉帘子上头还写了一嗰大大呃“汤”字，还要去区分“男汤”跟“女汤”噢，泡温泉就畀称之为“给汤”。迭嗰“汤”字也是由中国传入到东瀛呃，天然具有热度呃温泉，就可称畀之为“汤”了，说明了东瀛文化跟吾伲呃文化，既有得一脉相承呃地方，又有得自家呃发展，勒拉东瀛“给汤”，既分室内，也分室外，伊拉对于“给汤”有着十分严格呃规定，勒拉“给汤”呃全过程当中，先要用热水去淋遍全身，让人有一嗰适应过程，然后才可以进入到各种水池里向泡泡温泉。但畀过，勒拉泡温泉呃辰光，既勿可以畀身哴向呃污垢跟老坑带入到水池里向去噢，也勿可以勒拉水池里搓污垢跟老坑噢，每趟泡温泉最长辰光最好勿要超过半嗰钟头，泡好温泉以后，还要去有淋喷头呃淋浴间去冲洗干净，中国有句俗话叫做入乡随俗，笔者也只好依样画葫芦照着做……

【备注：文章为作者原创；各种老上海汏浴淴浴图片均来源于网络上；感谢原创图片。】

杜老倌侠客居（陆伟）写于2016年08月26日星期五晚上