上个礼拜，女儿带了三岁半勿到个小外孙牛牛，回到阿拉屋里厢住了一段辰光。小鬼头活泼好动，脑子转了斜起快，看到新鲜物事侪要问“为什么……？”最好白相个是，小鬼头来得欢喜“捉扳头”（捉牢别人讲闲话里厢错漏个地方）。

嗰天，女婿开车带了我、夫人和女儿、小外孙，去黄浦区河南中路浪厢个一家饭店吃中饭。一路浪，坐了后排个小外孙骷浪头转来转去，眼乌子东看西望，小嘴巴不停个问出老多问题。抱牢伊个女儿只好一一解释拨伊听。行至十字路口正好碰到红灯，车子停了下来。小外孙大声问，车车哪能停下来了？外婆回答伊：“红灯不能闯，绿灯可以。”小外孙立马纠正：“绿灯不能讲闯，讲行。”弄得一车人侪哈哈大笑。我对小外孙竖起大拇指，并且问伊听啥人讲个。“老师讲个。”我夸奖小外孙交通安全记了老牢个。

还有一天，阿拉一家门开车去徐汇滨江白相。有一段路，车子开上了内环高架，眼睛看出去交关开阔。我对小外孙讲，侬看到（口伐），四周盖了老多高楼大厦。小外孙朝四面望了望讲，外公侬讲得来糊里糊涂。“一二三四五……十一、十二”，外孙抬起胖笃笃小手，扳了手指数起高楼数量。伊个意思是，看到个高楼一共十二幢，勿好讲“老多”。我呒么想到小外孙会得数到十位数，斜起惊讶。

昨日子早浪厢，小外孙起来后马上刷牙、汏面，蛮快弄好，就坐了桌子前头吃起了早饭。女儿拨小外孙准备了面包、鸡蛋、牛奶，营养搭配交关合适。外孙先捺起面包咬一口，又捺起鸡蛋吃一口，吃吃停停，停停吃吃。外婆就对小外孙开玩笑讲：“今朝牛牛吃饭老慢个。”外孙撅起小嘴巴讲，因为夜里厢呒没睏好觉。后半句虽呒没讲明，但一听就明白了：觉呒没睏好，所以胃口不好。夫人听了讲伊：“吤小个人就晓得诡辩了！”

小外孙住到阿拉屋里厢迭段辰光，家务事体增加不少，我和夫人也比较吃力，但拨阿拉生活增加了老多乐趣。不过，嗰个年纪的小外孙，“三观”正辣辣形成当中，需要多做正面引导，言传身教，让小外孙快乐健康成长。