勒拉笔者所在呃城市上海，出生勒拉上嗰世纪八十年代末期以后呃人，伊拉未必侪晓得并认得“煤球炉子”。据笔者查阅到呃历史资料后晓得了，勒拉顶顶高峰呃辰光曾拥有过100万只煤球炉子。

北方家庭用呃燃料叫“蜂窝煤”，勒拉笔者所在呃城市叫做“煤球”搭“煤饼”，因为所选择呃材料是用煤沫子、碎煤，加上有胶质呃黄土摇出唻呃，加之形状，既有“球状”呃，又有“饼状”呃，因此畀叫做了“煤球”搭“煤饼”，还因为是搭“炉子”一道使用呃，因此又畀叫做了：“煤球炉子”搭“煤饼炉子”。据父辈一代人唻讲，最先出唻呃家用燃料是“煤球”，一直到了上嗰世纪70年代中期，勒拉南方地区，才出现了一种新呃、直径勒拉16公分左右，厚度勒拉10公分左右，有得12嗰孔饼状呃煤饼，据说是从北方流传过唻呃。

据笔者查到资料显示，制作好呃“煤球搭煤饼”可长期存储，伊呃制作工艺通常情况下头侪是机制呃，勒拉最初呃辰光形状如同白果一样，大小有得核桃那么大，用动力带动俩嗰滚筒相对旋转，勒拉俩嗰滚筒上有相对应呃半球型凹窝，当煤粉、黄土、水按照适当呃比例搅拌均匀，从滚筒呃上部加入，被相对应呃俩嗰凹窝挤压成球形。因为制作呃工艺邪气落后，加之燃烧了以后对环境污染是交关大呃，覅利于环境保护，基本哴向畀取缔忒了，改为使用环保清洁能源。

勒拉掰搿辰光，每家每户侪用呃是煤球（饼）炉子，伊呃辰光还有得一嗰专门呃工种叫做——“摇煤球（饼）工人”，伊拉呃工作就是摇煤球（饼），拿“煤沫子”搭“碎煤”，外加有得胶质呃黄土放勒拉一道摇出唻呃，摇煤球（饼）就赛过搭摇元宵是一色似样呃，勒拉笔者小辰光去煤球（饼）店还看过制作全过程。摇煤球（饼）工人，起先就要做好两三坪面积呃煤糊，然后再用铁铲子切，横切成宽度为1寸多一眼距离，大概勒拉1.5寸左右，迭面切好以后，再掉换一嗰方向，依旧是横着切，等到侪都切好以后，就成了一嗰嗰小方格子，然后放勒拉筛子里去摇，摇煤球（饼）呃辰光，先放一只花盆勒下头，再畀筛子放勒花盆上头。摇煤球（饼）呃辰光是要蹲勒地哴向呃，去用胳臂呃力量让伊左右交互摇将起唻。筛子下头呃花盆好像一嗰轴，一边摇还要一边注意将黏勒一道呃散开，又要随时洒些煤沫子，摇到后唻筛子里向呃小方块渐渐摇滚成了黑乒乓球，等晒干后就好用了。

至少勒拉上嗰世纪九十年代初中期前头，笔者所在呃城市上海，也包括全国各嗰省市里向呃居民，最记忆犹新呃一桩事体，就是当年覅管走进啥呃类别搭样子呃房子，首先让人看到呃就是煤球（饼）炉子了。畀过摆放呃地方并覅一致，有些人家放勒灶（披）间里厢，有些人家放勒过道哴向，住勒市区里向呃居民，因居住呃房屋覅通风呃缘故，只好移动到弄堂里向，再借助蒲扇呃风力唻点火。只要一歇歇辰光便会冒出滚滚呃浓烟，一直弥漫到整条狭窄呃里弄里向。每当到了夜快头，最早也早覅过五点钟呃辰光，整嗰城市里向每家每户侪都纷纷生起了煤球（饼）炉子做夜饭，笔者所在呃城市上海，一般要勒炉子里向塞上三只煤球（饼），而且迭三只煤球（饼）孔侪都要对整齐，假使覅对齐呃閒话邪气容易堵塞歇火，所要去使用呃工具就是一把火钳，拿火钳往一只只煤球（饼）洞里向轻轻较疏通两三下。笔者屋里厢最初是住勒拉房管所提供呃私房，后唻搬迁到由房管所建造呃新工房，一梯三户，由于煤球（饼）炉子呒处放，只好放勒过道里。

还有一种情况下头，也同样是会得歇火呃，就是由于三嗰煤球（饼）燃烧完毕了，加之自家呒得计算好，呒勒炉子里增添新煤球（饼）呃缘故。家母曾对笔者讲过迭恁一段閒话，为了覅让炉子歇火，每天要添加两三趟煤球（饼），最早一趟是勒拉凌晨四点到四点半左右呃辰光就要起床，畀炉子里添加新呃煤球（饼），伊每天侪是雷打不动呃，勒拉掰搿辰光里向基本呒得停断过，而且起床辰光闹钟覅去用呃。

生煤球（饼）炉子同样是有得技巧呃，有一些人覅管哪恁去生，生唻生去就是生覅好，勒拉有些辰光，覅是煤球（饼）炉子里向突然呒火歇火了，就是再哪恁去生，也呒办法去点燃着火，迭嗰是一嗰交关让人感到头疼呃问题。事先就要先准备好生炉子呃材料，打火机或火柴盒，呒有用呃旧报纸、大纸条子，反正是恁点燃易燃呃物品侪是可以呃，还要准备好一些柴爿【备注：北方人或北方地区叫“木柴（材）”，勒拉笔者所在呃城市叫做了“柴爿”。】柴爿要覅寸覅过适中最好，既覅恁邪气细，也覅恁交关粗，否则是呒办法让炉子生好生炀呃。勒拉生炉子呃前头，最好先放两只烧过呃煤球（饼），迭恁样子去做就覅会得缺少氧气歇火了，还要拿炉子畀下面呃盖子抽开唻，然后就是再拿柴爿搭报纸（大纸条）放到两只煤球（饼）呃上头，报纸（大纸条）要放到柴爿呃上头，再去点燃报纸（大纸条），为了恁够烧炀覅歇火烧得快，最好再放一只塑料袋袋，覅放阿是可以呃，勒拉烧呃辰光，最最好让伊自家去着火，覅去管伊让伊随便去烧，勒拉迭嗰辰光还覅好放煤球（饼），要覅然格閒话，既会得烟雾腾腾，还覅大容易着火烧着，等烧到呒得火焰呃辰光，就剩下烧出唻呃碳火，只要拿新煤球（饼）放进去就可以了，过一歇歇火自然就会得烧着，勒拉操作呃全过程中，还要拿大蒲扇对准炉子下面开口覅停呃去扇风。

勒拉老底子，由于每家每户侪要依靠各式各样呃煤球（饼）炉子唻烧水做饭菜，且家家户户僎要生煤球（饼）炉子，使用大蒲扇扇风可以畀煤球（饼）炉子增加一把力道，让炉子烧得更快更炀，还恁时不时呃扇走炉子里向冒出唻呃滚滚烟尘。畀过，假使讲操作不当，或者操作覅够规范呃閒话，是邪气容易辣到眼睛呛到鼻头呃，弄了覅好就会得覅停呃流眼泪咳嗽，一把眼泪水一把鼻涕，笔者小辰光也生过煤球炉子，也是碰到过上述情况呃。最最好呃办法就是——勒拉生炉子呃辰光一定要背对着风去生炉子，千万覅恁迎着风去生炉子，要覅然滚滚烟尘就会得对牢自家，并且邪气容易辣到眼睛呛到鼻头。

勒拉掰搿辰光，国家执行呃是单休日政策，每嗰礼拜只休息礼拜天，老百姓开门七桩事体就是“柴米油盐酱醋茶”，“柴”是头一桩大事体搭要紧事体了，勒拉掰搿辰光“煤球（饼）店”搭“粮食店”是一样多呃，对于一些双职工家庭唻讲，伊拉去买煤球（饼）只好放到礼拜天，伊嗰辰光买煤球（饼）同样也是要限量供应，一般情况下头是买一趟100斤，有些省市是采用各类“煤球（饼）券”唻购买“煤球（饼）”呃，还有些省市是采用“煤球（饼）”卡唻购买“煤球（饼）”呃，笔者所在呃城市上海是采用“煤球（饼）卡”唻购买“煤球（饼）”呃，至今还恁去记得，当年煤球（饼）卡呃颜色是粉红颜色呃。

当“煤球（饼）购买好以后，第一种办法，可以请店里向伙计帮忙送到屋里厢，需要付一眼眼配送费用呃；还有第尼种办法，可以向店里借一辆小推车，自家推回去，借车子是免费呃，但畀过“煤球（饼）卡”要抵押勒拉店里向，等到还好了车子后再拿伊赎回唻；第三种办法就是问有黄鱼车呃亲朋好友借一辆黄鱼车，拿“煤球（饼）”去踏回唻；勒拉掰搿辰光由于每家每户经济条件邪气一般，抱着省吃俭用原则，恁省一眼是一眼，多数人家会得采用第尼搭第三种办法。

勒拉掰搿辰光，搭父亲一道去买“煤球（饼）”呃趟数比较多，多数情况下头，吾伲是问几十年呃老邻居陈家姆妈屋里厢借一部黄鱼车去购买煤球（饼）呃，只因伊嗰大尼子是勒拉单位食堂里向做生活，伊拉大尼子是做大菜师傅呃，需要每天去小菜场买买小菜，单位就专门配了一部大黄鱼车畀伊拉尼子。勒拉掰搿辰光，父亲是勒拉县城做生活呃，基本哴向是一嗰礼拜回唻一趟，碰到了礼拜六侪好回到屋里厢，所以购买煤球（饼），一般是勒拉三嗰礼拜到一嗰号头左右。

仍旧是勒拉掰搿辰光，每户人家难难般有得脱般呃辰光，要开始烧夜饭了，煤球（饼）僎都用光了，煤球（饼）店也已经是打烊关门了，迭歇辰光勿单单是唻覅急、也买覅着煤球（饼）了，碰到迭种情况以后又哪恁办呢？！有得两种办法，第一种就是：问周围邻居先借几只煤球（饼）唻用，等买好煤球（饼）以后再还畀伊拉；第尼种就是：覅用急点啥呃，因为除忒每家每户至少有得一只煤球（饼）炉子以外，每家每户还会得自备一只煤油炉子，是为了以防急需辰光拿出唻使用呃，一旦碰到煤球（饼）侪都用光了，就好拿出唻使用了。除忒配备一只煤油炉子之外，还会得配备一只白颜色呃塑料桶，一般重量覅会超过十市斤左右，为呃就是装煤油。勒拉笔者小辰光也是用过煤油炉子呃。覅用过煤油炉子呃人是覅晓得呃，一旦用起了煤油炉子，屋里厢就会得变得烟雾腾腾，还会得散发出唻一股刺鼻呃咪道！　

【备注：文章为作者原创；各类和文章有关的图片均来源于网络上；感谢原创图片。】　　　　　　　　　　　　　　　　　　　　

杜老倌侠客居（陆伟）写于2018年10月27日星期四晚上