文/唐伯虎点蚊香

    在菜籽花发春的季节，苦菜花蚊香骑勒一辆山地车，东看西张，东荡西横，去农村山坳、田边，调节心情，看看风景，做宁稳笃六珠，天搭四平，暗枪酿。

    一直骑到小沙青岙，看见一个60多岁格老头，电灯柱挡之，唤天道地来滴哭。稀奇类！蚊香也算走过3关6码头，吃过奉化芋艿头。上知嫦娥奔月，下知计划生育 。格从来唔没看见一个老头哭勒介伤心过，眼里鼻头，唔告话头 。

    走带过去，唔准眼则，唔规唔矩，抬城隍问其一句:“老伯伯，失恋了啊？哭勒介伤心！”

    老头看了看我，唉声叹气话:“ 后生，我8阿拉阿爹打类!”

   “啊!其为搜要打侬?”我问。

   “阿爹10我搭阿爷勿孝敬。”

   “ 啊！侬阿爷划来滴撒，格搜事体勿孝敬和？”蚊香查乱脱气，搂根挖髓又问一句。

   “阿拉阿爷老木丁东，背时背得，一直喜欢吃燥饭，我烧句饭辰光活灵西出多放了一瓢水，烧成了软饭。阿爷话其一百多岁了，一世为宁勿吃软饭，宁可饿滴也勿吃。

    我顶嘴：“舟山老古话勿是讲吃软勿吃硬吗？”阿爷气煞，就10阿爹，阿爹就打我类，忖忖真伤心，就哭类，刚好8侬看见，面孔黄丫丫，霉头出到太平洋！”

   “老伯伯，鞋文伤心类.宁家年纪大类，豆腐药勿落，矮凳撩勿着。侬介大年纪，还有阿爷10，阿爹打，福气好足类，我告侬一个办法，明朝句过下饭烧好眼，饭烧其石骨老头硬，记3碗8那阿爷吃，看其咋办办! ”

   “哈哈哈，大无小歪，团糖骨气，乱讲三千,8侬讲了笑煞。”

    嘿嘿嘿，老伯伯侬勿晓得，蚊香勿擦一句乱话，一世勿讲实话，一到里讲的比唱的好听。

    宁比宁要气煞宁。有的宁是月里嫦娥，有的宁是河边田螺。接落来讲另外一样事体。

    舟山闲话讲勒好！会吃多刮刮，会穿多择刮，会走捣脚骨。

    蚊香喜欢捣脚骨，搭几个朋友从长岗山出发，一路踢脚绊手，脚高脚底，过鸭蛋岭，翻五雷山，走寺岭古道，走勒乌晕倒暗，汗爬雨淋，终于到达目的地—茶人谷。

    坐落休息，两只脚骨，一只脚娘肚开始弹琵琶，一只弹棉花，比我手弹好，尼真话。

    朋友骚嫖：“蚊香，出发前侬勿是讲脚骨直细，纯是力气嘛，现在咋死蟹一只，乌珠泛白勒。”

    嘿嘿嘿，我一直口气比力气大，脚气比口气大，那通勿是勿晓得。

    下山，过一老屋。看到一个小老头，红粉细白，红出汉汉，水色眼勒好类，日头菩晒之，二郎腿翘之，眼睛眯之，困了摇椅里，来滴摇啊摇，摇到外婆桥。旁边一张小桌凳，上面摆了一盆乌贼盘肠，一盆咸呛蟹，一盆螺酱，3瓶舟山老酒，2瓶已空，还有一瓶盖头划接开开。香烟屁股含地样。一只手机来滴放歌，小老头一边用手在大脚胖上打拍子，一边哼歌，仔细一听，派来是王菲的《传奇》“只是因为在人群中多看了侬1眼，再也勿要看侬第2眼…”

    百病好看，油头难医。蚊香油性勿改，走带过去，又开始7搭8搭：“师傅，定足类！南风吹吹、老酒嘴嘴 、音乐听听、香烟煤煤、做宁铁蛋酿。’

   “哈哈，来版做西宁，自家要对自家好一眼。吃光用光，身体健康。”小老头答。

   “师傅，我看侬红光满面，发财眼前，保养介好，有搜秘诀伐？”

   “我啊，就是每日香烟2包，老酒5斤，从来勿运动，下饭喜欢生古老头咸，顶喜欢吃油炸食品…”

   “啊，格侬今年高寿？”

   “我今年32岁，咋啦?”

    十时三刻，汗得来类，格是素类。